趁夜深人靜，有點想講講昨天。好耐冇用過個腦諗嘢，可能 1999。

1.

不過是幾天前，被問到對於「追星」的感受時，我還在說不肯定自己算不算追星喎。對我來說，「追」是一種很 physical、很真實的動作，比如是跑去商場活動舉牌（甚至去通宵霸位）、在明星工作地點守候、追住偶像的車跑；而我其實只是上網追返他們的節目、受訪片段、新聞，save 下他們的相，最誇張也只是在社交平台公開示愛，算是類似電子拜山吧，要說是「追星」，又好像有點誇張。

直到昨天下午，本身做緊正經嘢，在電車路上老蓮咁遠spot到 #姜濤號 個「K」字（其餘被後面架電車遮住），已經控制不到即刻高八度問身邊朋友「嗰架係唔係？嗰架係唔係？」，個腦都未 load 到，身體已經動起來，下一秒就成粒子彈咁自動發射、著住條長裙在鬧市豁出性命地奔跑追車。（但結果我全日見到姜濤號七次，唔計 HPV 車，其實根本唔使追 [😑] ）

因為追著電車跑那一刻的 physicality，我才不得不承認自己確實是在追星，真的是狂熱到無法想像。電影中有時候會出現衝動殺人血案，兇手回過神見到手上的刀，才發現自己剛剛在迷狂的狀態中刺死人，而我現在才懂，原來人真的可以狂熱到一個身體不聽使喚的程度，又原來人可以對一個陌生人產生這樣一種非理性的熱愛，這些都是奇妙而嶄新的認知。

2.

昨天有去銅鑼灣的人會懂，「姜誕」整個氣氛堪稱普天同慶，除了偶爾有些一臉迷惘的上班族路過，真係同過聖誕冇乜分別。朋友說，已經好耐好耐冇見過咁多人為咗一件開心事聚在一起；而我則是在世貿外排隊時回過頭一看，懷疑成世都未見過幾百個女人咁樣一齊企喺條街度（#metoo 和反送中時僅有的女性集會，我好像都缺席了）。

整夜在銅鑼灣游走，湊巧在 SOGO 外幾次碰到一些久未見面的朋友，又和一些不認識的讀者／觀眾相認，係開心的。一些資深姜糖自費設計、製作應援物派發（但要提供身為姜濤 fans 的證據才攞到），等候場面墟陷；排隊時，前後左右不同年齡的女人都好自然會搭訕，大家忍不住讚美一些人手上精美的姜B 公仔、應援物，又互相分享關於電車、應援物、戶外屏幕廣告的資訊，在電車站也有彼此幫忙拍照。香港好像又久違地變返一條未被攻擊的村莊，為數眾多的陌生人因為鍾愛一個被時代選中嘅細路而聚合，並自動結盟。

3.

我對不在場的朋友說：「今晚銅鑼灣啲氣氛真係黐撚線，真係好耐都冇見過，迎面走過嚟個個都笑容滿面，隔住口罩都見到成條街啲人個樣全部都好撚寬容。」

當下就想起 2019區選那晚，我在跑馬地助選，勝選一刻，好多人（包括我）一秒爆哭，激動相擁。其實我到而家都唔太明自己喊乜，有可能是，隱隱覺得將近半年來受的屈辱和傷害終於得到少少補償（當然後來又蝕返晒有突，後話啦）。

那一晚，我深夜回到西環，看到票站對面站著一堆人，都是陌生街坊，就走咗過去一齊食煙吹水。我哋個站有選票爭議，後來花了很長時間才點到票，但總之那晚的氣氛很奇異，好像第一次感覺到街邊這些人是我真正的、各種意義上的鄰人。

點解講起區選呢，其實是因為，姜誕夜是 2019 後我第一次感知到可以同喜同悲的巨大集體。那種情境和感覺，是這段日子以來我們被剝奪的、非常珍貴的東西。

4.

有件事，因為太柒之前都費事講，但既然關事好似都冇乜所謂。前排和朋友吃飯喝酒，大家都飲咗好多，餐廳關門不久我開始在街邊發酒瘋，大叫咗一輪「XX 死全家屌你老母死仆街冚家鏟姜濤不紅天理不容」。朋友冇我咁醉，仲傾到偈，但傾傾下大家無啦啦一齊喊，真係不停流眼淚和 CHOK 住道氣的認真喊。最初好像是因為各自的私事，然後我喊喊下開始話：「嗚嗚嗚，點解香港而家搞撚成咁，真係好撚慘好冇希望，嗚嗚嗚... 」Loop 咗一輪之後又變咗：「嗚嗚嗚，點解我買唔到 Mirror 啲飛，點解會咁難買，睇個演唱會都咁難，人生真係好撚難，好撚慘呀，嗚嗚嗚... 」

成件事好戇鳩，最頂癮係仲要撞到人 [🙃] 但其實我係想講，呢一年幾都發生咗好多事，唔係話麻木，但確實已經唔知點樣再俾反應。我已經好耐冇喊過，咁樣發一次癲，才發現有咁多無以名狀的情緒累積在體內，一直沒有出口。

點解今時今日，會有咁多咁多人需要 Mirror、需要姜濤、需要姜誕日，其實原因都幾明顯下。我諗喺呢種時代，有 Mirror（或 Error／林家謙／Serrini 邊個都好啦）可以鍾意的人是幸運的，起碼叫做有得索返兩啖氧氣再繼續攻頂，或者至少企返穩個人，暫時唔好碌落山崖住吖。

最後祝 Mirror 演唱會大成功、鏡仔特別係姜仔加油頂撚住唔好死啦，雖然我就冇得睇，唉。

#挺起胸襟任未來不似預期

#大不了死亦不會避

#念力能做武器

#滴汗能做武器

#新聲音慘遭攻擊有了準備

#wegotawarriorheart

作者 Facebook

（標題為編輯所擬）