姜濤喺台上，先係多謝香港人，再講：「我地一定可以再次成為亞洲第一」

心頭一震。好耐，好耐冇聽過咁有志氣嘅說話。

近廿年無論影壇定樂壇，來來去去都係話北上大潮流，香港冇得救。舊人北上去搵銀，搵到依家都已經冇晒特色冇晒賣點，搵人仔搵到自己回晒塘唯有不斷話香港光輝不再只有死路一條；因為或者咁樣，自己先會好過啲。

但係絕處，往往亦係逢生之處。

由上次叱吒到今日 Chill Club，樂壇大換血，唔係老前輩放棄香港人，而係香港人放棄老屎忽。當舊人唔再吸引，大家突然發現原來寶藏就在眼前，林家謙、陳蕾、Serrini、林二汶、岑寧兒、Jer、Ian、姜B、許廷鏗、Rubberband、Dear Jane、C All Star、Per Se、Mirror、Error... 邊個話新人唔可以獨當一面？

唔單止獨當一面，仲可以改朝換代。

我自己其實只係三個月前叱吒頒獎禮先開始聽返新歌，喺嗰時先第一次聽姜濤同林家謙唱歌。過去廿年頒獎禮，如果冇陳奕迅容祖兒楊千樺，就總係覺得唔夠照，話晒都係「最後一代天王天后」。事實上，我自己過去廿年聽得最多就係陳奕迅嘅歌，我諗好多人同我一樣，佢地好多歌一起前奏幾個音就識得唱落去。不過自從上次叱吒之後，我個歌 list 幾乎轉晒，《一人之境》、《迴光物語》、《Let Us Go Then You And I》、《漫長》、《銀河修理員》、《純真傳說（陳蕾版）》瘋狂佔據我嘅歌 list。到新疆棉事件發生之後，我甚至一次都冇再聽過陳奕迅嘅歌 — 唔係好特登去堅持唔聽，而係發現：咦，其實除咗佢啲歌之外仲有好多好歌聽。

或者係，我更想聽到可以為我帶嚟希望嘅音樂 — 唔係講歌詞，而係首歌同歌手本身。好似 Mirror，拎佢地唱歌跳舞同韓國男團比，梗係仲差一兩皮，但係佢地有 character、有能量、有種令你鍾意佢地嘅真誠。又例如 Error，係岩岩巉巉，但係你睇佢地啲節目同訪問，完全可以感受到佢地嗰種我係 underdog 但我唔要俾你睇死嘅傲氣。

挺直腰骨。唔跪。講真心話。我梗係知喺呢個時代，做呢啲嘢比任何時間更難，唔需要各位老江湖提醒。我想喺音樂入面，聽到未被現實擊潰嘅聲音。

早排蕭生vs游學修事件，蕭生話要恢愎電影盛世嘅機會係零，游學修其中一個回應係：我要用喺上一輩身上學到嘅嘢，喺新時代去做一啲新嘅嘢出嚟，冇人有資格一口咬定我地冇可能成功。樂壇沉寂咗十幾廿年，早幾年你話俾人知 ViuTV 嘅頒獎禮唔單止人人關心，而且得獎嘅一個「大哥大姐」都冇，應該會俾人話你痴線。但係呢一日就係嚟咗，而且好似毫無預警咁突然嚟到 —— 覺得突然，只係因為我地之前睇唔到好多默默耕耘、默默努力嘅人。佢地冇放棄呢片土地，喺最冇希望時仍然投入希望，終於帶嚟新時代，新時代亦帶嚟咗佢地。

多謝香港音樂，多謝呢班歌手，唔單止帶嚟咗好歌，仲提醒我地幾絕望都好，都唔係死硬嘅。

作者 Facebook

（標題為編輯所擬）