【Karfreitag】講德國「限舞令」，講到點起魚肉
【耶穌受難節】寫緊呢篇文嘅時候，仲係四月二日午夜之前，所以都仲係喺 Karfreitag。
Karfreitag，直接翻譯叫「受難星期五」，中文翻譯做「耶穌受難節」似乎最啱聽。
淨係聽個名，都知道關耶教事啦……呢日係用嚟紀念耶穌被釘十字架的，而德國係有超過一半嘅人口屬於天主教徒或者係新教徒。所以呢一日，可以話係德國人成年入面最需要「受戒」嘅一日，雖然係假期，但係唔準你慶祝。
我要慶祝，你吹咩！
咁你小心啲，一嚟啲教徒可能會仇視你，二嚟你開心到跳舞的話，係會畀人拉的！
難以置信：呢一日，係法例規定，連跳舞都會犯法的！德國法例真係寫到明特定日子有 Tanzverbot「限舞令」，違者可被罰款，喺拜仁州甚至可以罰成一萬歐！跳隻舞，分分鐘跌幾皮，都咪話唔癲！
呢個禁令，make 唔 make sense，我答你唔到，德國好多人都有討論，Tagesschau 都有討論過。
呢啲紀念齋戒嘅日子，當然唔可以過份享受，味覺上都要保持清淡。所以，另外一個大家喺德國應該守嘅傳統係，呢一日唔好買肉，唔好食肉。
……所以德國人會選擇食魚。
係，「大魚」無問題，唔「大肉」就可以。唔好問我點解。
魚肉係唔係肉？呢個問題我唔知點答你好。
為咗緊貼傳統，我都真係買咗條德國人最愛嘅鱒魚 Forelle 返嚟食。本來我有魚牌，可以自己釣，但呢個活動真係太過奢侈（時間上）。
正常就應該成條食的，但係我今次想起哂啲肉出嚟，容易啲分俾仔仔食。Forelle 係多骨的，但係如果識起肉，其實都唔會太多骨黐喺啲肉度。想知點起，大家可以睇睇片。