「香港人」必須「反守為攻」

今日香港既局面，大家都會覺得好難受，但我地亦唔應該停落黎傷春悲秋。今次希望有系統咁由幾個唔同既角度，去討論香港人下一步可以點做。而呢篇文章係我對局勢發展既觀察，希望響依家香港低迷既氣氛下拋磚引玉，重新為「抗爭/行動」賦予意義，令「香港人」能夠重新思考「反守為攻」既戰略。

一、當下香港處身既時代背景

我認為討論所有既問題前，應該先簡單講解今日香港既狀態，否則我地就好容易被五毛既狡辯有機可承(單純講目標而從來唔講風險同成本，陳義過高只會浪費時間議而不決，最終必然一事無成)。因此清楚明瞭咁了解左當下香港處身既時代背景與及當下既國際關系 - 「後國安時代」與「民主獨裁冷戰邊緣」，咁呢個討論先會變得有意義同有價值。

香港既時代，我認為有六個重大轉折點，分別係「第一次光復」、「六七暴動」、「八四談判」、「六四屠城」、「九七回歸」與及「國安法政變」，上述每一點都對香港既政治、文化、思想、社會同經濟既活動、民族既組成、價值同信仰都有重大既影響。而「後國安法時代」所指既就係「九七淪陷」後，香港人對「逐漸被滲透政權(港共)」作出最後一次大型反抗「反送中運動」與及呢次反抗後續所導致既政治環境劇變。

「國安法政變」係指中共以「反送中運動」作為契機，利用基本法第十八條既憲法漏動，通過頒布「國家安全法」凌駕響原有既基本法之上，呢條法例既誕生改變左原有既政治平衡與及權力分佈，可以反映響以下三件事上面：

一、國安法凌駕左原有既基本法
二、國安公署凌駕左原有既三權
三、國安法可自行頒佈實施細則 取代左立法過程

響國安法以前，原有既政治架構下，仍然有屬於香港人既空間(過往係被滲透，但仍然有制度內力爭既空間)，但國安法後「港人治港」既可能性已經唔再存在，而我認為呢個先係「國安法政變」後最根本既改變。後續香港人失去應有既自由、法治既淪陷、語言、記憶同文化既抹殺，係原有既「香港民族」被貶為「二等民族」後，被北方蠻夷強制同化既退化過程上必經既階段。

香港人既反抗雖然響本土唔能夠取得成功，但亦並唔係毫無意義。對世界黎講，「反送中運動」令西方意識到中共邪惡政權既本質，文宣戰線打開左認知作戰既大門(台灣、澳洲已經進入左資訊戰)、而香港人既血同淚成功喚醒左一股對抗邪惡政權既道德力量同埋勇氣，亦因此建立左當下「民主對抗獨裁」既世界格局。

必須要承認「國安法時代」係黑暗、好難見到光明，同時舉步為艱，難以前行既時代，因為呢個時代係一個屬於謊言、背叛、極刑、監控、洗腦既暴政時代，一個同「香港民族」過往所高舉既核心價值互相違背既時代。好多人認為時間係屬於人民既一方，勝利必然歸於人民，隨住時間既發展，香港亦必有光復既一日。因此只要我地耐心等待，必然會有下一個反擊既機會。

二、「等待」帶來「被毀滅」

然而，我必須要強調呢種想法係不設實際既，亦只會重蹈上一次「反送中運動」入面「新生代對上一代『做唔夠』既抱怨」並將現有既問題帶住下一代身上，耐心等待不單唔會令香港問題破局，相反港共響教育、洗腦、殖民上步步進逼，對下一代既改造工程其實已經進行得如火如荼，「前國安法時代」既遺民被動既等待帶黎既只會係孤立與及新疆式既「被毀滅」而唔係一個反擊既機會。

隨住抗爭之火既熄滅，記憶被國家機器所抹殺，加上極刑與及嚴酷既法律框架，抗爭既熱度、抗爭既空間亦會必然咁減少。當我地經常恥笑依家中國人既時候，又有冇諗過當日六四佢地都曾經有反抗既經歷，但後續既等待並無令佢地取得任何既成功，相反佢地因為現實而腐化、墮落，下一代更加變成左今日既小粉紅。因此「後國安法時代」唔會因為大家等待而過去，相反佢會因為大家既等待而成為「永遠」。

