拒絕命運、改變時代

上一次 觀察左地緣政治與及印太戰略態勢既發展、嘗試提倡左五個「可行」。今次希望再由中共對西方軟性滲透既角度，再次嘗試拋磚引玉，尋找一套合適香港民族「立體對抗」中共全球擴張既戰略：

一、當下世界處身既時代背景

討論所有問題前，應該先簡單講解今日世界既狀態，否則我地任何既倡議只會流於空泛，亦容易被五毛既狡辯有機可承，產生大量EASY TARGET而從來唔對焦真正既敵人，浪費左行動者保貴既時間、心血同努力，最終通過時間消耗行動者既個人意志逼使其退場。因此清楚明瞭咁了解當下世界處身既時代背景 - 「全球民主退潮」、「獨裁者進化」與及「普世價值消亡」，咁呢個討論先會變得有意義同有價值。

最近總部設響瑞典斯德哥爾摩既國際民主及選舉協助研究所(IDEA)發表既研究報告就警告，依家威權主義正響世界每個角落蔓延，全球既民主狀況由2019年起就產生「明顯既惡化」。IDEA將160個國家根據50年黎既民主指標作評估，分為三大類，包括左：民主(包括倒退國家)、混合政府與及專制政權。

響過去既10年，民主倒退國家既數目上升左一倍，佔世界人口既四分之一。而由2016年到2020年，連續五年由民主轉向威權主義國家既數目都超過實現民主化既國家。

而IDEA進一步估算，到左2021年，民主國家只會剩低98個，另外有20個混合政府國家，包括括俄羅斯、摩洛哥同土耳其。47個專制政權國家包括中國、沙特阿拉伯、埃塞俄比亞與及伊朗。若果我地將民主倒退國家同混合、專制國家加埋，就佔左全球整體人口既七成，只有三成既人係仍然活響民主國家當中。

呢份報告明確咁展示左一個全球民主退潮既現象，佢亦將呢個現象歸納出四個主要既罪魁禍首，而當中我個人認為最重要既一點，係「專制國家之間互相學習模仿反民主行為」。繼上世紀90年代共產主義歷史終結之後，另一個意識形態集團已經誕生左。

一個新既「威權主義集團」正在向外擴張佢既版圖同野心，而香港係整個時代變遷過程入面既其中一個受害者，但呢個城市既偉大並唔在於佢係一個單純既悲劇，亦唔在於佢過去與及依家仍然保持物質上既發達，而係佢響呢個變遷入面無欣然接受呢一種改變，呢到既年輕人通過行動實踐左一種屬於「舊世界」既普世價值作出一套立體既抵抗，雖然一時間無辦法響本地取得成功，但仍然令世界覺醒喚起左一種對抗專制既道德力量。

二、普世價值既退讓與消亡

但道德力量終歸只係道德力量，上一次冷戰既主題係「資本主義同共產主義」陣營之間既對抗，佢代表既係一個對「私有財產、個人利益」擁有權誰屬問題既對抗，兩個唔同經濟體系既比拼。資本主義對抗共產主義仍然係建基於一種對「個人利益」/「國家利益」既自我保護，只係恰巧共產主義因為佢既體制或者領導層既墮落而無辦法避免走上獨裁管治既統治模式，因而形成左一種「自由對抗極權」既假象。呢場冷戰既根本，仍然係一場以「保障利益」為主導既對抗，而唔係單純「自由同專制」之間既角力。

當下「美國對抗中共」亦只係另一次超級強權面對另一個強權崛起產生威脅既反彈，一個「國家利益」保護既反制，而仍然未完全形成一個「自由陣營為左自由去對抗另一個對立意識形態」既整體概念，因此點到即止既「壓制、孤立、共存」仍然係西方陣營響新一場「冷戰」既主要策略，而唔係一場由價值、信念推動去「削弱、征服、打敗」邪惡陣營既戰役。

