【文：Loire】

兩點．維園

小梁：有冇帶水同帶風扇？

小黃：梗係有！太陽帽太陽眼鏡風扇後備電同水，點可以冇！

小陳：我冇帶風扇，一定要？

小梁：你真係第一次行，算啦，憑我哋嘅友情，我借我個後備電俾你，你自己去買把風扇。

小陳：都好！

小黃：用友情玩後備電，果然係好朋友！

三點半．維園

小陳：明明已經提早開始，點解我哋仲喺維園？

小梁：其實好多時都係咁，不過點都要入維園，因為要數人數！

小黃：行呢邊啦，抄小路。opps，草地，對唔住！

四點半．銅鑼灣富豪酒店

小黃：世界上最遙遠嘅距離又開始！

小梁：每次遊行，我都覺得係香港人最有耐性嘅時刻，同平時完全唔同，平時行慢啲都比後面鬧，遊行嗰陣完全冇呢回事。

小陳：呢段路要行幾耐？已經好攰。

小黃：由富豪酒店去到SOGO，你預最少一粒鐘。

小陳：OMG! 

小梁：今日冇落雨已經算係咁，有次落落雨仲要等，全身濕晒。

小黃：咪喺，次次都唔肯開路，特登㗎！

五點四十五分．灣仔油站

小梁：今日真係好多人，去到呢個位都仲行得咁慢

小陳：係咪次次去到某啲位都會嗌得特別大聲？

小黃：梗係，聲勢嚟㗎嘛！

六點半．警察總部

小黃：今日真係好多人，平時呢個位已經冇乜人，仲要用咗三粒鐘先嚟到呢個位。

小梁：證明大家都覺得係唔應該通過呢條例！小陳，就到㗎啦。

小陳：點解你哋次次都可以出去？我諗我真係老喇。

七點．金鐘政府總部

小陳：點樣兜入去？我想去睇下。

小梁：跟人行，雖然多人，但係你應該可以去到人民廣場嘅。

七點半．中環地鐵站

小黃：我打咗電話俾鹿鳴春，可以改八點，一陣一定要飲番杯大啤酒！

曾經，我哋可以去遊行、我哋可以去示威、我哋可以去嗌口號、我哋可以去表達我哋嘅意見。雖然好多時意見接受，行動依舊，但係我哋有呢個權利。

2021 年，遊行示威，唔能夠。嗌口號同講嘢，要好小心。

好多嘢，消失咗。嗰日遊行完去鹿鳴春食飯，都冇咗。

不過，有啲嘢，其實仍然喺度。

例如：肯借後備電嘅友誼、鮮活嘅心、同各方不認識嘅朋友

「真的會再有個約會會完成
真的會再有這樣深情
我以天為證
跟你帶領」