因此當香港民族既血統、精神、信仰同價值仲能唔能夠保存落去都成為疑問既時候，其實抗爭係一個NOW or NEVER既問題。因為時間從來都唔係響人民果邊，而係響當權者既一方。香港人響當下既時代背景下面，必須思想下面三個基本問題：

一、如何保存香港民族並響「後國安法時代」生存落去
二、當前局勢下香港人下如何反守為攻，扭轉當前既局面
三、由永遠既「後國安法時代」制造「第二次光復」既契機

中美當下雖然互相磨擦，處於冷戰邊緣，但政治外交上，現實主義與及功利主義橫行，香港所引起既道德力量亦會隨住時間而逐步減少。現時中共外匯枯竭，不斷淘空香港，西方為保資產亦由香港抽走資金。當國際金融中心地位不再，香港既利用價值亦會日漸失卻。當香港完全失去工具價值既時候，中國又何須保存香港？西方又何須為一個冇利用價值既城市爭鬥？

因此香港人擁有既時間其實已經所剩無幾，我地唔能夠重蹈過往西藏、六四同新疆既覆轍。而點樣達成上面三個基本問題，我地就需要觀察整個「民主對抗獨裁」既世界局勢發展，去尋找香港抗爭既出路。

三、地緣局勢可能發展既方向

由於香港問題已經唔係單純既香港問題，因此要探討局勢發展方向，必須由幾個方面加以觀察，包括左唔同陣營既意圖、佢地之間既利益、當中產生既互動，而其中對香港影響最巨大既係美中關係、其次為中台關係，而三者之間既互動又會對香港產生巨大既影響。

中共 - 滲透世界、輸出共產革命

對中共而言，習近平係毛澤東思想既擁戴者，而毛澤東既最終目標並唔係單純統治中國，而係令佢理想下既共產主義征服全世界。佢為左打敗資本主義，甚至曾經向蘇聯提議響中國既土地上面同美國打一場核戰爭，豪言「死三億人也沒關系」。

▲ 《香港67暴動始末—解讀吳荻舟》曾經記載吳荻舟響接見港澳工人代表團既一番說話

亦因此定立左「長期打算，充分利用」既政策，建立左對外既「白蟻滲透策略」。

▲ 「白蟻滲透策略」

由上面兩段可見，當時既毛澤東政府其實就已經有利用香港取得外匯，與及利用香港輸出革命到全世界既諗法。鄧小平既改革開放解決左當時需要經過香港取得外匯既問題，同時門戶開放政策令對外既白蟻滲透策略可以直接由中國內部進行，而無需再經香港呢個第三方。因此當時鄧小平亦唔再延續「長期打算，充分利用」策略，直接收回香港，因此香港對中共黎講只有工具上既意義(吸收外匯)，而冇政治上既意義。

而中共滲透世界既白蟻策略同野心其實由毛澤東時代到習近平時代一直都無改變過，鄧小平既「收回香港」、江澤民既「走出走」、胡錦濤既「大外宣戰略」，習近平既「一帶一路」。其實中共一路以黎輸出革命打敗資本主義既野心，「生存、狀大、滲透、顛覆」既模式一直都冇改變過，佢所欠缺既只係達成目的所需要既「時間」與及無辦法睇清形勢既「敵人」。

美國 - 維持霸權，防止中共崛起

對美國而言，先後打敗左英國同蘇聯成為世界霸主既超級強國。為左保持佢既霸主地位，必須時刻警惕同提防另一個超級強權既崛起，90年代日本既經濟起飛被美國迅速壓制左落黎。而2008年金融海嘯中共既崛起亦令美國意識到另一個挑戰佢既霸權已經誕生左，因此奧巴馬政府響2011年提出《重返亞太策略》嘗試達成「亞洲再平衡」，意圖通過外交手段、經貿框架限制中共，以最低限度地維持一個由美國同西方國家主導既經濟同安全既格局。

然而中共為左擺脫美國多年黎響東面通過第一島鏈對中共作出既鉗制，響2014年提倡左「一帶一路」，借用古代「絲綢之路」既歷史符號，以和平發展既旗幟，向西面實施突圍，意圖形成一個由中共主導既威權陸地國家集團，同美國主導既民主海洋國家相互競爭。而往後既發展，我地亦可以見到重返亞太、亞洲再平衡既策略並未有效咁阻止中共既崛起，和平既手段甚至令佢不斷咁對外以新殖民主義方式擴張，內部則倒退成為「習近平帝國」。