而上一次真正由價值、信念去推動一場對抗邪惡陣營既戰役，已經係「舊世界」大英帝國對抗納粹德國既第二次世界大戰。當時好多歷史悠久著名既國家、大國都因為追求短期利益，而選擇無視一個邪惡帝國既崛起，因為佢地一次又一次既退讓最終造成左一個不可挽回既災難。當時既納粹德國如日中天，甚至領導大英帝國既張伯倫、當時既英國皇室都曾經考慮投降或者同納粹合作，唯有邱吉爾一人為「正義事業」不斷既遊說、力排眾議、頑抗到底先成功激起左一股反抗邪惡陣營既浪潮。

2019年香港人為「正義事業」既頑抗，成功重新喚醒左一股道德力量，令西方陣營意識到一個強權既崛起，但香港人點樣進一步令中共與及佢既「獨裁者集團」站響自由民主陣營既對立面，令整個西方陣營形成一個對抗甚至打敗獨裁既浪潮，就正正係所有香港人響「光復香港」既過程入面，必須達成既歷史任務。否則當中共威脅被解除，香港只會係英勇但隨即被遺忘既「七武士」成為新冷戰既犧牲品，或者打敗ISIS後隨即被出賣既庫爾德，而唔係帶領自由陣營打敗極權，引領世界進入新時代既「邱吉爾」。

因此香港民族訂立整個國際戰略就必須觀察「獨裁者既進化」、了解現時民主陣營響「論述戰場」上既失卻，尋找正確既定位將「香港模式」成功既經驗推而廣之、並立體化咁擴展到全世界。

三、獨裁者既進化

我地好多時候都以為獨裁者一定好似一隻烏龜咁樣，類似蘇聯末期果種蠢、笨、遲頓咁既怪物，或者好似一部份由上世紀殘存落黎例如北朝鮮、土庫曼呢一類「失敗國家」。但其實呢幾個已經係過氣既獨裁者。新型既獨裁者並冇坐以待斃，佢地隨住世界既改變，舊規則既淘汰，佢地既策略亦有所改進。中共、俄羅斯甚至已經進化、改變到另外一個階段：

21世紀獨裁者既智慧，在於佢地深明二戰以黎「利益為上」既概念，雖然佢地實行既係專制，但由於佢地並無再企響「資本主義」既對立面上面，響雙方都尋求「利益」呢個「共同價值」既推動下，佢地用低調既姿態通過全球化既趨勢取得擴張同實施極權既資本同技術，同時又施予其它國家「利益」去獎勵人性貪婪既一面，令全世界響「利益」既驅使下選擇性咁無視佢地作下既種種惡行。

獨裁者會精心設計一套遠睇好似帶有權力互相抗衡既政治體系、佢地會將法規同迫害混為一談、佢地會強調自己既獨裁體制帶有充份既民主成份、佢地會建立數據展示佢地只係另一種追求人民幸福既手段、佢地會強調佢地唔係一個威脅而係你既伙伴、佢地唔會講自己奴役人民而會同你講價廉物美、佢唔會同你講軍國主義佢會同你講地區和平、佢地會用精準但狡猾既詞令去展示自己一直追求緊共同既「普世價值」。

因此獨裁者既唔笨拙，亦唔愚蠢，佢地睇準西方民主政權每每幾年就會進行既政權更替，通過軟性既手段進行跨世代滲透、將一套短期利益掛師既「新共同價值」推到極致影響上層政權既決策，令佢地對邪惡政權視若無睹；佢地又會入侵到當地既輿論系統，培養、孕育大量「新普世價值」既「偽議題」產生大量既內部矛盾，令當地人民既意志消耗響無謂既議題上；佢地會利用高科技響敵後散播一種邪惡愚蠢既反人類反智文化潮流，令邪惡政權既醜陋得以逃離眾人既視線，削弱整個西方陣營對「舊普世價值」既關注。

