政府今日（12 日）公布稱為「疫苗氣泡」的措施，明言未來放寬社交距離的計劃，將與接種疫苗掛勾，如食肆將劃出「Clean Zone」，只接待接種了疫苗的客人，亦會強制使用「安心出行」（見另稿）。特首林鄭月娥更表示，為免市民把檢測代替打疫苗，將取消「派樽仔」等自願檢測措施。有專科醫生批評政府決策不合理，甚至擔憂會因政府誤判形勢，令本港再出現爆發。有公共衞生學者則認為，為完成接種疫苗的人放寬措施，可能令市民出現「錯誤的安全感」，帶來反效果。醫護工會便斥政府以防疫為名強推「安心出行」，與之前自願使用的說法不一，是「圖窮匕現」。

梁子超：有機會「清零」先嚟放棄「願檢盡檢」？

「我唔知佢哋（政府）係咪討論得清楚。」呼級系統科專科醫生梁子超指，對政府是次措施感到「不易理解」，對於政府有意取消「願檢盡檢」的免費自願檢測措施，如「派樽仔」，他直指「不合理」，「打疫苗同派樽仔有咩關係，你自己將兩樣嘢對等咗，根本係風馬牛不相及。」梁子超警告，若為催谷打疫苗而放棄本港一向賴以防疫的政策，可能會造成新一波爆發，「到時可能香港會再被編為中或高風險地區，令我哋經濟民生再受打擊。」

特首林鄭月娥今日在介紹「疫苗氣泡」時，提到不希望市民把檢測代替打針，故取消自願性免費檢測。梁子超表明反對，指疫苗對防止社區傳播仍有局限，「智利好明顯，17% 人打咗兩針，疫情而家仲係歷史高位。」

他指，香港的情況，一直依靠「願檢盡檢」去識別高風險人士，「取消願檢盡檢係極危險，等如防疫斷單臂。」梁子超坦言無法理解政府的理據，「你話用嚟慳錢就唔知啦。但呢啲唔慳得，慳咗少少，到時如果有爆發，更加影響到經濟民生…而家先開始有機會清零，你呢個時間放棄。」

單靠引誘、強逼無法增疫苗接種率

他又指，政府不應以為可單憑引誘，或強逼令市民接種疫苗，「想令疫苗覆蓋率好啲，就要清除市民對疫苗嘅誤解，唔可以純粹去利誘。何況，你咁樣去吸引人去接種疫苗，而其實呢啲措施，對整個傳播，都唔多唔少會有影響。」

學者：類「疫苗護照」欠科學實證

中大公共衞生博士、公共衞生研究社召集人陳盈解釋，透過接種疫苗，才能獲得進入某些場所的資格，將類似於國際上討論中的「疫苗護照」（Vaccination Passport），但她指，即使是聯合國，或正在研究疫苗護照的牛津大學團隊，暫時都表明沒有足夠數據去支持政策。

「要做類似疫苗護照，你要有個假設，係打到嘅疫苗，係可以打斷，或者中斷傳播。但現時只有 BioNTech 有呢方面數據，其他疫苗只係講緊減低有症狀感染，換句話講，以為打咗針，就可以無事出入唔同場所，係無科學實證。」

市民或產生「錯誤安全感」 　反礙防疫

陳盈又表示，若政府把進出場所的權利，與有否打針掛勾，可能令市民產生 「錯誤的安全感」（false sense of security），「例如科興，其實只係大約 50% 保護率，你打咗針，理論上一樣要戴口罩，要洗手。但政府嘅做法，可能令市民以為自己打咗針就無事，入到去食肆放鬆晒，防疫效果可能仲差，甚至反而因為咁樣爆發。」

陳盈又提到，提出一項公共衞生政策，必須要考慮政策會否做成「健康不平等」（Health inequality），「而家香港 16 至 30 歲，理論上係唔打得疫苗，你提供『特權』畀打咗疫苗嘅人，就等於剝削呢班人」、「本身佢哋無得打疫苗，某程度上已經係一個不平等，而家係二度剝削，係不平等上嘅不平等。」

羅卓堯：逼用「安心出行」是「圖窮匕現」

醫管局員工陣線副主席羅卓堯則批評，政府強制市民必須使用「安心出行」，是「圖窮匕現」，「當初話可以手動填，而家又變咗係逼人裝」。對於林鄭月娥指，有人在「紙仔」上填假資料，羅卓堯認為若有假資料問題，「係應該諗方法避免人填假資料，唔係逼人用『安心出行』。」

他表示政府的做法「顯然不是以防疫為目的」，「點解一定要安心出行？根本你就解釋唔到，點解唔可以手動去收資料？手動去收資料，一樣可以追到 close contact。」認為新措施等同脅迫，剝奪市民選擇權利。

陳盈便提到，在追蹤接觸者上，不論使用的工具是甚麼，最重要都是市民的配合，「起碼有 7 成市民配合你，先會做到有效接觸追蹤」。陳盈認為，重點根本不在使用「安心出行」還是「紙仔」，又說現時坊間已有假的「安心出行」，即使「上有政策」，民間一樣可以「下有對策」，「你去強逼市民（用「安心出行」），佢哋心不甘情不願，仲反而會對抗，到時可能連真實個人資料都未必畀你，仲衰。」

 

記者｜劉偉程