「一帶一路」將中國既物理勢力擴大到整個亞洲，而佢既「走出去」與及「大外宣」既策略令佢軟性地滲透到整個西方世界。由於戰略上既失效，特朗普上任後改變左原有既「亞太策略」，並擴大成「印太戰略」，美國亦唔再選擇通過合作型既外交手段改變中共，而係改以貿易戰既方式直接打擊中共，以削弱方式阻止中共霸權既崛起，並建立QUAD阻礙中共擴大中既影響力。

而香港偶然發生既「反送中運動」令西方意識到中共邪惡政權意圖顛覆全世界既本質，香港人既血同淚成功響經濟同政治因素以外，喚醒左一股對抗邪惡政權受道德力量感召既民意基礎，亦因此建立左當下「民主對抗獨裁」既世界格局。而拜登上任後亦用「民主陣營」保障「人權」既旗號進一步聯合歐洲、台灣與及各地盟友孤立「獨裁政權」中共，令中共既資金鏈進一步斷裂。

呢一刻既中共政權已經因為貿易戰被打到體無完膚，而孤立亦令中共一時無法再度崛起建立霸權，但現實問題係，中共體量巨大、面積廣闊、即使被美國從經濟上擊潰中共亦只會陷入潰而不崩既民族主義當中(二戰前既德國)，而同蘇聯冷戰既經驗，戰爭亦只會將人類帶向滅絕邊緣(古巴飛彈危機)，雙方巨大既傷亡亦非現實既選項(中日戰爭既日本、太平洋戰爭既美國、韓戰既聯合國軍)。因此點到即止既壓制，與及日後如何撲滅中共再次崛起既野心，就成為今日美國印太戰略既重心，形成即「壓制、孤立但共存」既政策。(《法國國防參謀長戰略願景》：競爭 - 贏得戰爭前的戰爭)

台灣 - 世界經濟命脈，逆境自救

傳統上黎睇，台灣位於中美東面戰線上角力既重心，對美國而言，一旦失去台灣，第一島鏈破滅就意味日韓被孤立，而中共亦能夠衝出太平洋，將會徹底咁改變整個亞太戰略既平衡。因此台灣係絕對唔能夠失守。而對中國而言，統一台灣則有重大既政治意義，甚至關乎中共合法性既問題，因此中共對台灣文攻、武嚇、滲透、策反既威脅70年來從未停止。

但現實意義係，隨住世界經濟、工業轉型，晶片取代左石油成為世界上最重要既戰略資源。而台灣由被孤立既環境一步一步咁成長狀大，匠人精神逆境自強，成功控制成左世界高階晶片超過70%既產能，令台灣因此取得國際話語權。對整個西方而言，台灣既戰略資源必不可失，更萬萬不能落入獨裁政權既手入面，因此台灣問題已經唔係地緣穩定既問題，而係世界經濟命脈掌握係邊個手上既問題。

習近平稱帝既夢想，與及「一帶一路」敗露左佢對外擴張既野心，令中共受到西方前所未有既圍堵，美國既禁令，中共無法從台灣取得戰略資源以獲得擴張既資本。而香港既「反送中運動」亦喚醒左台灣民眾，令中共策反台灣既戰略徹底失效。台灣亦因此穩住陣腳，防疫表現與及控制世界經濟命脈令佢既國際地位大幅，「事實獨立」亦令習近平稱帝蒙上陰影。

香港 - 棄港保台，成為可見現實

由上可見，三方既互動係互相影響，但最終結果仍然由美國呢個超級霸權作出決定。最近有一本書叫《天下大亂》，係講特朗普時代既新冷戰點樣形成。當中好明確咁將美國政治體系分成左五個勢力：1. 華爾街資本集團、2. 國家安全體系(強硬派)、3. 超級鷹派(滅共派)、4. 官僚/政治建制派、5. 特朗普。