獨裁者會利用呢一種人造既思潮產生一套「民主無效化」論述，佢會強調民主既失敗、佢會強調民主帶黎既撕裂、佢會強調民主既混亂無序、佢會強調「中央集權」先係真正能夠為人民帶黎幸福既「高效率體制」，佢會強調獨裁係一種「進步」，佢會令所有人確信獨裁既「進步主義」先係世界既「唯一出路」。獨裁者會聯合起黎建立一個屬於佢地既「獨裁俱樂部」互相學習、支援，進一步鞏固佢地既權力、與此同時佢地又會一步一步咁誘導佢既潛在盟友加入「進步陣營」，逐部擴展佢既版圖形成「獨裁經濟圈」。

當「進步主義」勢力慢慢主動通過集團化成為一個新既世界浪潮，佢地會擁有資源唔再怕被制裁、佢地會擁有技術唔再怕被孤立、佢地會擁有武器、生產鏈既控制、國際組織既話語權令你進退失據、佢地會操控輿論向整個世界發動「混合戰爭」，以「非線性作戰」既方式兵不血刃地令世界逐步走向獨裁，直到「舊民主(劣幣)」完全被「進步主義(良幣)」驅逐為止。

四、看不見的「論述戰場」

上述內容香港人睇起上黎好似邏輯不通甚至匪夷所思，但呢種思潮同理念就響中共大外宣響「論述戰場」上既攻勢而普遍咁存在響西方既視野當中，更加被好多「進步主義者」視為一種人類發展既Alternative Option，好多人/組織/學者/財團/利益集團更加會將佢視為一種反對China Threat同China FUD既有力論據。

而中共響爭取國際「話語權」(Discourse Power)上面，並唔係一種單純而平面既遊說活動，佢實際上係一套完整、多向、多樣、立體、多維既整體戰略，目的就係去建立上述整個「民主無效化」與及「高效率體制」既論述，響「民主失敗、混亂、無序」既反思下、創造一個同時滿足「新共同價值 (利益)」與及聯結「新普世價值」既「進步國家」形象。

多向性

中共大外宣既多向，在於佢唔係一個單向既傳遞過程，亦唔係一個雙向既互動過程。而係一個無處不在既多向性引導。呢種引導唔係一種單純而線性既輿論攻防，而係一種包含左毛澤東「敵進我退、敵駐我擾、敵疲我打、敵退我追」戰略觀既輿論戰場、一種多角度主動開拓議題、觀點既非線性戰場。戰場可以係「體育」、可以係「氣候」、可以係「經濟」、可以係「歷史」，只要能夠建立「民主退潮」與及「進步主義」既論述，佢就可以無孔不入、無所不在，只要唔觸及獨裁既最高原則「中央集權」，佢就可以靈活自由地作出無限既變化。

多樣性

呢個多向性既戰場唔會只係侷限於一種型式，佢會用多樣而豐富既手段，可以聯同當地既統治者由上而下層層推進、亦可以誘導無既定立場、利益為上或者數字行先既國際公司、機構、商界、NGO、知識份子、公民社會響不知不覺間成為協助操控輿論既壓力團體、亦可以響敵後平鋪一種下克上既論述策反當地既民粹制造混亂，令當地政權政策傾側。中共明白，只要佢唔站響對方既對立面，呢個立體可以作出任何形式既變化，甚至可以借用敵方既「核心思想」進行微調，產生「輿論陷阱」聚集力量制造混亂，實施借力打力。

立體性

中共佢會響每一個枝節上面，都會建立大量既「接入點」，逐漸形成一條又一條統一而邏輯相同既訊息線索，當線索慢慢聯合起黎就會組成「論述」形成「面」，「事實」「本質」「因由」就會被呢種表面、但異口同聲、一致但新奇、狡猾、似是而非既演譯同講法所掩蓋、取代。當人不停接觸呢類「論述」並日積月累咁去叠加，就會形成腦海中「視覺化」既「立體」。最終呢個「立體」會成為你潛在既「認知」，變成邏輯思維既組成部份，響不知不覺間所有既決策、行動都會受呢個「認知」所引導而被左右，甚至倒戈。

