專業配音員嘅價值
【文：伍博民（前 TVB 配音員）】
好多人睇某節目會聚焦喺邊個演員配成點樣，又或者邊個配出嚟嘅效果有水準，甚至有啲人會有個錯覺，認為其實啲演員都可以直接去配音，如果你咁諗嘅話實在太睇小成為一個配音員所需要付出嘅努力。
呢個訪問入面張生同珍姐就講出咗重點，專業配音員所需要嘅條件，就係「快靚正」，由於實際配節目會受時間所限，廠期長短都會影響製作成本，所以專業配音員需要喺只對一次片甚至未對過片嘅情況下即時配出一定水平嘅效果，而且有機會幾間廠同時配緊唔同節目，甚至可能要兼配多個角色，所以根本冇可能預先背定對白或者將片段睇得滾瓜爛熟。專業配音員能夠做嘅，就係靠經驗訓練出 N 套唔同嘅演繹方式，當睇畫面見到個角色嘅樣同戲，就召喚出某一套最配合嘅演繹方式去配合，要做到呢一點，不斷累積經驗同自我檢討係好重要，並唔係一時三刻就可以達到。
有啲人唔明以為上完個訓練班就可以配音，其實係大錯得錯，因為一個唔夠經驗嘅配音員，可能慢慢雕琢都可以配出一定水準，但用嘅時間可能係專業配音員嘅十倍時間以上，大家可以想像租錄音室同導配嘅成本會多出幾多，所以往往只係有 budget 嘅電影先會負擔得起搵明星去配音，因為片商覺得明星效應可以抵償增加咗嘅錄音成本。所以行外人成日覺得配音員求其講幾句就可以賺錢，啲錢好易搵，往往將配音員嘅人工撳到去食物鏈嘅最底層，呢個觀念真係要改變，亦希望觀眾喺睇電視嘅時候，多啲欣賞各位專業配音員嘅努力，你哋留言一句「粵配不了」好簡單，但我哋要成為一個有一定水平嘅配音員，真係需要經過以年計嘅努力先可以做到。