如無意外，2 年後嘅今日（5 月 29 日）我嘅暴動罪終於開審。

2019 年到 2023 年，即是我已經上左近十次庭，去狗屋報左百幾次到，由一個 age group 進入另一個 age group，touch wood 再之後可能要進入多一個 age group 件事先可以暫告一段落。

之前話過唔想比 deadline 自己、自我設限，不過原來有個日期出現左，就點都會諗下咁。雖然我諗緊嘅都只係工作上好想完成整個聯合國兒童權利公約香港報告嘅程序、學一個新語言、陪多 d 婆婆（又或者 empower 下身邊要撐住 me 嘅親朋好友）、繼續強身健體同開個有關少年司法嘅 project（都講左好耐好似無進展，希望講多次會有動力）。

不過呢段日子見證住政權變本加厲嘅壓迫，各個界別都無一倖免，當時嘅「公民社會一沉百踩」好似一語成讖。社會氣氛嘅沉寂、突然嘅別離、退場、網路充斥一秒焫着人嘅反智言論，其實有時都真係有種好複雜、難而言喻嘅感覺。但另一邊其實仲有唔少堅守公民社會嘅人，以唔同形式介入社會、抵抗荒謬、堅持真相、公義，當中有前輩、更有後生可畏嘅優秀細路們，哪怕迥響幾細、哪怕會引來牢獄之禍等等…以實際行動實踐理念就已經係反抗者。而呢啲都係獨特嘅、屬於香港嘅、我好珍惜嘅面貌、人同精神。雖然我無咩長處才能，仲未能夠成為強大嘅反抗力量，但我仲有好在乎嘅事，所以喺度更努力、善良地生活、堅守價值就係我能夠做到最基本嘅事。

要面對未知帶來嘅恐懼，我只能相信當下嘅自己已經係最自由，同埋想像五、六十、甚至百年後香港終會迎來真正自由嘅時代。希望兩年後嘅自己會係 in a better form， 有更強大嘅心靈，可以有自己想法而好好 communicate 到，對社會有貢獻、同埋同細路們與時並進嘅孫曉嵐。

20210529

作者 Facebook

（標題為編輯所擬）