多維性

呢個立體可以為唔同既時間、地域、空間、語言作出無限既變化，佢可以在地化用當地語言寫成報告文學、佢可以係一個數字化國際智庫報告、佢可以係一個視覺化既廣告、圖片、電影、佢可以係一個人權組織、教育機構、可以係一個前線記者、一個KOL、亦可以係一本權威既雜誌、或者民間既一個街頭活動、佢可以化身成互聯網上一個普通既User、或者一個普通既上班族。只要能夠將中共一條由一條既邏輯線索推廣叠加成唔同形態既論述，佢可以化成任何形式既形態，存在係任何一個角落、甚至令唔夠清醒既人受到「認知」既左右而成為佢散播既工具。

民主陣營之失卻

因此，中共呢套建立響胡錦濤年代既「國際線」既唔愚蠢，亦唔笨拙，相反佢非常靈活、完整咁活用各種手段建立左一套整體有利中共既邏輯「論述」。而2016年習近平吸納左俄羅斯戲劇家蘇爾科夫以兵不血刃併吞克里米亞既訊息戰之後，進一步將呢種原來係防守性既「大外宣」響物理戰場外面開拓左另一個更宏大既論述戰場，慢慢演變成今日呢種多向、多樣、立體、多維、既有防守功能、又能主動產生攻勢、制造敵後混亂既混合戰爭模式。

獨裁者陣營只要捉緊西方民主陣營「言論自由」既核心思想同時又「互相信任」既社會風氣，跨世代、跨地域、空間、載體無孔不入咁不斷響唔同既領域建立有利佢既「認知」，只要意志稍一鬆懈、思想唔夠慎密或者一時財迷心竅，就會被呢種惡意散報既「論述」所迷惑、動搖、同化、臣服，最終令世界陷入萬劫不復當中。

五、面對混合戰的「香港模式」

2019年「時代革命」面對中共既混合戰，響物理戰場外面，抗爭者建立左一套完整既「論述」。「光復香港，時代革命」睇落好簡單既八個字，承載左幾百萬人對「普世價值」既理解、演譯同追求，亦因此賦予左整個抗爭同行動既意義。

響追求「信仰」既路上面，我地進一步確立左「五大訴求，缺一不可」與及「香港獨立，唯一出路」既行動綱領，建立左清晰、明確既戰略目標，無辦法輕易咁被言語、利益、甚至武力所動搖同左右，即使勢孤力弱亦「決不虛作無聲」。

面對分化，我地確立左「和勇不分」
面對無賴，我地確立左「和平遊行是沒用的」
面對誣衊，我地確立左「沒有暴徒，祇有暴政」
面對孤立，我地確立左「齊上齊落」
面對無力，我地確立左「堅持先有希望」

面對一個又一個政權既打壓，我地建立左一個又一個既「論述」令抵抗既意志歷久不衰。雖然我地無槍同炮，但響價值既驅動同清晰既戰略目標底下，即使「無大台」，「手足」仍然能夠「兄弟爬山、各自努力」為「煲底之約」而奮鬥，為「光復香港」而拼命，響手無寸鐵下用我地既血同淚響物理戰場上將「信念」實踐，打左一場又一場震驚世界既戰役。

與此同時我地無局限自己響傳統既物理戰場上面，打左一場漂亮既資訊戰爭。我地明白傳媒紙媒、大氣電波早已淪陷得八八九九、我地就尋找狹峰擴張到社交網絡、地區連龍牆令抗爭入屋。

我地深明真相被系統抹殺，所以我就將抗爭現場視覺化、文本化、數字化投射到十八區既連龍牆、媒體、網路、甚至全世界令中共難堪、令中共多年黎建立既美好形象毀於一旦。我地深明唔能夠令中共一言堂，失去話語權，所以我地就實行全民思想武裝、揭破謊言、建立民間記者會同佢作出角力。我地明白呢場抗爭好可能係一場跨世代既抗爭，所以我地就將抗爭融入生活、建立經濟圈存續意志、化成音樂、文學、電影將戰鬥永久延續。

