【文：小編 Sunny】

#先旨聲明我只希望大家睇內文從不呼籲大家睇 cctvb
#而我只係用 2017 年接觸過呢班思想仲停留緊 eyt 年代嘅前職員講少少心聲

原來食屎啦嗰一幕係：王祖藍扮藍太，喺佢講緊嘢嘅時候突然講佢哋冇請 Mirror，出現 Error 非常唔好意思，然後 Bob 就着全黑出嚟大叫又抽水食屎啦，其實我真心唔明究竟佢係想做返以前諷刺時弊嗰種嘅感覺，抑或想話話得佢哋嘅人（甚至支持隔籬台）都係着黑衫嘅人？

如果係咁，真係錯哂。

想分享一樣做新亞視時出現過嘅小事，當年嘅新亞視諗到好大，希望可以將一堆節目翻生，其中一個係《百萬富翁》，當年引起唔少反應，不過都吸引唔到人課金，而其實佢哋有一個直播節目（我已唔記得叫咩名），搵咗曾華倩等等做節目，仲話有埋現場觀眾線上打電話入嚟傾計，咁當然反應好差，因為大家都唔會知有個咁嘅節目。

當年我都有一齊走入一個迷思，究竟點樣先可以重現返《歡樂今宵》出嚟？但經過大台多年都做唔好，自己喺唔多資源下都叫接觸過當年有份搞《歡樂今宵》嘅人，其實我依刻真係好想同你哋、同大台嘅前輩講，醒喇，2021 年嘅香港唔會做到㗎喇。

《歡樂金宵》當年有一班天皇巨星上台唱歌，依家有冇？雖然話依家解決咗四大唱片公司問題，但係你都係唔會叫你哋成日掛喺口邊嘅 Error 同 Mirror 嚟你哋度做節目，都唔講未必個個唱手都肯上嚟，你哋自己都仍然用緊睇唔起人哋嘅口吻去做，點玩？

再其次，先係真真正正嘅重點，EYT 當年最正就係有盧海鵬等等唔同嘅人做一啲諷刺時弊嘅小劇場，但係今時今日嘅你哋，明明就係以親中、維穩、面向大灣區自居嘅電視台，從本質上你哋本來就冇資本諷刺時弊，奇就奇怪在呢個節目，你又笑林鄭，又要搵黑衫人搗亂，到底你哋明唔明自己立場？

諗起好似係你哋總監話，節目太老化，太少年輕節目，但最後你哋大肆宣傳嘅綜藝節目，原來就係咁？

一代文化，一代娛樂，過去 100 毛用偽人去諷刺大台，出現咗新一代娛樂方式，去到今時今日，佢哋都要做返自己嘅節目，想要真正做好節目，麻煩你哋不如諗清楚，到底乜嘢節目先係有趣。

得罪講句，一個《星夢》唱歌比賽，一個《開心綜藝》，連家中兩位平時一定要睇 TVB 嘅＿＿父母都寧願轉台，可想而知係有幾唔掂。

 

#醒吓啦好冇
#咪再話我係打手
#一蚊都冇收過

作者自我簡介：記者／編輯／打字妹／九十後／港女，留意返，相信九十後會係香港最後一代港女，希望能夠記錄香港每一件事。

作者 Facebook