第一次聽 Rubberband，我記得係《一早地下鐵》，嗰陣時好迷 903，佢地成日播。處身於無 Spotify 嘅年代，電台 DJ 揀嘅歌好大程度就決定咗一個人嘅音樂口味。

猶記得，嗰陣啲人討論 Rubberband，係因為泥鯭同林狗好似樣，似樣到佢地一齊做咗隻《夾硬泥》。

真正鐘意 Rubberband，應該係一個出國嘅暑假，嗰陣時冇廣東話聽唔係好習慣，就日日播住《Beaming》同 《connected》，最鍾意《夏令時間》同《細街杯》：《夏令時間》係因為覺得好Sweet，送咗俾當時嘅女朋友；而《細街杯》就係因為竟然會有首歌講流浪漢世界杯，好過癮。

到 2018 年，當年叱吒我最喜愛組合仍然係 Supper Moment 第一次去九展聽 Rubberband 音樂會，聽到「Dedicated To…」嗰句「靈魂熱了」嗰陣，不自覺就眼眶紅了。Rubberband 嘅 live 有種好純粹，好正面嘅力量，嗰種正面唔係嗰種「你一定得㗎！」嘅鼓勵，亦唔係青春追夢嘅熱血，而係即使你幾無助惘然都好，佢地嘅歌都會陪住你。

今次 Ciao 音樂會的感受，比過往每一次紅館音樂會都要強烈，正如演唱會的主題 Ciao 一樣，今日說再見，以後要再見已不容易，有人隔著牢竉，有人隔著海洋，聚散已成常態。好似 Ciao 今次嘅樂手安排咁，走吓一個，走吓一個，到最後就剩番一個人。然而，Rubberband 好像也在說，即使走剩幾多個也好，最後都會再次聚首，又或是只要哼著同樣的音樂，人與人的連結便猶在。

而今次的 Rubberband 也更加直白了，其實話沒有講太多，或者也無需要再多說。從音樂會的主題，到在樂曲的鋪排上（特別是《堅彌地城》到《倒行詩》那一段），要說的，都已經在音樂裡面了。若要硬要挑剔，那就是香港人早已不能倒行，回到一切尚待爆發之際，那個曾俊華去看 Rubberband 會讓人有所期許的年代。

唱完《睜開眼》後，六號說：「呢首歌已經愈嚟愈難唱落去，但係每一次仲可以唱，我地都會堅持唱落去。」可能再過兩年，Rubberband 已不能在香港開騷，或者呢唔到呢首歌，又或者某些歌在時代跟前都顯得太蒼白。不管如何，在紅線每日變化的時代，即便是曖昧的流行文化，也難保有一天會被政權盯上。於黨媒而言，單單是與數千人一同身處紅館，一同喊著「衝出這裏 憑我身軀」，已經是反動的證據吧。世上有些事，可能真係只得這次。

Rubberband 的音樂能代表香港人唔係因為佢地好「黃」，早在「黃」這形容詞出現前，佢地已經紮根香港，喺地方的衰亡與破落嘅過程中，為城市譜出配樂。佢地嘅音樂從不否定個體嘅力量，因為每道微小都有其用處，集合起來或能敵崩壞。在晦暗的日子裡，香港人或再難以口號互相呼應，但依靠著這些盛載著共同感受的標記，或許都能獲得一些力量，繼續前進。

 

（標題為編輯所擬）