我想記錄兩個時刻。

第一個時刻……

噚日嘉賓致辭之後，坐低唱《榮光》嗰下，聽住首歌，望住自己兩年前有份翻譯嘅德文歌詞，陌生又熟悉，又見到有幾個德國人真係企喺度睇住歌詞聽，就已經勾起咗當初嘅回憶……

我歌喉唔好，但係我仍然唱得好大聲好大聲，唔係因為要逼人聽我唱，而係自己真係好想發泄出嚟。

男人老狗，唱到最後，叫到我真係有少少眼濕濕。

兩年啦，其實你話啲感情會唔會消化得哂？話得就肯定係呃你嘅……面對極權輾壓，我哋其實出盡全力，都無可能可以短時間內扭轉局勢。全世界都知，香港人依家仲係輸緊，仲要係輸得好慘嗰種。咁叫得「輸」，就一定係無可能「開心輸」，所以任由時間如何洗刷，都一定會有壓抑。

而之後大家去食飯，我地都有傾呢個問題。我都有話我自己始終覺得，我地做嘅嘢，其實就係喺歷史度留下少少嘅痕跡，幾細小都好，都係留低一個印記。

上一次《眾新聞》專欄入面，我咁講：「歷史的長河奔流，沒有一個人可以不隨波漂流，能否到達彼岸，只能交給上天決定。但在波浪之中，我們仍要堅持，哪怕逆流而上的一刻是白費的功夫。」

到第二個時刻……

跟朋友車落車，我一去到 Römerberg 度，望住法蘭克福一班幫緊手嘅香港人同埋協會嘅理事，會員喺個廣場度走嚟走去打點一切，我個心就抽咗一抽。

因為種種原因，舊年決定離開自己有份成立嘅協會。當時感覺，就好似拋咗個自己有份生出嚟嘅仔出去，要佢自生自滅。

但係新主席 Aniessa 佢肯幫我湊。

搞集會，未必係啲咩艱鉅嘅任務，但係「執行力」少半分都做唔到，同幾個德國城市嘅人協調，邀請唔同嘅機構，政治人物嚟參加，啲海報，音響等等等等，全部都係硬功夫，要成棚人一齊齊心做，先會做得到。

例如話，其中一個有份俾中國制裁嘅歐洲議員 Michael Gahler 都可以出席到，其實都係幫到香港人同德國人講香港議題。

再加上，好多香港人因為見到呢個集會，之前未必認識協會，但有到場支持，好多人都留低咗聯絡方法，之後亦有好多人一齊去食飯。能夠喺德國見到好多香港人，傾返香港人嘅過去，同聲同氣講廣東話，其實都係好開心。

兩年前成立協會嘅倉促決定，無可能完美，但係就好似我上面咁講，我地當初話要搞協會，其實根本就唔係要「贏」，而係盡做我地覺得做到嘅嘢，留下嗰條少少嘅痕跡。

兩年之後，協會可以畀到個 facility 出嚟，喺德國 co-initiate 到呢個如水再聚嘅集會，我諗好多人認為未必係咩大成就，但係起碼畀到一個契機出嚟，畀香港人喺德國延續到少少香港精神，兩年後畀到我兩個感動嘅時刻，幫自己回顧返自己香港人嘅身份。

再一次感謝「攬炒巴」劉祖廸、Hongkonger in Deutschland e.V. 香港人在德國協會入面每一個幫手嘅理事，同埋有份幫手嘅每一個人。

真係好多謝你哋！

 

作者 Facebook