我地觀察形勢、展開討論、產生論述、建立共識、推動行動，亦因此每次都能夠因時制宜，產生對應既方案 —— 全因我地「明白」，因此我地「所以」。我地響不知不覺間成為左「持守的安那其」，以「如水」既形態，非線性咁尋找每一個可以作戰既戰場同窗口，緊扣抗爭既主題，吸納全球既抗爭智慧同中共作出全方位既角力。面對極權輾壓，我地可以暫時「見字飲水」靜候機會，但我地深明「堅持先有希望」決不臣服。

「論述」能夠蠱惑人心、削弱意志、消耗民氣；但同時「論述」亦能夠為行動賦予意義、令抵抗既意志歷久不衰，即使面對極權、國家機器既輾壓、即使面對無盡既黑暗仍然嘗試力挽狂難。

六、「國際戰線」立體化

正因為「Ideas are bulletproof」，中共意識到要打敗香港人，真正既戰場並唔係傳統既物理戰場上面。因此佢響物理戰場上重創香港人之後，就立即入侵、滲透、破壞整個建立「論述」既過程、系統同工具，令香港人一直主導既「話語權」逐漸消失。

佢打擊記者、收買傳媒令你無辦法觀察形勢；佢建立恐懼、接管香港電台、強關蘋果日報令輿論無辦法被產生；佢入侵TG、滲透連登，破壞討論，建立大量似是而非既邏輯、產生大量既偽議題，令論述能力整體減弱無辦法對準政權；佢原子化我地每一個人，令我地無辦法再建立共識，又散播一種傷春悲秋既氛圍，令我地陷於守勢無辦法再展開反擊。隨住時間既流逝，國家機器實施「冷藏行動」成功響論述戰場上輾壓左抗爭者，亦因此令「如水」抗爭「被凍結」。

香港戰線既巧妙在於佢一個完整而立體既混合抗爭，因此國際戰線響「光復香港」既志業上面，唔能夠只係停留響比較平面既壓力團體去遊說香港應該被拯救，海外香港應該延續「香港模式」響國際論述戰場上擊敗中共重新取得「話語權」。呢個國際論述既戰場，我地每一個海內外既手足都要成為民主既戲劇家、演奏家並思考以下三個問題：

(1) 如何「演譯」獨裁者真實既本質，令佢完全站響民主陣營既對立面
(2) 如何緊扣民主陣營既核心價值「闡述」獨裁者存在所帶黎既長期威脅
(3) 如何重構「確立」民主價值令佢重新成為世界既主旋律，賦予對抗意義

我地需要將國際戰線全面立體化重新確立「民主價值」，令獨裁政權既本質呈現，緊扣每一個細節產生相應論述，強調佢所帶黎既長期威脅，為打擊中共賦予意義，獲取當地民意既認同同支持，倡導整個世界對中共有所作為，而輸出「香港模式」同中共「大外宣」作出「論述」層面上既對抗，就係影響呢個民意平衡既關鍵。

論述鬥既唔係人數唔係錢，唔係單純量上面既對抗，只要我地能夠響質上作出針對性既打擊，用道理、真相自然能夠令獨裁既本質同威脅呈現，繼而推動行動既發展。香港公民社會係唔會響呢方面輸比任何大外宣，但首先我地要有同大外宣對抗、作戰既意志而唔係做一個單純既旁觀者。

七、五個互相扣連既「可行」

呢到我嘗試提出幾個「可行」，點樣將國際戰線「戰略立體化」，響強化並協助現有海外遊說團隊減低佢地工作壓力既同時，進一步開拓新既戰場同窗口：

一、建立情治組織，「阻截」滲透令民主退潮既思潮無法延伸

國際戰線唔能夠只係以香港作為作戰目標，因為中共既目標係滲透全世界形成「民主退潮」既論述。而「香港模式」既示範，已經令台灣、澳洲進入左資訊戰既階段。

但香港人可唔可以進一步協助未意識到問題既地區同中共大外宣作出對抗？香港人可唔可以建立屬於當地既情治單位阻截中共既輿論導向？可唔可以通過大數據分析當下議題是否受中共操控並警惕西方？可唔可以追查並建立滲透清單抽出並清除白蟻？可唔可以建立奶共清單令中共走狗身敗名裂失去民意支持？

