習作《治療室》
【舞台上坐著一個年青人，樣貌端正，眼神平靜，他的身體接駁著各種儀器，在等待測試的開始】
畫外音 ： 嗱跟住落嚟螢光幕會出現一啲字組同畫面，你嘅任務係讀出畫面上嘅字組。你都做過好多次啦，我哋會喺你朗讀完成至轉換新嘅畫面同字組，遇到唔肯定嘅字你可以花時間思考，必要嘅時候我哋會幫你。
【年青人點點頭】
畫外音 ： 測試開始。
【投影把畫面及字組打上舞台，投影會隨青年的朗讀而不停轉換】
年青人 ： 612、721、831、一百萬、二百萬；催淚彈、水炮車、橡膠子彈、胡椒噴霧、海棉彈；雨傘、網球拍、煲蓋、豬嘴、保鮮紙；the bill is dead、Sing Hallelujah to the Lord、be water、we Connect、yellow object；公務員集會、醫護靜坐、銀髮族遊行、撐警大會、流水式集會；陳同佳、陳彥霖、梁凌杰、周梓樂、林鄭月娥；反修例、立法會、新屋嶺、台灣選舉、十一月選舉；勇武、和理非、不分化、不篤灰、不割席；大三罷、大和解、和你飛、和你塞、和你 lunch；香港人加油、願榮光歸香港、五大訴求缺一不可、XX 香港時代 XX、we Connect；攬炒、私了、裝修、北角福建幫、荃灣黑社會；爆眼少女、岳義士、印尼記者、Errrr Sir、阿叻；甴曱、家長車、獅子山脊、人鍊、甴曱、連儂牆；中大、理大、太子站、元朗、新屋嶺；環球時報、重慶大廈、清真寺、黨鐵、甴曱⋯⋯
【稍頓】
畫外音 ： 係咪有咩問題？
年青人 ： 重複咗。
畫外音 ： 你有咩感覺？
年青人 ： 我冇咩感覺只係發現，係囉，重複咗。
畫外音 ： 但係之前都有字組重複，譬如 we connect —
年青人 ： 同埋新屋嶺。
畫外音 ： 你都幾好記性。稍等。
【燈框打在醫生和一對中年男女的上半身，他們身處一窗之隔的觀察室內】
【醫生一面透過玻璃窗看年青人一面向用對講機向控制室的工作人員指示】
醫生 ： Operator 唔該試吓由第 23 幅圖開始，重複 97、07、17 字組。
母親 ： 做咩呀？係咪啲藥唔 work 呀？
醫生 ： 睇返啲 data，佢對敏感字組同畫面已經再無特別嘅反應。
父親 ： 都過咗咁耐啦其實仲會有咩反應？
醫生 ： 心悸、呼吸困難、頭痛，我有病人見到「保鮮紙」「煲蓋」呢類字眼仲會有驚恐反應。
父親 ： 保鮮紙同煲蓋有咩 —【然後想起】哦哦。
母親 ： 咁點算，成世人流流長。
父親 ： 冇嘅，咪唔好入廚房囉 —
【稍頓】
母親 ： 可唔可以唔好講笑？
父親 ： Sorry，我見咁 heavy ⋯⋯咁係吖嘛，既然諗起呢啲嘢係會令佢唔開心，咪盡量避免接觸囉，所以醫生我其實唔係好明，你咁樣 loop 住啲嘢點可以醫返好佢？
醫生 ： 你覺得避開就醫得好？先唔講嗰件事牽連咁廣佢避得幾多？而且學你話齋一世人流流長，有啲 stimuli 你依家都話仲 control 到唔喺佢視線範圍出現啫，第時呢？佢去外國見到人哋啲嘢唔會諗起呀？點避呀？
