【文：Sharon】

雖然欣賞街道文化，但條路咁窄，咁多個人一齊喺度排隊，落大雨同埋颳風都真係幾可怕。除此之外，仲有以下呢啲問題：

裕民坊有四條小巴隊，連住三條馬路。過馬路嘅人同埋排隊嘅人之間，係有一種默契，互相讓路。但大家汗流浹背，逼埋一齊，並唔係一件賞心悅目嘅事。

其二，一眾司機要如廁時，想搵個公廁都無。佢哋為咗方便，就會喺一啲陰暗嘅住宅出入位小解。所以點解後面排紅 Van 嗰度可以又臭，又多曱甴、老鼠，因為冇人會處理嗰度嘅衛生情況。

要一個食飯嘅地方呢？以前有個公園喺大快活側邊，叫做有個休憩空間，不過就坐滿晒賭馬、賭象棋嘅阿伯，同埋有啲鳳姐，不太方便。司機都會泊埋架車喺入面食，十分孤獨。

食飯問題亦衍生出路面問題。司機泊車食飯，貨車上落貨，加上條街又窄，造成一街亂泊。呢個時間塞住條路，途人焗住行車隙，險象環生。而筆者就試過喺輔仁街出過交通意外， 正正就係俾兩架車夾住。尤其是觀塘係一個又窮又老化嘅地方，有好多老人家拾荒維生，推住車仔亂過馬路，更加混亂。

呢個係一個規劃問題，交通意外就必然會發生㗎。成個觀塘道而家啲交通，只係越嚟越亂。例如為咗泊入去 APM 個停車場，成日都塞住條觀塘道。都仲未講秀茂坪個七公頃嚟緊嘅公營房屋，啲人全部都要落觀塘同藍田先至出到去外面。而家淨係安達寶達同上秀茂坪，已經塞到喊。但條路就得咁多，政府都仲未有配套，就塞晒啲窮人住喺同一個偏僻山頭。

講呢一連串問題，唔係想吹捧話商場好好。琴日經過見到都好傷心，因為成個童年同青春期係觀塘，而家變咗「豪宅」，根據已經解散嘅香港眾志查核，買入嘅好多仲係中聯辦，幾咁諷刺！而且商場嘅交通樞紐，處理唔到廢氣嘅問題，我搭開嘅小巴仲要行返上斜，完全唔想入去搭。我冇諗過要入呢個商場買任何嘢，睇怕入到去都會好似入囍帖街咁，又嬲又無奈又傷心。

講咁多嘢唔係想兩邊各打五十大板，純粹想抗衡下而家喺 Facebook 見到吹捧裕民坊現狀嘅聲音。希望係大家一片謾罵中，分享多少少自己嘅觀察。

諗起之前攞所謂建築界奧斯卡獎嘅兩位建築師 Anne Lacaton 同Jean Philippe Vassal ，佢哋不遷不拆咁樣去改造房屋。如果可以留低返社區網絡，同時改善生活質素，就係最好嘅結果。起碼大家都會想保留街道文化，但不包括周圍都係小便嘅裕民坊。而我最希望嘅係，保留到繼續係人人熙來攘往、好多細舖頭、好多唔同種族文化特色嘅裕民坊。最緊要就係有補鞋同埋修理鐘錶嘅小販，又有二手舖頭，唔使下下都淨係去買新嘢。

可惜香港一直冇民主自由，市建局就係一間賺錢嘅公司，不停講大話，有時又扮自己係政府去收樓，最後賺到嘅錢就高層同班地產霸權分享。呢個應該係謾罵之中嘅重點。所謂市建局以人為本，就係以富人為本，窮人可以去死。將來咁多高樓大廈，但香港人又已經走到七七八八，嗰啲空置嘅地方，新香港人又用唔用得晒？每次重建就扼殺一個地方嘅記憶，囍帖街、波鞋街、碼頭、觀塘⋯⋯多到數唔晒。打完呢篇野，希望留住我今日嘅睇法，將來再睇返。我哋唔可以選擇自己忘記啲咩，但起碼我哋可以決定自己記住啲咩。今日政權係呢個情況，每人做多少少，積埋積埋就好多。