最近（其實都唔係最近），香港發生好多事，多到好似所有嘅計劃全部都追唔上改變，搞到連歐國盃咁大型嘅比賽，我都幾乎冇乜心機睇。

荒謬嘅事愈來愈荒謬，無稽嘅事愈來愈無稽。作為一位創作人，望住香港嘅創作自由隨住「制度」不斷萎縮。以前成日笑大陸嘢題材乜都禁，穿越唔畀寫、愛情故唔可以寫咁甜等等，估唔到而家香港就好似大陸咁隨時乜都唔畀寫，寫警隊又驚你話抹黑、拍爆破場面又驚你話煽動叛亂，所有創作都被無限上綱上線，仲講咩創作自由；

作為一位現職記者（實不相暪，我係記者），望住《蘋果日報》被「莫須有」到一星期內幾乎要執笠，就算幾唔鍾意《蘋果》都好、笑佢係「毒果早抖」都好，都冇理由咁樣被搞死；同時間你望住呢行已經窄到唔係東家就打西家、人工入行仲少過做樓面、做十年人工依然冇兩萬嘅行內環境，偏偏仲有一班人抱住「做得記者就唔係諗住搵錢」嘅心態仲得幾耐得幾耐。大佬啊，喺呢個乜都講錢嘅香港地竟然唔諗錢，仲要心口掛住勇字追尋真相？真係好好笑，行家自己都會笑自己戇居，但大家都知有啲嘢唔係用錢衡量，有嘢比錢更加值得追求，呢個唔係偉大，而係單純真係想咁做；

作為香港人，唔使再多講真係灰心到沒有最差只有更差。黑白愈來愈顛倒，歪理愈來愈荒謬。當大家以為兩年前社運已經差到冇得再差，但事隔兩年大家先知原來沒有最差只有更差，甚至預視到呢種差係會急劇下降到無止境嘅地步。已經唔係講政治咁單一，而係社會民生議題同樣千瘡百孔：一街都係講普通話嘅小朋友、唔知邊到又起個零作用嘅大白象工程、有病排隊睇專科隨時未睇醫生就已經等到病入膏肓、日日望天打掛幾時上到樓，到後來至發現原來啲樓起撚哂畀新移民……醫療定係教育，住屋定安老問題，樣樣都千瘡百孔，求其喺街邊問個香港人都答到你，因為講到口臭都仲係嗰啲問題；

灰心，點會唔灰心，我都好難正能量地叫大家樂觀面對，高呼我哋好撚鍾意香港，而事實上有邊個心底最真實嗰句唔係：我哋其實一啲都唔撚鍾意香港，因為今時今日活喺呢個不似香港嘅香港，真係好撚辛苦。

不過，灰心當中都只可以繼續生活，走定唔走無謂討論，走嘅人，希望你生活愉快；唔走嘅人，希望你一直平安，好好生活，有開心嘅盡情開心，可以笑時盡情地笑；攰時請好好休息，唔開心時正面面對，好好喊一場，唔開心係 OK 的；好好調理心情，好好裝備自己，好好活下去，共勉。

 

作者 Facebook