母親 ： 係啫，每次見你將啲圖片同啲字大大隻咁打出嚟我都好驚，驚佢記返啲唔開心嘅嘢。
醫生 ： 你要搞清楚呢個療程唔係要佢忘記，而係要佢記得都唔好有情緒，我哋係嚟幫助病人將負面情緒同敏感字畫切割，從而得到康復。
父親 ： 即係抽離⋯⋯
醫生 ： NO，好唔同，抽離就靠意志都得，即係有啲人識得將啲對錯嘅 focus 放返喺生存、後果呢啲務實啲嘅嘢就會好返，但係唔係人人做到，但係我哋呢隻藥就唔同，針對創傷、直視敏感字眼，用藥物狠狠咁消除佢哋對病人造成嘅情緒影響，令病人對呢啲嘢麻木。
父親 ： 咁頭先佢發現到有重複字組 —
醫生 ： 係我哋特登擺落去，睇吓重複嘅字組會唔會挑起情緒波動【指出電腦上的數字】睇 data 就冇，包括佢提問嘅時候都冇，即係療程好成功。
母親 ： 咁佢係咪即係好返喇？
【治療室內的字組畫面和朗讀繼續「人權法案、國際文宣、限聚令、暴動罪、禁蒙面法⋯⋯」】
醫生 ： 初步嚟講係，但係你哋唔好咁開心住，仲要 go through 非官方敏感字組。
父親 ： 吓？我以為今日係最後一次。
醫生 ： 你可以完咗佢，但係生活裡面仲有好多隱藏而同呢件事有關嘅字組同畫面，如果你唔清哂佢哋，我唔包保佢會唔會返發，所以我建議病人 go through 埋進階療程，病人本身都想做。
母親 ： 佢想做？佢自己話想做埋進階療程？
醫生 ： 係呀，因為初階療程我哋會提供字組同畫面，都係坊間一啲普遍會牽動負面情緒嘅敏感範圍，嗰個範圍係強制嘅。個別敏感類別，就靠病人自己提供。
父親 ： 而我個仔係有自己供出呢啲「個別敏感類別」嘅？
醫生 ： 嗯。
母親 ： 佢真係想改過⋯⋯咁佢真係好咗！多謝你呀醫生⋯⋯佢肯做初階療程我已經好開心，我冇諗過佢會⋯⋯
【母親開始啜泣】
【治療室內的字組畫面和朗讀「First Aid、守護孩子、星火、遍地開花、齊上齊落⋯⋯」繼續了好一會，父親和母親見到了希望】
醫生 ： 所以我話俾啲時間佢哋，會識諗嘅。
父親 ： 咁進階療程幾時可以開始？
醫生 ： 做埋呢個測試就可以開始㗎喇。
母親 ： 多謝你哋、多謝哂⋯⋯
父親 ： 係喇，嗰啲「個別敏感類別」嘅字組，我可唔可以睇吓？
醫生 ： Sure。
【醫生把一疊紙遞向父母】
醫生 ： 都唔少㗎，呢個仔都幾上進。
父親 ： 「希望、正直、未來、愛、信任⋯⋯」
【父母疑惑】
母親 ： 我唔明，呢啲就係個別敏感類別？我個仔想忘記呢啲嘢？
醫生 ： 你又搞錯喇，唔係忘記，係冇情緒，佢唔想再對呢啲嘢有情緒。
母親 ： 但係⋯⋯
父親 ： 「國家、制度、是非、法律、廉潔⋯⋯」
母親 ： 啲藥可以令佢對呢啲嘢冇情緒？
醫生 ： 係咪好犀利呀？
父親 ： 「家、公義、對錯⋯⋯爸爸 — 媽媽 —」
醫生 ： Well，每個人嘅敏感地都唔同，我哋淨係提供協助，唔會 judge。
【治療室內的字組畫面和朗讀聲繼續】
待續⋯⋯
#待續不是指劇本而是指城市
#紀念612公義未彰顯
#拋磚引玉大家加油
#仲有咩字組會牽動你情緒