一個正方形 Logo ，用三年時間減去四隻角，顏色不變，比例不變，字體不變，傳聞收費二百萬人仔，大約港幣二百四十萬。

項目公佈之後，幾乎全中國大江南北包括粵港澳湛由設計界廣告界至到平民百姓男界女界都熱烈討論得甚囂塵上 : 貴唔貴？值唔值？抵唔抵？

先講貴唔貴，設計者乃係日藉設計師 原研哉 Kenya Hara，日本設計中心（NIPPON DESIGN CENTER, NDC）總設計師，設計過冬季奧運會，萬國博覽會宣傳品，余市威士忌包裝等等，亦係無印良品嘅藝術總監，先後喺東京、巴黎、米蘭、倫敦同埋北京上海等地舉行藝術展覽，出過好幾本關於設計，關於藝術，關於生活概念嘅書，當然亦攞過好多獎。在日本同世界上嘅設計同藝術範疇都享負勝名。以呢個金漆招牌收二百萬人仔設計一個 CI 貴唔貴可以話見仁見智，但我做學師時期嘅 198幾年，大師 Henry Steiner 設計匯豐銀行嘅 CI 傳說收費一百五十萬港幣，嗰陣時係三十幾年前喎！舊年喺某塲合上，有人問大師中嘅大師 Alan Chan 陳幼堅先生設計一個 Logo 大約收幾多錢？Alan  不慌不忙氣定神閑咁先糾正問題，佢話我唔係做 Logo，我係做Branding 同 Corporate Identity，然後無正面回答收費，只係 Quote 佢做某個品牌收費大約多少多少，數字係今次「唔愛角」項目嘅兩陪幾！所以貴唔貴，如果以品牌嘅地位，原研哉 嘅地位，唔貴。

值唔值同抵唔抵？據原研哉解釋，小米新Logo創意源自「科技越是進步，就越接近生命的形態」嘅意思，因此佢提出「Alive生命感」設計理念以回應小米嘅企業文化云云。

先唔評論同 Buy 唔 Buy 呢套理論，但整個項目用咗三年去做，一個 Re-Branding 或者 CI 項目用三年去做可以算係幾長下，當然三年做嘅必然唔止係 Logo 咁少，應該包括 CI 同後面嘅整套創作，但做足三年必定有特別原因。原因之一可能係老細，小米嘅老細 雷軍，不管你鍾唔鍾意佢嘅產品佢嘅設計，雷軍從最初創立金山軟件到創立小米再到最近宣佈進軍智能電動車行業，每次都以佢嘅超強自信同霸氣話題不絕，” 造車需要大量資金，但小米有的是錢！” 。講得出呢句豪言壯語，其人自信與自負可想而知。

我記得好多年前有人訪問當年香港廣告圈大名鼎鼎，成就前無古人嘅 Mike Chu 朱家鼎先生，點樣可以做一個出色嘅好創作好廣告，Mike Chu 嘅答案一矢中的意簡言深，佢話一定要有一個好客戶先有好廣告，否則唔會有傑出嘅創作面世！世有伯樂然後有千里馬，千里馬常有而伯樂不常見，再簡單啲，即係要阿客戶識貨。因為好嘅創作必定係破格同唔會因循，否則幾叻幾巴閉嘅創作人都綁手綁腳無計可施。

大部份嘅廣告人設計師都會有過大量經驗，出咗九九八十一個創意，改咗七七四十九次，最後負責嘅甲方會同你講，話其實我哋好鐘意好欣賞好深愛你哋嘅設計，不過大大大老闆話想咁咁咁，再咁咁咁改少少就 Very Good 嘞，希望你明白啦！

唔愛四隻角二百四十萬港幣，每隻六十萬，抵唔抵？值唔值？

我又諗起另一位廣告圈前輩 Jimmy Lam 老爺林俊明講過嗰句至理名言 : 創意無真理，只有歡喜唔歡喜！

但今次起碼收足宣傳效果。