【德國巴符州選舉】我發現，呢幾日，我討厭政治…
德國巴符州地區選舉預測出爐，綠黨 Grünen 喺 Kretschmann 帶領下，肯定毫無懸念繼續成為領導州政府嘅政黨。
估唔到，十年前嘅政治局面，神推鬼㧬，竟然令到綠黨攻下第一個州長寶座，仲可以維持十年都仍然保持強勢，其實當中真係有好多估仔講。
其實，我本來都想講下州選舉，同大家玩下 Wahl-O-Mat 咁……
不過，唉……
十年前，我記得啱啱嚟德國，香港當時仲講緊五區公投嘅爭議，當時仍然係林公公做官，你話係咪咸豐年前嘅事啦。
其實嚟咗無耐，我就已經好羨慕德國人擁有嘅政治制度……綠黨點解可以上到位？其中一個好重要嘅因素就係 Stuttgart 21 嘅爭議（當然仲有福島助攻）。我記得當時我老婆收到封信，原來係州政府就 Stuttgart 21 搞公投，我望住張黃色嘅信封，心諗，如果香港嘅政治人物有咁醒就好囉！
係呀，真係天真過阿嬌，當時高鐵同菜園村嘅問題，我係覺得香港嘅政治架構唔夠好同啲人嘅政治智慧唔夠高，先至解決唔到個爭議……
今日食晚飯嘅時候，我老婆講中午投票，話依家肺炎都好，組織得好順暢。
佢投咩就無謂講，不過我其實都無咩同佢討論。唯一有講深入少少嘅係政黨對教育系統改革嘅睇法，因為呢樣嘢真係好影響小朋友將來。
德國一向都有中學分流嘅做法（Realschule, Hauptschule, Gymnasium），類似香港分 Band，但係依家越嚟越多人挑戰呢種分流嘅方式，提倡用綜合學校 Gesamtschule 去取代哂全部嘅中學。
我又唔講邊樣嘢好邊樣嘢唔好啦，要講又可以講一大篇。
雖然我話無同佢討論，但唔好誤會，我地其實會傾政治的，亦都清楚大家嘅政治取向，問題係，我發覺我依家真係想講句「我討厭政治」。
係，雖然唔理性，但係我真係討厭咗德國政治……可能誇張咗，或者咁講，有時候有心機，抽離得到嘅時候，可以講，但個人無咩心機，抽離唔到，就唔想睇呢邊啲政治討論。
望住香港人有 47 個人，都未真係選，淨係因為搞個初選就要受牢獄之災；人大投一次票就可以「優化」香港選舉制度；望住自己個 inbox 一路都出現問德國移民諮詢嘅 message……老實講，我真係唔想諗投票呢樣嘢。
投票呢樣嘢，對於香港人嚟講，即將會係幾咁遙遠？呢邊嘅人講緊嘅係唔知投邊個政黨好，懶係討論到好有火花要投呢個政黨嗰個政黨。
呢個星期三約咗黃台仰，搞一個 live 對話，之前同黃台仰傾嘅時候，就係話想講佢喺《如水》寫嘅文，主題就係講家園。講來未來嗰部分，其實就真係會諗……到底香港人，真係可以無拘無束咁自由投票嘅一日，幾時會來臨？
我知呢一日點都會嚟，但我諗唔到幾時。
我諗，一日未諗到，都會偶爾想講一聲「我討厭（德國）政治」。