【文：香港流行文化愛好者】

汲取《全民造星》第一、二季既經驗，viutv 推出咗《囝囝女女 730》，比造星3 50 強參賽者有更多亮相機會，保持佢地既熱度，可以話係一個好好既嘗試，可惜既係出嚟既效果唔算太好，個節目討論度唔高，而依篇文我就想講吓依個節目做到既效果同埋可以改善既地方。

囝囝女女 730 最大既成效，係維持到造星3 參賽者既討論度，同埋加深觀眾對佢地既認識。畢竟喺造星入面，每個人既鏡頭都唔會太多，有啲參賽者更加因為比較早淘汰而令觀眾對佢地無咩印象，依個節目正正比到一個平台佢地表現自己，不論係同歌手或者其他參賽者合唱，甚至係跳舞同演短劇，都可以比觀眾睇到更多佢地既才能。而清談環節就可以睇到依班囝囝女女既性格同談吐，日後 viutv 既綜藝同劇集都可以更容易比到一個位置佢地。從近日依班參賽者有大大小小既廣告可以證明佢地既熱度未減。而作為一個恆常節目，囝囝女女 730 都有一定既睇頭，例如參賽者間中會有好正既表演，由改歌詞既 cover 到歌手 medley，近期仲有音樂劇等等既新元素，作為食飯時間既節目算係好適合。

不過我認為依個節目有唔少位係需要改善。最大既問題就係有唔少集數都幾悶，原因有幾個，首先係參賽者經驗唔夠，特別係傾計環節，好多時佢地講完自己既睇法又無人接到，deadair 之後要靠主持接返，一係就突然講咗另一個話題，觀眾睇落就會覺得無咩內容，有時訪問嘉賓既時候仲會有啲尷尬既場面，往往要靠主持補救。而表演方面都比較單調，好多時都係合唱一首歌，但係有唔少囝囝女女都唔太擅長唱歌，又或者佢地既準備唔夠，所以好多表演都好普通，無咩睇頭，成個節目因為咁變到有啲兩頭唔到岸，歌又無其他音樂節目咁好，搞笑又唔夠其他真人 show 嚟，定位變到好矇糊，不過近期開始加入更多新元素，我覺得絕對係一個正確既方向。

如果想改善依個節目，我認為每集既內容可以拍長少少，特別係傾計同訪問既環節，咁就算有 deadair 或者內容比較悶既時候都可以靠剪接補救。再者，拍攝前如果可以更清楚咁溝通好會講既內容同比既反應，再聽吓主持或者幕後意見，咁真正拍個時應該可以減少悶場，節目都會更加流暢。

雖然依個節目有唔少不足，不過對一班經驗唔多既藝人嚟講其實好正常。亦正正反映咗 viutv 願意比機會佢地發揮，汲取更多幕前經驗，長遠而言對電視台同依班囝囝女女都係好事。作為觀眾都好樂意見到佢地作出依個嘗試，為香港既電視行業注入新元素。而我都希望 viutv 可以保持依種大擔嘗試既精神，未來製作更多有質素既節目比香港觀眾。

作者簡介：一個鐘意香港流行文化既後生仔，得閒會寫吓文用大眾既角度講吓廣東歌、香港既電視節目同電影，希望未來有多啲香港人留意香港流行文化。Facebook Page / Medium