今晚睇到呢一幕，又試喊咗出嚟，係近期第二次俾佢哋搞喊。

最近 lunch time 睇《Error 遊 2》送飯，深夜睇《Error 自肥》，一路睇一路深深覺得，佢哋由 2018 年底行到今日，真係好唔容易，箇中辛酸，大概比 Mirror 十二子有過之而無不及。

兩輯《Error 遊》其實真心好睇，仲好記得我係 2019 年初睇第一輯，嗰時已經覺得好好笑，但討論度不高。今日再睇第二輯先發覺，佢哋四條友為咗個節目真係去得好盡，保錡玩蜂衣（全身被幾十萬隻蜜蜂嬲住），仲俾啲蜂針咗幾嘢；保錡肥仔食曱甴、193 俾成大箱曱甴倒落身度；玩「過火」，踩落啲燒緊嘅炭；俾幾千支炮仗兜口兜面射。當然有啲睇落危險嘅嘢，製作組都有研究過安全性先俾佢哋玩嘅，但就算唔危險都污糟、核突同痛㗎。

只可惜，雖然去到咁盡，播嗰陣撞正反送中，應該冇乜人睇。如果我係佢哋，搏盡做出嚟啲嘢完全冇迴響，應該都會幾灰心下。

Error 係搞笑組合就係人都知，但我哋好多時都唔記得咗，其實佢哋唔似得啲搞開 stand-up、或者日本嘅漫才嘅人，搞笑並唔係佢哋個初心。肥仔跳舞超勁，唱歌都唔差；阿 Dee 跳舞都勁，但志願係做一個演員；Poki 想做音樂 — 唯獨 193 初頭想點我睇唔透。

參加造星時，我相信佢哋各有自己嘅志向；但 Error 成軍之後，佢哋因為做咗搞笑組合，於是就只能搞笑、搞笑同搞笑。搞笑藝人係一件咩事呢，就係你做乜基本上人哋都覺得你搞緊笑，唔會 take you seriously。佢哋其實都 keep 住有出歌，但我諗大部份人應該都唔會好認真聽。

同埋，跳舞／唱歌／演技進步咗，一般觀眾會比較容易睇到，好似 Mirror 演唱會，大家會大讚皮皮唱得好咗，Jer 跳舞好咗；但 Error 一路以綜藝為主軸，好多努力都俾大家忽略咗。正如阿 Mike 講，拍綜藝唔會比拍劇集容易，其實幕前都係，佢哋嘅努力唔會比較少。觀眾睇佢哋好似四條戇鳩仔喺鏡頭前鳩流流，但諗真啲，佢哋為咗節目效果，真係一次次挑戰自我極限，就係務求令大家笑。只係好多時，大家睇完笑完，可能個印象就係四條友鳩揈揈；有時啲 item 真係哽唔落，好似第一輯阿 Dee 佢哋食唔哂碗勁辣拉麵，仲會俾網民狂鬧。當然偶像都會俾人鬧，但點都叫有啲 fans 會護航，佢哋連偶像光環都冇，應該都係硬食。最慘係，你哋負責搞笑㗎嘛，你哋啲辛苦嘢冇人想知，知咗就唔好笑啦係咪？

做得好冇人讚，做得唔夠好就俾人鬧，都幾難頂。2020-21, 四個男仔都相繼登三。唔知佢哋有冇一刻諗過，好似入咗行反而距離本來嘅夢想仲遠咗？

睇 Poki 喺《自肥》個表現，再睇返佢年初啲負面新聞，其實你會 feel 到，佢應該有一輪個心理質素幾差下。今次佢嗰幾個 items，名義上係自肥，其實真係團救，製作組成條 team 一齊救返佢個初心，亦都挽回觀眾對佢嘅評價。

今時今日，193 IG like 數去到 32 萬，比姜濤仲多 5 萬；保錡憑住片石仔＋學結他應該都算成功洗底，好多人重看《Error 遊 1 & 2》，紛紛討論佢好盡力、好肯試，同埋喺雪地勁有雷幫 Mike 導對抗花姐；仲有無數嘅觀眾因為《自肥》睇到佢哋四個嘅好，開始入坑，睇返佢哋啲節目、聽返佢哋啲歌。好想講，呢啲全部都唔係僥倖，佢哋每一個都值得擁有。

Error 加油，希望你哋四個都可以好快做到你哋真正想做嘅事。

 

#error
#errorweare
#error自肥企画
#無制限OT編集団

作者 Facebook