要阻止「民主退潮」思潮既散播，重新令西方響迷惑下覺醒，香港人有必要輸出「香港模式」為全世界建立觀察中共「大外宣」既情治組織，並盡可能阻止滲透。否則隨住時間發展，白蟻策略只會令世界陷入另一個危機當中。

二、創造媒體、輿論網絡，全方位「演譯」獨裁者既真象

而響阻截滲透之外，我地要重新取得論述既主導權，將「說好中國故事」既謊言揭穿。我地要建立我地既媒體、輿論網絡持續不斷咁「呈現」獨裁者既真象，響中共既論述以外，掌握話語既主導權，為世界重構對獨裁者正確既「認知」。

我地要在地化香港人既網絡，可以先由比較被動既打對台開始，逐步主動建立、創造、爭奪屬於香港人掌控既接入點，簡單既一張文宣，一張Banner、社交媒體、甚至大氣電波，都可以成為載體，協助我地挑戰同逐步接管、控制每一條建立邏輯線索既路徑。佢話一國兩制，我地就講《時代革命》；佢話地區和平，我地就講軍國主義；佢要建立體育強國，我地就講舉國體制既殘暴；佢要建立氣候先峰，我地就強調佢先係最大既污染暴發戶；佢要建立價廉物美既世界工廠，我地就要揭穿城鄉奴役背後既不公。我地緊扣每一個細節產生相應論述，令「中國故事」無辦法再被延續，「呈現」獨裁者既真象。

因此我地唔能夠單純咁被動等待西方既報導同報告、我地要主動整合、強化呢個論述既網絡，將呢種論述同解說主動平鋪到整個世界，由防守既角色，變成攻守兼備既角色。

三、組成智庫，「闡述」獨裁者存在所帶黎既長期威脅

我地除左響論述戰場上要「破」解對方既演譯，呈現獨裁者既真像外，我地要逐步將對方既威脅量化、構建、並變成一種可見而立體既認知，逐步響輿論上將中共由「民主以外既選項」推向「民主既對立面」上面。

呢個過程除左要破，亦要立。我地要建立我地既智庫集思廣益，通過觀察、研究、尋根究底咁指出中共呢種數碼獨裁者帶黎既長期威脅。主動將呢種威脅視覺化、數字化、文本化成為一份又一份能夠被引用既「報告」，同西方既「主流價值」作出連結，響呈現中共威脅、有擊敗中共需要既同時、尋找並提供民主陣營響唔同領域上對抗中共既可行選項，逐步建立民主陣營論述戰場上解說既「武器」，令「利益」「經濟」唔能夠成為決策唯一既量度單位。

我地唔能夠只係以個別抗爭者既身份講述香港悲壯既故事，我地必須建立大量可以被任何人輕易引用、運用，情理兼備既「遊說武器」，爭取道德力量以外所有持份者既支持。

四、承先賢之志，燃革命之火，海內外共同「實踐」時代革命

更重要既係，香港戰線已經有一班用佢地身體、生命去明志既手足同殉道者，目的就係為呢場抗爭保留出口同火種，警醒香港同世界繼續抵抗落去。「唔願意被奴役既人，亦唔願意見到其它人被奴役」，我地唔能夠辜負左手足立下既志向，令呢一種「志」只係存在響監牢，凍結響香港，停滯響2019上面。

我地必須「承先賢之志，燃革命之火」響每一個論述戰場上以前赴後繼既身姿繼續戰鬥。由於我地每個人都只要有限既能力同時間，亦唔能夠將呢個訊息戰既重擔寄托響一小撮早期選擇左加入遊說戰線既手足身上，「生於亂世，有種責任」，我地每個人都必須響各自既崗位上盡己所能、互相協作、取長補短，響強化我地現有遊說戰線既同時，進一步立體化我地整個國際戰線，用「香港模式」協助甚至帶領民主陣營響論述戰場上抗擊中共。