因為中美既貿易戰令強硬派彈出(但留意強硬派唔係滅共，而係要趕中共出美國/中國讓步)，佢地發佈同執行左大量強硬既對華政策。而香港問題受到重視，亦係強硬派將香港問題放響Agenda上面既表現。但依家既問題係，特朗普離開之後，官僚/政治建制派重新上台，超級鷹派退場，唯一留低既既係強硬派，但強硬派既目標並唔係要中共滅亡，而係要中共讓步保障美國既利益同安全，加上華爾街資本集團既代理人重新進入國會、白宮，雖然軍事外交上仍然會好硬(大幅增加戰爭成本，防止習近平誤判攻打台灣)，但亦只會係點到即止既壓制。

而因為美國體系有太多既利益集團拖後腿，可能會因為勢力平衡出現三個後續可能既發展方向：

一：強硬派主導，保台灣、中共無得作惡，冷戰圍堵持續，但香港成為犧牲品。
二：官僚體系主導，睇到中國威脅，但中共既集權體制好快又重生，香港命運同上。
三：華爾街資本集團，有錢齊齊搵，中共集權體制重新滲透入侵全球。

由於世界既民意已經響特朗普年代、同埋香港「反送中運動」既道德感喚、中共打壓異己既暴行、制裁歐洲下改變左，已經無可能翻去「三」既格局，因此中美關系會遊走響「一」同「二」之間，而美國國策響民意同利益集團既相互對抗下，熊貓派唔會再存在，華爾街集團亦無法主導(但仍有影響)，因此最終格局會係美國全球圍堵中共，但唔會滅共既持續冷戰狀態。香港亦好可能成為中美冷戰交換長久和平既最終犧牲品，而唔會回復香港往常既環境同政治狀態。

因為可以預期既係，香港接連中國大陸，難以被外界支援，某程度上既維持現狀、最低限度咁保障出入境自由已經係對英、美、香港人最好既選項，「棄港保台」已經成為基本可見既事實(呢樣野特朗普都唔會改變到)。圍堵既重心唔係香港，而係影響全球供應鍊既台灣。當香港響雙方之間既工具價值消失既時候，抗爭熱度消失既香港只會被遺忘，慢慢咁被同化成為另一個內地城市，最終如豬隻般「被人道毀滅」。

而隨住和平統一台灣既可能愈黎愈細、中共因應圍堵而進入鎖國、習近平因本人登基而鞏權、清除異己、與及台灣豐厚既戰略資源、都唔能夠完全排除習近平響誤判下發動戰爭，或者以擾亂區域和平作為對外談判或清除異己既手段，甚至將中國全面新疆化或北韓化既可能。而台海衝突既升級，國策既改變，「被殖民」既香港亦必然會進入更極端既戒嚴(依家已經以防疫為名既戒嚴)甚至鎮反狀態，而呢個亦係點解武官李家超能夠主導整個行政架構既主因。

因此不論邊個發展方向下面，被動下既香港，地理位置不理既香港，失去價值既香港，前途同未來都係步向漫長既黑暗，唯一既分別只係佢黑暗既程度。

四、「地理香港」「港共」「香港人」

上面講左地緣政治上中美台三方既角色，但香港就好難講，因為香港係由兩個分別支持唔同陣營既主體所組成，即係：

一、港共

港共係原來既英式民官政府，響中共既持續滲透下，成為幹部體制從屬於中國呢個獨裁政權既機構，佢係協助中共殖民統治「地理香港」呢個地方既組織。而佢係呢場地緣政治既角色係站響中共一方，因此外界響呢場地緣政治既角力上面能夠聽到只有佢附和中共既聲音，而冇「香港人」既聲音。

二、香港人

而香港人係原來生活響「地理香港」呢個地方既族群，因為共同既語言、文化、記憶、信仰、價值逐漸建立而成既香港民族，但今日受到「港共」呢個殖民政權既殘暴統治：

• 香港人有自己既語言、文化，但被人系統性阻礙佢地既傳承同發展；
• 香港人有無限既創意，但失去左曾經自由既創作空間；
• 香港人勤奮、有能力，但因為「二等公民」既身份被政策系統性咁歧視；
• 香港人有求真既精神，但今日得知既事實、歷史、真相往往受過剪輯引導；
• 香港人有自己既良知、道德標準，但被逼洗腦接受蠻夷既同化；

