停打 BioNTech，兩樣重點資訊
香港突然全面停打BioNTech。無用嘅政府固然係慢幾拍，始終未見出黎同公眾交代。香港人自然會擔心、緊張。係呢度，我好快補充大家會想知嘅兩點資訊比大家，一如既往，打唔打、打咩好，比大家再有全面資訊去決定。
（一）復星定係BioNTech生產？
根據BioNTech向美國財經雜誌Fortune透露，佢比中國（即係包括香港啦吓）嘅第一批貨 "first shiment"，會完全係德國生產。但由第二批貨起，將會比物料復星協助包裝，用佢地嘅講法，係 "fill and finish"。而又根據中國財新網嘅報導，復星同BioNTech協議好，係未來唔知幾時開始，將會係中國建立生產線，每年生產約兩億劑BNT疫苗。
而根據香港政府嘅公告，「第一批」BNT疫苗「從德國分兩班航班」到港，第一航班有58萬劑，第二航班有75萬劑。而現時已接種嘅BNT疫苗有15萬劑。
按以上資訊嘅整合，現時香港頭58萬劑BNT，可以相信係由德國全面生產。但第二航班到港嘅75萬劑，究竟係咪BNT口中嘅"first shipment"，定係由復星協助包裝嘅"second shipment"，係有可以懷疑嘅空間。香港政府就叫呢75萬劑做「從德國抵港」嘅「首批貨嘅第二航班」。信幾多，就交比大家自己決定。
但可以肯定嘅係，用完呢一百萬劑後，未來嘅批次，復星嘅角色只會愈黎愈多，由包裝，慢慢去到整劑疫苗嘅生產。
而今次出事呢一批210102批次，根據Bloomberg報導，同時包括已送往香港同澳門嘅疫苗。實際嘅「瑕疵」又幾多，如何肯定如澳門政府所講咁唔影響安全，而犯錯嘅係BioNTech定復星，一切都要等更多資訊出現了。
有趣嘅係，過去科興疫苗安全性有疑慮時，政府都堅拒叫停。而今次「瑕疵」，即使澳門政府話左唔影響安全，香港政府都一朝早迅速叫停所有接種。咁講，有任何不確定因素時，先叫停，係正確做法；但今次做啱，更加反映過去嘅不當同魯莽。
（二）打左第一劑點算？
現時數據，淨係打一劑，都有一定保護效力。根據係頂級國術期刊NEJM刊登，以色列六十萬人嘅數據，打左第一劑未打第二劑後21-27日，整體預防武肺有效率達60%，都仲高過科興，而預防因武肺死亡嘅有效率亦達84%。當然，長遠效能冇確切數據。
咁兩劑隔耐啲打又得唔得？得。
歐盟同加拿大當局收到嘅疫苗數據，都顯示BNT兩劑可以相隔最多42日打，呢個亦係美國疾控中心嘅建議。
至於相隔多於42日打BNT，現時未有數據。但大家可以參考另一隻疫苗，AstraZeneca嘅數據，將兩劑相隔多於三個月去打，有效率比相隔6星期去打更高。
—
不厭其煩補充，每隻疫苗，同每隻藥一樣，都有佢嘅副作用，常見嘅痛、紅腫絕對會有，罕見啲嘅如嚴重過敏，亦一定會有。接種疫苗後死亡事件，亦會出現，可能係唔關事，亦當然有可能唔關事，所以我上一個Post都特別強調大家可以去睇下BNT嘅試驗報告，有提及幾萬人中，有兩宗接種疫苗後死亡。
我只會將所有數據攞哂出黎，整合埋，比大家自己用腦去分析，去決定。每個人打唔打疫苗係一個好複雜、多角度考慮，當中應該有嘅討論，唔係互鬧一句「熱狗」、一句「疫苗撚」就可以解釋清楚。
面對世界疫情，政府無能、專家失信，只會更香港人百上加斤。但公共衛生資訊嘅傳遞始終要有人做，唔可以比大家收到嘅資訊淪為一堆假新聞、謾罵。飾演最激進角色周街鬧人，圍爐取暖漠視呢個世界嘅現況好簡單，但我相信香港人值得有更加完整全面嘅資訊，呢個係我會繼續寫呢啲吃力不討好嘅文嘅原因。
BNT162b2 mRNA Covid-19 Vaccine in a Nationwide Mass Vaccination Setting