耗費 5,000 萬，用咗 5 日的「觀塘音樂噴泉」，話咁快就壽終正寢咗，真係令人失望。啟用短短幾日，坊間評價一般，觀塘區議員梁凱晴更認為噴泉的噴嘴款式和水柱「效果平平」。唔少人話，水力仲低過屋企個花灑，唔怪得東方昇要走去沖返個涼啦。水柱上上落落，時大時細，無咩花式可言，悶咗少少囉。就趁小白象放大假之際，我哋瞬間看地球，同大家介紹三個又平啲又有效果嘅噴泉。

（1）韓國「月光彩虹噴泉」（반포대교달빛무지개분수）

首先我哋睇個亞洲例子，韓國首爾盤浦大橋嘅「月光彩虹噴泉」，應該不少香港人都睇過。水柱雖然都無咩變化，由上而下、下而上，掃來掃去，配合燈花咁。不過勝在人哋個噴泉起喺條行車橋上面，單係呢點已經贏到巷。2009 年建成，埋單都係 150 萬港紙（215 億韓圜）。

（2）新加坡「財富之泉」（The Fountain of Wealth）

成日攞新加坡嚟比，咁我哋又睇下人哋做成點。撇開名字會不會太俗氣，位於新達城購物中心（Suntec City Mall）的「財富之泉」，相當雄偉。雖然是 1998 年的出品，但除了地上噴出的水柱之外，還有大型圓形雕塑灑下的水簾。咁都係盛惠 4,655 萬港紙（600 萬美元）。

（3）烏克蘭森多媒體噴泉（Multimedia Fountain Roshen）

會唔會亞洲特別平？咁我哋又睇吓歐洲嘅例子。烏克蘭森多媒體噴泉，2011 年建成，造價大約 1,400 萬港元（150 萬歐羅）。睇返效果，水柱不但強勁有力，仲可以造出水簾，當成投映板咁用。噴泉設於河中，配合水中倒影，效果更加顯著。

Well……沒有比較，沒有傷害。當睇見外國人哋嘅噴泉時，你就會明白梁議員唔係吹毛求疵，而係香港人值得更好。