• 香港人有完善既法治，但今日反而遭受納粹式審判；

• 香港人曾經可以暢所欲言，但今日唔知會唔會被身邊既人出賣；
• 香港人曾經擁有屬於自己既私隱，但今日每個人都要帶上電子腳鐐；
• 香港人曾經擁有自由，但今日只能響防疫戒嚴既狀態下毫無尊嚴咁生活；

• 香港人曾經作出反抗，但最終因為「國家安全」送入監牢；

• 香港人明明係面向世界既公民，但偏偏成為左獨裁者治下既賤民；
• 香港人明明佔據左社會既大多數，但偏偏被少數既入侵者所統治、奴役

香港響文藝、商業、經貿、教育、娛樂、時尚、金融、健康、媒體、專業服務、科研、旅遊、交通方面都曾經有顯著既成就同地位；香港既電影、音樂曾經風靡整個亞洲甚至衝出世界；香港係全球主要金融、工商服務業與及航運中心，係世貿既創始成員；香港有自己既奧運代表隊、有獨立關稅區地位、有名列前矛既經濟規模，係僅次於倫敦、紐約既國際大都會。

但今日建立以上咁多輝煌成就既「香港人」，響整個中美地緣政治既角力上面不旦毫無表示，甚至只係將呢個即將決定香港前途、命運、未來局勢發展既角力當成一單八卦新聞、茶餘飯後既話題。

繼1984年中英談判後，香港人再一次成為「等候發落」既旁觀者。

五、「沒有三腳櫈」既歷史錯誤

1984年既中英談判，中共排除左香港人既參與，並以武裝收回香港作脅逼，強逼英國交出香港(當時英國力爭香港人有參與既權利，而談判目標係「放棄主權保留治權」，但被拒絕)。英國某程度上既退讓作出左當時佢可以做到最好既選項，令我地既文明被動咁增加左36年和平既時光。

而1984年談判解除左中共由上世紀50年代起既武裝威脅之後，英國亦隨即對香港快速展開民主化既工作，令我地認識到民主同普世價值既可貴，無法被洗腦。又保留BNO呢個身份，令中共無法任意妄為，否則香港早已被中共新疆式滅族。

但當時既香港人呢？

大部分人以『心裏不願，嘴裏不講』的態度來面對『回歸』，有能力的都移民作為政治保險；即使基於民族主義而支持『回歸』的大學生，也提出有條件的回歸 —— 在民主的基礎上回歸。

程翔

我地並冇好似直布羅陀(格言：「沒有敵人能攻陷這裏」)咁爭取公投(98.97%選民公投歸英)質問「點解要逼我做西班牙人？」，香港有既只有為自己既擠提、搶米與及移民。

同樣既錯誤，除左中英談判(中共排除香港)，仲有當時既基本法起草(中共排除英國)，而國安法政變所運用既憲法漏動亦顯然係當日早有預謀既，以上總總一切睇落好似時代發展既偶然，但其實不論中共既「國安法政變」、英國能夠放出「BNO Visa」，其實都係當日早有既長期部署，而唔係短視下既產物。

但我地唔能夠怪當日既香港人作出呢個結論，因為：

• 當日既香港係受白蟻滲透既；
• 當日既香港係因為中共既武裝威脅而一直未有機會受到民主洗禮既；

• 當日既決策係由上而下難以反映民意既；

• 當日既香港尚未目睹六四屠城感受到中共既殘暴既；
• 當日既香港人只有家庭意識而未有民族意識既；
• 當日我地追求既只係循規蹈矩，短暫既歲月靜好。

但經過左2019年血同淚既洗禮，我地唔已經犯上相同既歷史錯誤。

今日發生緊影響整個印太局勢既「中美角力」，就正正係決定香港前途既歷史時刻、決定民族存亡既關鍵時刻，直布羅陀人既「爭取」、台灣人既「逆境自救」令佢地得到應有既回報，而我地選擇「等待」而唔好好作出相應既「部署」，是否一個「美好既誤判」？

我地係咪要重蹈36年前「沒有三腳櫈」既歷史錯誤？

六、香港人必須「反守為攻」

自「後國安法時代」以黎，防疫戒嚴既狀態令我地重新習慣循規蹈矩，調教並學習響無尊嚴下生活。「前國安法時代」既傷痛、沉重既沉没成本，令我地香港人難以前行一直處於守勢當中。學習無奈，拒絕習慣，耐心等待，身土不二成為左我地既戒律，為既係一個反擊既機會。

