【文：手足 U】

近日睇報紙幾乎每日都有移民故事，探訪嘅朋友亦告知好多認識嘅人將離開香港，網上亦不斷有沒完沒了離開 vs 留低嘅罵戰，我哋係牆內睇到，痛係必然嘅。但我寫呢篇文嘅目的絕對唔係要情緒勒索任何人，基本上好多人決定因爲家室而移民我表示非常理解，而且留定同離開根本唔係兩個對立嘅選項，點解一定要互罵黎 rationalize 自己嘅抉擇呢？我只係想透過呢個投稿黎抒發下己見，請原諒我係牆內無乜機會表達自己感受。

首先，我正如上述所說，非常理解香港人為自己小朋友將來而移民呢個原因，但非常重要嘅一點係唔好美化移民呢個行為，坦白承認移民嘅原因，而唔好吹噓甚麼建立「海外新香港」。成日覺得建立「海外新香港」呢個概念都幾雙重標準，好幾年前開始嘅光復上水、反水貨客及至後來對中國新移民嘅仇恨，係基於佢地走黎香港搶掠資源但同時唔肯入郷隨俗，晤肯學習香港嘅語言文化，甚至反客為主。咁依家移民去到人地國家話要建立新香港咁同我地最憎嘅蝗有何分別？何況香港無左就係無左，唔係話複製就複製到，亦正正因為複製唔到先造就其獨特性。其次，近排睇解悶見到一個 Fb post (sorry I forgot the headings)，入面有一句「你又會唔會嘗試係 2021 年嘅香港，陪伴每一位留下來的人」，我睇到之後好深印象，因為曾經我好怨恨 1997 年前後點解香港人選擇放棄自己屋企紛紛走去移民 (老實講其實依家間唔中都有呢個念頭 XD)，到到依家2021 年呢個問題又再一次出現，但點解個選擇好似同當年又係一樣？經歷左咁多，點解個選擇都係一樣？對我黎講，留低係需要極大勇氣。我成日係度諗，2021 會唔會就係個一關？只要今次大家選擇留低，可能會有不一樣嘅風景？雖然唔知留低左光明係咪一定會出現，但離開個結局就好明顯。依家選擇單純留低係香港已經算係一種堅持 (利申無鼓動人做任何野)，相對上算係比較容易同簡單 (我知我咁講實會比人插)，咁點解唔試下留低？無左 2019 年種種血腥場面嘅衝擊，取而代之係強權極致嘅打壓，一個肅剎高壓嘅社會，就可以令大家選擇離場？咁會唔會太容易放棄？定當時只係因為同情心驅使忽然熱烈起黎？答案只有自己知。

選擇走嘅人好多，但同時我都知道有好多人留低。係牆內每當好辛苦嘅時候 (例如做大清潔個時)，我都會諗點解我會係度？又會諗好想返返去 2019 年，但冷靜返落黎，又會諗就算比我時光倒流返返去 2019 年我又會作出點樣唔同嘅選擇呀？可能最後都會係一樣？我唔知。幸好，我收到好多牆外朋友 (無論本身識我定唔識我) 嘅信，文字給予左我好多力量，比我知道出面個世界仲有好多人支撐緊我地，令我記返起自己做緊乜。

最後，多謝每一位選擇留低同我地共行嘅同路人，多謝你地留低陪我地、陪大家。

近排非常鐘意《留下來的人》，送句歌詞比大家：「你繼續沿途歷險 我繼續尋求幸福了 那日見」

祝安康！

手足
u上

23/5/2021

原文刊於邵家臻 Facebook

(原題為 <牆內心聲> )