本港近期除印度裔男子的變種病毒群組外，本地源頭不明個案只有一名 4 歲男童，他的家人及同校師生都正隔離檢疫。理工大學醫療科技及資訊學系副教授蕭傑恒接受《立場》專訪時，指據他估計，男童亦有很大機會是「假陽性」。他又表示，現時本港的疫情已截斷，只要能做好預防輸入個案的措施，認為有空間放寬各項社交距離限制。

一名男童在上周六（15 日）確診，感染源頭不明，而他入院後的核酸及抗體檢測都呈陰性，正隔離檢疫的家人及同校師生，亦暫未有人發病。港大微生物學系講座教授袁國勇日前提出，現時仍應把個案當作確診處理，待之後視乎男童有否產生抗體，再作判斷。

蕭傑恒向《立場》表示，以他個人的估計，男童是「假陽性」的機會高，「佢似係假，因為佢入院後未試過 PCR positive，未試過抗體 positive，家人無確診。」

他又解釋，第四波疫情流行的 GH 病毒株，自 4 月 28 日後已沒有再驗出，而計算日子下，已經接近 21 日，幾可肯定該款病毒株在港已截斷。「所以如果有另一個本地，而又唔係南非變種病毒嘅傳播鏈，就好驚啦，驚有另一個漏洞，另一隻新嘅病毒株走咗入嚟。」

稱疫情已斬斷　可放寬社交限制

蕭傑恒形容自己是「樂觀」，認為此刻本港已幾近「清零」，「而家都做緊第二次外傭測試啦，如果再無（確診），都 21 日啦，就變咗呢個，南非變種病毒危機解決咗，我哋城市入面都無（病毒）。」

他表示，只要未來的日子香港能把「兵力」集中在處理「城牆對外」的輸入個案，本地的社交距離措施，如餐飲限制及限聚令都有空間放寬，「大家都捱咗好耐日子…除非酒店出咗意外，所以真係要吸取教訓，點樣防（輸入）得好啲。」

政府外判的私人檢測商屢傳出檢測「假陽性」的問題，蕭傑恒認為，假陽性及假陰性都會影響抗疫策略，「所有檢測承辦商，知道佢哋辛苦，但都有一個要求，唔可以話因為佢哋幫手做好多測試，就放棄咗專業步驟，因為你越多假陽性假陰性，你唔係幫緊件事，你係拖累緊成件事。」

他說，假陰性會影響政府追蹤密切接觸者的進度，假陽性則會浪費檢疫資源，亦會有市民因錯誤結果而被隔離。早前華大基因屢出事故，傳媒曾問特首林鄭月娥如何處置，當時她回應指，必須同時顧及檢測能力。蕭傑恒說，同意在疫情高峰，「每日百幾宗」時難以處理實驗室問題，但認為現時疫情有所回落，是時機「提升番我哋專業水準。」

指部分化驗所無跟足指引

他說，曾見過有化驗人員在「普通空間」而非專用器材內打開樣本樽，亦有化驗師戴著手套時摸頭髮。蕭傑恒指，即使是持牌化驗所，亦不一定有處理高傳播風險樣本的訓練，「所以點解會有咁多實驗室污染，肯定佢處理嘅時候，佢唔係跟足一啲指引…係成個實驗室系統（問題），佢可能無得到一個其他同行意見，就會有咁嘅甩漏。」

華大基因早前公布，正進行架構重組。蕭傑恒同意，若在檢視實驗室時，能加入專家或其他同行意見，「有人會擔心，如果搵競爭對手，會唔會留難佢哋（私人化驗所），其實我哋有好多唔同嘅同行，比如我自己，我無任何化驗室掛牌，例如公立醫院（化驗師），佢哋都好有經驗。」

「要有專家落去視察過，或者同行落去視察過，睇吓點樣改善，假陽性、假陰性，先可以提升到實驗室水準。」

與政府無正式合作　自行聽 430 向醫院索樣本

近期本港出現一條「南非變種變毒傳播鏈」，源頭相信是早前瞞報行蹤的印度裔男子。蕭傑恒的團隊早前透過基因排序，成功找出群組間成員的關係，確認為同一條傳播鏈，亦間接確認本港暫只有一條變種病毒傳播鏈，即本港暫時「頂住」了第五波疫情爆發。

其實，現時政府有委託港大協助基因分析，理大的團隊是「自發幫忙」。蕭傑恒說，他們會從 430 例行記者會了解確診者資訊，「知道有咩不明個案，留意返住邊度，試吓聯絡番醫院，有無呢個個案，呢個係男性，幾多幾多歲，試吓有無樣本拎番嚟。」假如醫院願意提供樣本，他便會坐車到醫院，用冰袋拿樣本回實驗室。「就要比較主動少少，勤力少少。」

被問到為何政府沒有主動「伸出橄欖枝」，邀請理大加入幫忙，蕭傑恒先提到，相信是不同部門都各自繁忙，沒有機會商討。之後便說，其實也希望，能與政府「坐低傾吓」。記者再問到，會否覺得，衞生署可以放下一些「規矩」？他便說，現時政府正與港大公共衛生學院合作，認為「可能佢都會尷尬，覺得一樣嘢，佢(已經)同一間學術機構合作」。

沒有得到政府「青睞」，會不會與學術界的山頭主義有關？蕭傑恒沒有談及這些，只是強調，在獲得基因分析結果後，「會畀晒咁多方面」，「唔係要攬住資訊唔公布，越多人知道（結果）越好，總有一方會做到嘢出嚟。」

他又提到，外國的基因分析做得很完善，「好似英國咁，佢哋分得清楚邊條傳播鏈打邊條傳播鏈，係邊隻品種，我哋香港，係有能力做到呢樣嘢，我哋夾埋咁多間實驗室…政府嘅database 就可以加埋好多唔同資料落去，咁我哋防疫資訊，就會清楚好多。」

「大家一齊做」、「我想嘅係增加香港基因排序能力」。

 

記者｜劉偉程