「後國安法時代」媒體既墮落、輿論既傷春悲秋、認知作戰既剪輯，令我地無辦法意識到最後一次反擊既機會好可能已經黎左。地緣政治中美角力既戰場，參與既唔單止中美，台灣增加左佢既國際地位、印度、澳洲、日本、英國都各取所需，響鬥爭入面積累左大量既政治資本。

呢場鬥爭始於十三年前中共既崛起，香港響鬥爭中用血同淚換取得來既只係「移居海外、保留生存權」，但你認為呢個成果係咪足夠？整個角力入面，我地除左失去左治權，更加失去左主權。我地「香港人」只可以揀做「非中國人」/「中國人」，響「地理香港」除左生存既權利仲有一絲保留外，所有野都慢慢消失緊……

響呢場角力入面，我地唔能夠永遠處於「守」勢入面，我地必須要盡快響有限既時間入面盡我地既能力展開「攻」勢，令世界意識到我地需要既唔係「偷生」而係「更多」。

七、我提出既五個「可行」

而呢度，我嘗試提出我認為可行既方案：

一、長遠部署，盡快成立流亡議會積累民意，爭取國際話語權

上面曾經講述左中英兩國對香港長期部署帶黎左既成果，因此我地要爭取「話語權」，就唔應該再以個別抗爭者既身份去講述自己既悲傷故事。香港係一個命運共同體，我地需要建立一個有充份民意基礎受權既流亡議會/政府作為平台去匯集我地既聲音、去表達我地既訴求，作為我地既未來對抗中共、港共一言堂既窗口，而有民意基礎既海外戰線亦會變得更有代表性，同時定期既選舉亦有助修正海外戰線既決策，將意圖割裂本土、海外兩地既分化徹底消除。

最近USCC既報告、地緣政治上既角力有美國既聲音，有中共既聲音，有港共附和既聲音，但偏偏冇「香港人」既聲音。而我地正正重蹈緊當時「沒有三腳櫈」既歷史錯誤。因此要取得長期既話語權，必須先建立屬於香港人既平台(唔係大台，係尋找民意授權既平台)，再擴展下屬既委員會，成立香港人既主權基金(甚至爭奪港共既海外資產)、發言組織、媒體、教育機構、文化組織、情報單位、網絡防務系統，我地先能夠取得屬於香港既「國際話語權」、保持一定熱度以至不被世人所遺忘，並為香港人響地緣政治既鬥爭上爭取更多。

二、建立長期抵抗意志，產生相應既工具，盡可能保護民族信仰

上面講過中共對下一代既洗腦已經進入得如火如茶階段，而對上一代既遺民則通過巨大既創傷與及沉沒成本令我地選擇接受無奈並等待反擊既機會。但長期既守勢不旦無法成功，反而因為中共認知作戰制造既「事實」、令我地無法意識到反擊既時機。因此我地需要建立長期抵抗意志，產生相應既工具應付事態發展。

我相信意志今日既香港人仍然係有既，但我地要響有限既時間入面，制造相應既工具令呢一種意志得到有效既傳承同運用，例如：民間自發既教育素材，文化既保存記錄工具，運用語言既機會，真實而正確既歷史觀，正確執行既第四權，觀察世界與及地區發展既媒介，不受剪輯引導既「真相」，分辨敵我既符號，不受五毛法律干擾自由既討論空間，對抗認知作戰既工具，可實踐既道德底線、香港人必須尊守既憲章、一個清晰可見既戰略目標等等。

其實好多領域我地都需要建立長期抵抗既準備，甚至我地已經意識到好多新戰線既產生，但好多所需要既工具我地仍然仲未擁有或者建立。

三、全面「武裝化」海外香港，與中共「大外宣」系統作出對抗

除左本土既長期抵抗，海外香港亦唔能夠只係以香港為作戰目標，因為中共既目標係滲透全世界，離開香港但袖手旁觀，並唔會得到歲月靜好，反而只會帶黎下一個「特別行政區」。因此爭奪「地理香港」上要得到西方既民意支持，香港人有必要輸出香港模式為全世界建立觀察中共「大外宣」既情報單位，並與其作出對抗，並時刻提醒切勿重蹈香港、新疆、西藏既錯誤。否則隨住時間發展，白蟻策略只會令世界再一次陷入另一次危機當中。

