惡搞和危害國家安全
曾志偉同首席創意藍，呢幾個月度咗啲咩出嚟呢？上次搵人惡搞姜濤，結果畀人鬧爆，今次又惡搞咩呢？
我哋先要清楚咩係惡搞。惡搞不外乎兩種：
(1) 惡搞返明星，玩個搞笑版出嚟，因為大家都係娛樂圈，搞得好，互相提高咗知名度，就好似以前盧海鵬式嘅惡搞。呢一招就係上次扮姜濤，咁點解結果瀨晒嘢，因為由TVB去惡搞人，犯咗以下第二點。
(2) 惡搞社會乞人憎嘅人，特別係掌權嘅人。所有棟篤笑都係呢個套路。頭條新聞惡搞警察，點解咁受歡迎？唔使講啦！你試吓惡搞吓啲弱勢，例如入獄嘅小朋友、患過肺炎嘅人，係一定有反效果。所以，TVB本身就係社會乞人憎嘅機構，在娛樂圈仍然叫財雄勢大，由佢去惡搞一個新電視台捧出嚟嘅當紅新人，必然有反效果，令人生厭。
同樣道理，你今晚惡搞袁國勇和張竹君，必然會令很多人反感。袁國勇一直表現專業，由堅持中國人食蝙蝠導致武肺，再講到打疫苗，識read嘅一定read到；至於張竹君，同樣一直保持專業，沒有予人偏幫政府嘅感覺，而且人哋老公病逝不久，佢係一邊照顧病夫一邊應付疫情，大家都蒙在鼓裏。依家你為咗搶收視，不惜惡搞佢哋，唔好話好唔好笑，成件事就好惹人反感。
你唯一做對嘅，就係搵咗個民望長期極低嘅政治人物嚟惡搞。但係，好像頭條新聞一樣，王喜惡搞警察即使爆晒收視，贏盡民心，但最後個節目有咩下場呢？香港是一個崇尚公平嘅社會，頭條新聞腰斬，TVB也應該夭折，不能讓我們特首的尊嚴有絲毫損害。
過幾天的四月十五日，正是全民國家安全教育日，希望大家做個良好市民，舉報危害國家安全的廣播機構。