如無意外，呢個會係「No Stake醫學生」最後一段文字。平時好少講自己嘅嘢，今日藉最後嘅機會同大家分享下。

—

從小學起，中文就係我最鐘意嘅科目之一，特別係作文，亦都發過做作家嘅夢。但輾轉入到大學入左醫科，就再冇機會係中文堂爬格仔。於是打從一年級起，就一直想開一個Facebook專頁寫作。

細個嘅我會睇區樂民醫生嘅著作，大個左亦會睇平凡醫學生日常、睇Dr Ray。我發現醫者係幸運嘅。每日可以窺探黎至五湖四海嘅人嘅生活，見證一齣齣生離死別嘅戲碼。睇病人、睇人生、睇社會、睇世界，都會搵到另一個角度。

於是我想如此寫作，用一個準醫者嘅目光，去記敍呢個世界。

大家好鐘意講初心，但如果問我想開專頁寫作嘅初心，大概係寫人物嘅故事，再蜻蜓點水，提一提社會嘅百態，就咁多。從小學以黎，我就喜歡記敍、喜歡抒情。寫議論文，多數老師會比高分，但我其實好唔鐘意。

學業原因又好乜都好，寫作嘅諗法一直停係諗法，直到二零一九。呢個世界，原來可以咁壞，原來咁需要人發聲。本身就一直想開專頁寫作嘅我，又再多一個寫作嘅理由，終於點起心肝執筆，記敍呢一個荒誕怪奇嘅世代。

諗緊個名叫咩之時，林鄭話示威嘅巿民都係”no stake in society”，無建設無地位。但我知道呢個唔係事實。我身處係人地口中「神科」嘅港大醫科，我知道我身邊嘅同學、前輩，好多建設香港嘅精英，都係二零一九年嘅仲夏係街頭流過淚與汗。呢個名諗返其實都幾幼稚，但我就係想鬥氣地反諷，想比人知，爭取民主自由嘅香港人，唔係高官眼中有破壞冇建設嘅廢物，而係有最優秀嘅人才。

就出現左「No Stake醫學生」呢個身份。

—

一直以黎，每次有朋友叫我做「KOL」，我係徹底拒絕的。因為，我討厭政治，或者至少，我討厭寫作政治。

政治，唔係要寫，更加係要係日常生活中用行動實踐。而要係每日嘅現實生活中面對呢個時代嘅政治，已經叫人筋疲力盡。我討厭再日日執筆，重覆又重覆，去控訴點解呢個世界咁多不公義。寫作只不過係一種吶喊，其實係好無力嘅一件事。就算有幾千個Like，我亦唔會睇得到世界因而有任何改變。日常已經夠累了，仲要係寫作過程中再一次直視荒謬同絕望嘅種種，去搵一個方法，為大家燃點自己都未必搵到嘅希望，再同各種少不免嘅自我審查纏鬥，其實唔易。又再者，我始終係一個讀醫學、讀科學嘅人，唔係讀社科、政治出身，寫得多社政，總覺得自己欺世盜名。

一個本身只係想寫人文故事、最討厭寫議論文、寫社政嘅我，卻不知不覺間，變成左大家眼中嘅「KOL」。

的確，呢一年幾，我寫好多評論、議論，其實卻只係因為生於亂世，有種責任。

因緣際會，呢個專頁愈黎愈多人睇，接觸到嘅愈黎愈廣。呢個時候我問自己，我有咁嘅幸運，有一個咁嘅平台，係咪要善用呢一點去做更多呢？呢個城巿，需要我用呢個平台，去做啲咩呢？比起講故事，我有冇更加重要嘅訊息可以傳遞比呢一班睇到我寫嘢嘅香港人呢？

於是我寫醫療、我寫公共衞生、我寫本地文化、或者間中亦會寫所謂「政治」。

我唔需要人云亦云地呃Like，亦唔需要諗點樣將呢個專頁轉化為收入或者選票。每一篇文，我問自己，有啲咩新嘅資訊新嘅觀點我可以比到香港人，有咩獨特嘅切入點可以喚醒到大家嘅關注，同埋我希望香港人睇完我寫嘅嘢，會有咩改變。

於是，我目標做嘅嘢，由寫故事，變成以上種種。由記敍社會，變成為呢個社會做多一步。

就成為左大家而家認識嘅呢個「No Stake醫學生」。

—

開始寫作嘅初期，我成日同朋友講，我想有日出書，叫做圓我細個一個寫作夢。我見到師姐平凡醫學生日常、師兄Dr Who出到書，都有幻想過自己可以。但寫左幾個月，我望一望自己寫嘅嘢：哈，唔使諗啦。但無論如何，我覺得自己需要寫呢啲；或者話，香港應該要有人寫呢啲。於是我一直地寫作、整圖、搵資料、諗角度，直到今日。

係二零二一嘅香港做一個dissident，注定要面對各種壓力；而當中大部份，恐怕難以向外人道，又或者根本微不足道。無論如何，今日我都算能無愧於心地同自己講一句，我盡咗力，做咗我所相信應做嘅事，亦係時候放低「No Stake醫學生」呢個身份了。

—

我幾時都話，再艱難嘅時刻，回望二零一九，就係我行落去嘅動力同指路明燈。

若水之志。

放低呢個身份後，我仍然會行落去，為香港努力、為香港人努力。呢個係我對每一個同我講過加油嘅讀者嘅承諾、更係我對自己嘅承諾。

—

每一篇文寫完，我都問自己，我寫嚟做乜，想人睇完攞到啲乜。

而我可以講，呢篇係最垃圾嘅一篇，寫完都唔知寫黎為乜，我都唔知大家哂時間睇左啲乜LOL。

或者呢年幾以黎，我寫左太多論述，諗得太多太多。去到最後嘅今日，我只想放低一切嘅考慮，記敍我所想記敍的，「No Stake醫學生」嘅一段旅程。就此謝過。

二零二一年嘅香港，係一個容不下KOL嘅年代，但我更相信，呢個係一個唔再需要KOL嘅年代。憑藉不滅嘅勇氣與智慧，每個香港人都可以做自己嘅Opinion Leader，搵到自己應該要做嘅事、應該要行嘅路。

我哋會在路上重聚。

 

作者 Facebook