現時台灣、澳洲已經進入資訊戰既階段。但香港人能否進一步協助未意識到問題既地區建立海外媒體與中共大外宣作出對抗？香港人能否建立屬於當地既情報單位阻截中共既輿論導向？能否通過大數據分析當下議題是否受中共操控並警惕西方？能否追查並建立滲透清單抽出並清除白蟻？能否建立奶共清單令中共走狗身敗名裂失去民意支持？能否加入當地政黨當地政治體系參與遊說及政策制定工作？

論述鬥既唔係人數而係道理，香港響係唔會響呢方面輸比任何大外宣，但首先我地要有同大外宣對抗既意志而唔係做一個單純既觀察者。

「光復香港」並唔能夠單純通過遊說乞求香港應被拯救，我地需要既係改變當地既輿論結構，獲取當地民意既認同同支持，而建立屬於我地既情治單位同中共「大外宣」作出論述層面上既對抗，並阻截滲透，先係影響呢個民意平衡既關鍵。

四、珍惜每一個公投既機會，盡可能向世界表達抵抗意志

我地要珍惜每一個公投既機會，唔能夠令中共對國際產生香港已經進入緩和或被馴化既假象，立法會除左唔投票，我地要紀錄每個票站真實既投票人數，阻止中共制造事實。我地響每一次有投票既機會(包括音樂典禮、任何形式既投票)，都要動員去參與支持屬於香港人既選項，向世界表達我地仍有抵抗既意志。

我地要響每個細節上面都表達我地仍有抵抗意志，音樂、電影、雜誌、投稿、YOUTUBE、BLOG、盡可能幫襯「黃店」、無視所有政權既宣傳單位、係可以提醒自己既地方寫低「見字飲水」四個字、同你身邊既人講一聲「咁係唔岩架」、建立分辨敵我既符號、盡可能既不合作、盡可能既每日提醒，時刻警惕自己我地需要既唔係深灣道既面包而係「更多」，並盡可能表達出黎。

而有能力既應該盡可能離開香港，呢個唔係放棄既表現，相反呢個表達我地仍有抵抗意志最有力既一項統計工具(離開、拒絕、徹底既不合作)，並為我地為左長期部署累積力量，擴大資本爭奪「地理香港」必然要行既一步。

五、製造香港人道危機，逼使西方介入解放「地理香港」

2019年既「反送中運動」引黎既血腥鎮壓、2020年35+戴耀延既「攬炒十步」，逼使中共「發難」建立國安法，引黎西方大量既經濟制裁，大幅削弱左中共既經濟實力。2019年8月12日大量武警響深圳集結，2019年8月13日楊潔篪與蓬佩奧紐約密會，2019年8月17日美國軍艦意圖訪港，2019年8月18日響血醒鎮壓既緊張氣氛下180萬人仍然堅持走上街頭加入「流水集會」，果幾日香港一度處於中美衝突爆發既邊緣。

而香港人能否製造一場人道危機去逼使西方介入？我認為係可行既，但街頭抗爭既成本已經隨住國安法既成立去到極高既水平，加上港共刻意打壓難以形成有效率既聚集，成本效益比極低之餘亦難以避免下一次衝突會演化為仇殺式既新疆互相撕殺(唔能夠排除可行性，但成本與失控風險極高)。因此我地作為進攻方必須觀察中共既弱點，響減低傷亡既同時作出精準有力既打擊，誘導中共繼國安法後再次「發難」。

當今中美之間既經濟戰，中共需要大量而持續既外匯收入維持營運，而香港人離開除左擴大海外戰線既影響力外，走資亦對外匯枯竭既中共起到毀滅性既作用。同35+「攬炒十步」相似，香港人可以通過大量人口外逃作出公投，既一方面表達抵抗意志，另一方面直接削弱中共，逼使中共「發難」觸發東德式既鎖關，從而逼使西方必須準快因應人道問題將香港加入地緣角力既議程，介入香港，或作下一輪經濟制裁，甚至觸發戰爭解放「地理香港」作終極攬炒。