我地今日可能無遊說團隊既脈絡，但只要我地有言論既自由，發聲既空間，我地就會有無限既論述可能；只要我地願意嘗試，就可以持續咁為「時代革命」打開新既窗口，因此我地要用我地既身體將呢種信仰實踐並盡可能咁表達出黎，將呢種價值同意志投射響每一個角落，成為文學、音樂、電影令佢成為一種思潮。

五、「確立」價值願景，令上述機能得以永續直到香港被解放

打敗中共，打敗獨裁者，光復香港，未必能夠響一時三刻就完成。拉長整個歷史既脈絡，你、我、所有既手足今日行緊嘅呢一段路，都可能只係歷史既中段，終點係喺好後好後面，甚至我地係唔會見到，即使佢最終會出現。

隨住時間既流逝，曾經被感召既道德力量會磨蝕、曾經被許下既諾言會被遺忘。當地緣政治既角力塵埃落定既時刻，被凍結失去價值失去光芒既香港亦會因此而被遺棄，因此我地唔應該令香港人既血同淚只係成為一張「角力既手牌」或者一個「政治議題」，我地必須要成為呢場角力當中既一個參與者，一個仍然站響對抗威權最前線既戰士，否則我地只會成為協助打敗ISIS既庫爾德同打敗山賊既七武士，而唔係打敗德國既大英帝國。

我地唔需要指示，我地需要既係一個好既論述；我地唔需要命令，我地需要既係一個交流同倡議既工具；我地唔需要領袖，我地需要既係每一個願意為自由付出既香港人；我地唔需要大台，我地需要既係建構一個追求自由既命運共同體；我地唔需要一個固定既形態，我地需要既係成為一個可以被觀察永遠站響對抗威權最前線既戰士 —— 我地需要既唔係「光復香港」，而係令每一個自由個體自願結合、互助、自治，為公義、民主、自由奮鬥同努力，被稱為「時代革命」既意識形態。

▲ 「電影可以紀錄時代，亦可改變時代」— 周冠威

八、總結 - 拒絕命運、改變時代

歷史往往就是如此。我們確信，新的(入侵)方法將會被採用，當我們看到敵人展現出各種獨創的惡意和創造性的侵略行為時，我們應當為這些新奇、野蠻、奸詐的陰謀與手法作出充份準備，沉穩應對。

本人完全相信，如果所有人都能善盡職責，如果沒有任何疏忽，如果作出最好的安排，那麼我們將再次證明我們有能力保衛我們的島嶼家園，渡過戰爭的風暴，並在暴政的威脅下存活下去。如果有必要的話，甚至可以長久地孤軍奮戰。但無論如何，我們首先需要有行動的意志。

大英帝國和法蘭西共和國，在彼此的正義事業和需求中緊密地扣合在一起，共同誓死捍衛故土，並像戰友一樣竭盡所能互相幫助。即使現在，歐洲大片領土和許多歷史悠久而著名的國家已經，或即將淪陷於蓋世太保和納粹可憎機器的控制之中，我們也絕不會輕言放棄或失敗。

我們要堅持到最後。我們將在法國作戰，我們將在海上作戰，我們將以越來越強大的信心和實力在空中作戰，我們將保衛我們的島嶼，不論代價如何。我們將在海灘上戰鬥，我們將在登陸地上戰鬥，我們將在田野和街道上戰鬥，我們將在山丘上戰鬥；我們決不投降！

即使這座島嶼或它的大部分地區被征服並陷入飢餓之中，那麼我們在海外的臣民，將在皇家艦隊的武裝護衛下，繼續戰鬥 —— 直到新世界在上帝認為合適的時刻，以其所有的力量，站出來拯救並解放這個舊世界！

《We shall fight on the beaches》— 邱吉爾