打針，係鬥長命要做嘅其中一件事

1. 我兩日前打了第二針 BioNTech，答應過大家 update 反應，呢度跟進返。

2. 第二針反應勁過第一針好多。第二針是早上打的，中午開始腳步浮，下午開始針口痛。第二日朝早開始關節痛，好似俾人打一身咁，之後全日瞓覺。經驗是第 24 個鐘至第 36 個鐘最辛苦，兩日後開始復原。

3. 建議大家打完第二針要預一日俾自己休息。嚴重要求政府規定憑針卡可獲一日有薪假期。好多勞工階層手停口停，你要俾佢哋休息，唔講得笑。

4. 辛苦，但仍然打。都係嗰句，保護身邊人。呢隻病有好長潛伏期，如果我自己中咗，唔知，然後返屋企食飯時傳咗俾長輩，呢世過意唔去。趁仲有歐洲貨，打。

5. 辛苦程度在預期之內。畢竟美國已經打咗過億針，每日打緊三百萬針，有極大量臨床副作用數據。當地人好多經驗分享，網上睇好多，同我基本一樣。畢竟已經有過億針先頭部隊，所以我完全冇擔心過。

6. 唔知點解呢排周圍有人話隻病好少事，「弱流感之嘛」，然後叫人唔洗打針。我明明記得同一堆說話疫情開始時啲微信谷都係咁傳，好多香港人仲笑佢地咁白痴，唔知驚。點知全世界死咗二百幾萬人之後，反而到香港人用「弱流感之嘛」為理由叫人唔打針……搞乜？

7. 又有人話打針就等如放棄不合作運動，我搲哂頭。唔係政府叫你去東你就只可以去西，咁先叫不合作。冇咁懶。唔通政府叫你煮熟啲豬肉先好食，你就特登日日表演食生豬肉咩。

8. 至於變種病毒，研究顯示 BioNTech 係防到變種病毒嘅。咁會唔會有再新嘅變種？變種係響傳染嘅時候發生嘅，你防止佢傳染，佢咪冇得變種囉。唔打針嘅原因竟然係等佢下次變種先？我搲哂頭。

9. 同理，又有啲人話，香港都冇疫情，如果日日一千單咪打囉……喂，打針就係要避免有朝一日變成日日一千單嘛，點解會調返轉頭嚟講，我又搲哂頭。

10. 香港人好愛香港。愛香港，就要鬥長命。打針，係鬥長命要做嘅其中一件事。正如飲水，坐直。

11. 打完針，計劃之後晚晚去黃店堂食。之前唔敢出街消費，要補返！

（標題為編輯所擬）