430，我等老嘢有眼不識「姜濤灣」，一到百德新街，人山人海到一點。少女手上都拎住個「Keung To」牌，不分年紀嘅女舉起手機影相。追星追到咁熱情，勾起大叔當年廣播道嘅回憶。邊個話香港樂壇已死？你睇，當年四大天王嘅 feel 都返曬嚟。姜濤啊、Mirror 啊、Error 啊，仲好似有咩陳蕾、林家謙。But, I must admit 呢啲唔係「大叔的菜」，上星期五去銅鑼灣唔係為咗姜濤，而係去時代！

時代廣場呢排搞咗個「廣東歌 101」嘅展覽，由 80 年代講起講到千禧後，數返曬香港樂壇嘅經典金曲。我就係趕過去睇首階段 80 年代！80 年代，係阿叔最嚮往嘅年代。嗰陣時成日聽電台，又錄 mixtape 俾女仔。張國榮、陳百強一定走唔甩！梅豔芳、羅文夠妖冶，達明異色得嚟又唱出草簽後嗰種複雜心情！朋友移民臨飛之前，一定點返首《今天應該很高興》送行⋯⋯

我以為，講 80 年代舊歌都係我呢啲老嘢先會去懷舊、想當年，點知好多後生仔女去！老嘢反而係少數！我去就尋佢老味，但呢啲派台嗰陣，班後生仔女應該未出世，竟然會對呢啲舊嘢有興趣！

行入個展覽，工作人員就好熱情咁介紹，然後俾咗 3 粒鋼珠我，「投票揀你最喜歡嘅廣東歌啦」。香港人，你幾耐無投過票？揸住  3 粒鋼珠，我立即覺得任重道遠。25 個年輕歌手，揀咗佢哋覺得代表 80 年代嘅時代曲。《明星》、《風繼續吹》、《分分鐘需要你》⋯⋯對眼一見到歌名個腦就自動播歌，識貨！不過，大叔最愛都係《似水流年》。

嗰種離愁別緒，心好唔紮實嘅感覺，今時今日何嘗唔係呢？仲有鐵達時廣告啊！一句「不在乎天長地久，只在乎曾經擁有」，街知巷聞，深入民心。經典金曲是劃時代的，唱出嚟嘅情懷，兜兜轉轉，幾十年之後又啱駛啱用⋯⋯真係唏噓！

拿拿拿，個展覽唔係一味懷舊㗎！80 年代完咗，佢哋準備緊進入 90 年代，一直會唱到 2010s！雖然我老，但我都好奇，嚟緊我會繼續去睇，keep 住自己 update with Canton Pop！