193「自肥」當中嘅聰明同努力
「機會係留俾有準備嘅人」，
呢句係好老土，
但永遠係至理。
睇返 193（郭嘉駿）喺 2020 年 6 月未爆紅時呢個 Post，
坦言自己喺娛樂圈定位嘅糾結，
但願意 Go With The Flow，
瘋狂睇外國綜藝節目做研究，
亦 Keep 住學唱歌，
所以當有《自肥企画》，
193 除咗綜藝表演能力強化咗，
會有明確而堅定嘅「人氣出奇蛋」構想，
過往一切嘅準備，
造就成為 YouTube 熱門嘅《睡到三點》。
我一直深信，
人需要有自己嘅作品，
除咗有自我實現嘅滿足之外，
一個完整而傳播力強嘅個人作品，
對形塑「個人品牌」大有幫助。
四個 Error 成員，
當有「自肥」呢個機會來臨，
兩個選擇可以親近女色嘅短劇演出，
一個犯過錯不敢造次讓製作組發落，
變成三個搞笑而不失感人嘅成長單元。
而 193 嘅選擇，
則衍生出單曲、MV、同一個 fashion 設計，
作品嘅完整度及傳播性比短劇同單元高，
可以跨平台放上 YouTube 及 Spotify 等音樂 Platform，
可以讓 193 以歌手身份亂入音樂節目及頒獎禮，
更可以為推出自家產品舖路。
就算你覺得依家個創作未盡完美，
佢都為自己未來各種演藝變化開咗道門。
即使搵女主角自肥，
都好清晰要搵人氣 KOL，
讓自己嘅作品槓桿到人哋嘅 Fan Base。
記得花姐曾經喺節目嘅訪問講過，
覺得 193 聰明，
我好同意。
機會，係留俾有準備嘅人，
成功，則賜給聰明而有準備嘅人。
193 最近一個訪問中，
謙稱自己就係無料，
所以先成日口頭禪講「知我乜嘢料啦！」
我覺得 193 唔係無料，
而係好努力而懂得如何開拓自己未來嘅好材料。
#但我最鍾意都係快吞轟保錡
#麥可暉係鬼才
（標題為編輯所擬）