【文：愛・香港流行文化】

如果你有留意開香港樂壇，阿 Jer 柳應廷依個名最近你一定聽過，獨特既風格同犀利既唱功令佢成功橫掃新人獎，嚟緊我想介紹吓依位唱出自己一片天既男歌手。

阿 Jer 喺 <全民造星> 出道，一開始因為唱歌表情奇怪加上外型唔突出而無入唔到圍，好彩導師們睇到佢既潛力，比佢重新參賽，接著佢唱 <P.S. I Love You> 已經好溫柔好好聽，表情管理又有進步，成功晉身團體賽。之後既比賽佢繼續展現唱歌天賦，唔同歌曲都得心應手，奈何佢無跳舞底子，最終入唔到十強。不過花姐睇到阿jer既實力，極力遊說佢加入 Mirror，喺 <造星2> 同一班善於唱歌既參賽者合作更加睇到佢既魅力，最終有機會出 solo。

第一首派台歌 <水刑物語> 已經比聽眾睇到佢獨特既風格。依首歌一開始用好迷幻既唱法，但係副歌又要好用力去表達情感，感情同技巧上需要轉變得好快，作為第一首作品難度好高。而 MV 更加有部分喺水底拍攝，令首歌既藝術氣氛更重，開始到吸引一班香港樂迷留意。

下一首歌 <迴光物語> 係我最鐘意既作品，比起另外兩部曲唱法同風格上都更易入口。由頭兩段溫柔咁營造出一個喺黑暗入面既環境，再喺「我被遺落在寬廣的銀河」依句爆發，講到主角發現自己身處銀河系，但搵唔到光源，到最後決定自己創造光芒，成個畫面透過短短幾段歌詞已經塑造喺聽眾眼前，加上阿Jer 既聲線令我每次聽都好似置身另一個空間，好有意境。特別係 <歌手·門> 入面佢、Serrini 同林家謙唱咗個 medley 之後，更多人認識到依首歌。

而作為三部曲既最後一部，<風靈物語> 比較少人聽過，連MV都無拍到，但係其實依首歌比前兩首更特別，歌詞以 2-3 個字一組，用唔同單詞去貫穿成個故事，係廣東歌好少見到既風格，值得更多人聽。三首歌係作為一個整體，係一個好有意境，需要聽眾思考既故事。

喺物語系列完咗之後，阿jer 今年推出重生三部曲既第一首作品 <狂人日記>，採用黑暗風格又帶啲佛味，中間仲加咗廣東歌好少見既效果好似呢喃同頌經，有部分歌詞同 <風靈物語> 一樣都係用 2-3 個字做單位，係一個好大膽既嘗試。而歌詞、音樂、MV 同佢既唱法都塑造出一個狂人既生活，演唱會更加有埋舞台效果，阿jer 既演繹完美地成為一個狂人，成功令依個表演喺網上瘋傳。

從阿Jer幾首歌中可以睇到佢唔係走主流路線，雖然有少少以前 Juno 或者周國賢既味道，但係佢既自我風格好突出，而且作出既嘗試更加創新。佢既歌你頭幾次聽未必鐘意，但係當你聽多幾次，開始領會到首歌既意境，慢慢就會愛上，就算風格比較主流既流行曲好似 <樂壇已死> 同 <明年見> 佢都可以唱得好好。再者，阿jer 唱 live 好穩定，有幾次演出我更加認為係超越CD level，展現到佢作為歌手既實力。

比起 solo，阿 Jer 喺 Mirror 入面既光芒可能無咁耀眼，但係佢非常努力，即使要比其他成員用多好幾倍時間去記舞步，佢都會用盡全力練習同表演，慢慢掌握到跳唱技巧。喺舞台上既佢雖然好有自信，但係當拍戲同做綜藝既時候，其實可以睇到佢私底下係有啲怕醜，依種反差好容易令人留下印象，亦因為咁令更多人透過 Mirror 同 Viutv 認識佢。

最後，優秀既歌唱實力同敢於嘗試既精神成功令佢突圍而出，絕對係樂壇明日之星。眾所周知，阿 Jer 好重視廣東歌，希望佢未來可以出更多唔同類型既作品比樂迷，香港歌手不會死！

作者簡介：一個鐘意香港流行文化既後生仔，得閒會寫吓文用大眾既角度講吓廣東歌、香港既電視節目同電影，希望未來有多啲香港人留意香港流行文化。

Instagram Page / Facebook Page