【燈打一汽車後座，一家三口爬進去，一坐好妻子就為中間的兒子繫好安全帶，而丈夫則將手機交給兒子打電動】

畫外音： 時代廣場？
妻子： 係呀唔該。
畫外音： 要兜另一條路喎因為 —
妻子： 前面堵路吖嘛，知㗎喇我唔介意呀。

【妻子隨即繼續從手機上看直播，手機傳來沸沸騰騰的口號】

丈夫： 你唔好掛住睇直播，傾埋先得唔得呀？
妻子： 有咩好傾唧又唔係走得。
丈夫： 【壓低聲量】我想知你點諗呀！
妻子： 【也盡量克制】咪講咗囉我覺得未使走住呀。
丈夫： OK 咁你覺得幾時先應該走？
妻子： 到時就知㗎啦依家傾嚟有咩意思？
丈夫： 得個知囉，我想知你條底線喺邊？係咪要出坦克車你先覺得要走？
妻子： 唔會啦 —

【手機內傳來發射催淚彈和人群叫喊聲】

妻子： 搞錯呀又射！離晒大譜……你睇！

【妻子把手機移過一點想讓丈夫看清楚，但丈夫對這種畫面已然麻木】

丈夫： 你係咪真係想佢喺咁嘅環境長大？我真係唔識教，點解釋俾佢知啲白衣人周街打人都冇事？點解釋啲途人係咁俾人 fit 啲差佬都施施然走開咗？再過幾年就到佢，你寧願佢上街定係掛住打機？
妻子： 可唔可以唔好再講呢個話題？
丈夫： 我哋真係要諗吓㗎喇，就算唔係即刻走都要 plan 定，到真係出坦克車嗰陣就太遲㗎喇……

【稍頓】

丈夫： 我想未雨綢繆……點解我哋唔可以傾吓啫 —

【丈夫想拿走妻子的手機但妻子甩開他的手】

妻子： 【盡量壓下聲量和情緒】因為我覺得咁樣好自私呀！啲細路喺出面就嚟俾人打死我哋就淨係諗自己個細路！你讀咁多書唔諗吓點幫啲𡃁仔淨係諗點走佬，咁同啲廢老藍絲有咩分別呀？
丈夫： ……我自私。你為咗你自己老豆要個仔陪你留低就唔自私？
妻子： 我冇要個仔陪我留低，你鍾意可以送佢去 boarding school，再唔係你陪佢過去先，我只係想講我哋唔係冇得選擇，唔使一定要賣哂啲嘢即刻撤走嘅。
丈夫： 你根本就係放唔低你老豆之嘛。
妻子： 係呀你識我嘅時候已經知啦，佢一手湊大我兩姊妹我唔可以掉低佢唔理。
丈夫： 咁點解你細妹又可以？
妻子： 救命呀我哋可唔可以唔好重複呢啲 conversation？

【稍頓】

妻子： 你要我問我都問過喇，佢唔會跟我哋走呀。我冇嘥時間同佢拗因為佢唔會明，你以為佢當年都係著草落嚟佢會明但係佢唔明㗎……所以我唔走得住。

【妻子看著他】

妻子： 同埋我都真心想留得幾耐得幾耐……睇吓仲可以做啲乜……可能冇你諗到咁 worse 呢？我唔信啲白衣人同差佬咁樣打人都冇後果！未輪到佢哋啫……
丈夫： 你講法治呀？定係報應呀？

【妻子也感到洩氣，蓋起手機】

丈夫： 你幾時先明？法治已死壞人當道呀，議員同黑社會握手呀，影埋都冇佢乎。以後香港就係何妖呢啲人嘅天下，你真係唔怕？

【妻子發現前座座位底下的異物，瞄一下倒後鏡】

丈夫： 冇希望㗎喇冇嘢可以做到㗎喇，要睇住佢咁衰落去真係好難過……啲細路仲傻更更想守住啫，我哋做大人冇理由唔醒水……

【妻子用手機急打短訊（可投射短訊內容，不顯示亦可）】
【短訊內容「唔好再講嗰啲嘢，望吓座位底。」】

妻子： Send 咗個地址俾你，快啲望吓吖。
丈夫： 望咩唧未去緊囉。
妻子： 個入口有啲難搵，你望吓先啦！
丈夫： 咁攞返個電話嚟 —
兒子： 喂呀！
丈夫： 喂咩呀？今日俾你打咗好耐喇……

【丈夫看短訊，也瞄一瞄座位底】
【丈夫打回覆：「點解會有個頭盔嘅？」】
【妻子：「好明顯啦 — 家長車呀！你睇吓倒後鏡張貼紙。」】
【丈夫：「Shit……」】
【妻子：「叫咗你唔好喺街講移民啦！我依家好想搵窿捐呀！」】
【冷不防兒子伸手把前座底下的頭盔拉了出來，還跌出一個豬咀，夫妻急忙把東西塞回去】

妻子： 唔准多手！
兒子： 媽咪，乜嘢係「家長車」呀？
丈夫： 殊！Sorry……

【良久，車程越見漫長】

丈夫： 多謝哂。

 

#留低固然難走嘅亦都唔容易
#拋磚引玉大家加油
#經建議改名

作者 Facebook