【文：愛・香港流行文化】
相信有睇開 viutv 既觀眾最近都成日會見到 Edan 出現，佢既人氣喺近依一年可以話係一時無兩，唔同節目都會有佢既身影，可能係近年最全能既藝人，嚟緊我想講吓佢涉獵到既範疇同點解佢咁受歡迎。
喺 <全民造星> 第一季個時，Edan 其實唔算好突出，畢竟有唔少參賽者唱歌跳舞都比佢好，最後只係以第八名結束造星之旅。真正發揮到佢潛能既節目係 <Mirror Go>，每一集玩每個遊戲佢都好盡力，但係唔知點解最尾都會輸，慢慢建立老鼠屎同黑仔王既形象，喺節目入面充份展示到佢既喜感。而佢表演能力喺 <造星2> 更加發揮得淋漓盡致，由諗表演idea到唱歌跳舞演戲，都睇得出佢既進步同全能，而佢獨特既表演風格同願意為團隊貢獻既精神，開始受到更多觀眾關注。
Edan 因此獲得更多機會，由拍劇、綜藝、主持都有份參與，佢亦不負眾望，喺 <男排女將>入面充分表現到佢做喜劇演員既潛質，就算係認真少少既戲份雖然未算好成熟，但都算不過不失；而 <膠戰> 更加完美發揮佢搞笑本色，每一集都比到好多歡樂觀眾；主持方面，<考有feel> 因為係綜藝所以佢完全得心應手，而 <激安百貨> 佢生動既介紹，令理應比較悶購物節目變得有趣。
而真正令佢爆紅既當然係 <E先生連環不幸事件>，依首歌短短幾日已經喺 YouTube 破咗 100 萬 view，加上電台同電視台不停宣傳，可以話係街知巷聞。依首不論曲詞都好有一貫高質素廣東歌既風格，而 Edan 既唱法，中間鋼琴獨奏同 MV 都為首歌營造更加悲情既氣氛，個人認為係今年暫時最出色既廣東慘情歌。
我認為 Edan 咁受歡迎有好多原因，天生有喜感同外表吸引固然令佢好容易比觀眾留意，但係無偶像包袱都係另一主因，每次上節目佢唔會理自己形象盡力去玩，仲成日喺 IG post 自己啲搞笑相，比觀眾一種好貼地既感覺，所以特別有觀眾緣。不過，即使佢喺好多方面都好有才華，我認為佢有啲地方可以做到更好。主要就係咬字同語速 ，佢咬字真係唔夠清楚，仲有唔少懶音，再加上佢講野比較快，有時要靠睇字幕先知道佢講咗咩。不過作道咗唔夠三年既藝人，有進步空間係好正常，我亦相信佢會努力改善自己既問題。
總括而言，Edan 係近年難得一見既全能藝人，令我好期待佢未來唔同方面既發展，特別係港版 <大叔的愛> (睇預告已經 feel 到會好搞笑)，希望佢會繼續努力，回饋一班fans。
作者簡介：一個鐘意香港流行文化既後生仔，得閒會寫吓文用大眾既角度講吓廣東歌、香港既電視節目同電影，希望未來有多啲香港人留意香港流行文化。
Instagram Page: https://www.instagram.com/hkpopculturelover/
Facebook Page: https://bit.ly/2NWQCji
（標題為編輯所擬，原題為：全能藝人 — Edan呂爵安）