【文：霍梓楠老師】

上篇提到，不少同工被學生「掛機」傷害過，我也不例外！有網課達人向各位同工推介各種各樣方便教師實時收集學生回饋、提升學生專注力的工具，似乎形成一種壓力。

我的網課其實以提問、講解、實驗示範為主，很少用到那些工具，原因如下：

  • 對於能力較高的學生，他們較需要高階思維的訓練而不是止於背誦知識。比起他們透過工具給我實時但簡單的回饋，我覺得向他們個別提問較深入的問題更有價值。我會就他們回答的盲點或漏洞，調整講解重點、指引他們另一種思考模式。這種師生對答過程對其他學生都有得著。
  • 高中學生與我已建立一定默契，他們希望我紮實解說概念，自然無須使用額外工具。除了課堂對答外，我也可從他們的功課得知教學效能。
  • 我校大部份學生都願意開咪回答問題，雖然初時有些同學沒有自信開咪，但花一些心思鼓勵他們通常已OK。而且每班總有搞笑、唔怕醜同學幫我暖場！

我就算真的要運用那些工具，都會著力令當中的「內涵」配合我的教學風格，例如會設計一些陰濕的選擇題，又加入一些好玩的選擇。我希望做到，吸引學生的是選擇題本身有趣、有意義，而不是選擇題工具所提供的聲畫。

我同意它們一定有用處，不過要視乎其功能可否配合：學生特質、學科本質、課題目標、教師風格等等。對於學習動機、能力較低的學生，那些聲畫俱備的工具的確讓他們更易牢記基礎知識（要知道他們在課後，可能因種種問題根本不會溫習所學），也可以令專注力較弱的學生得益、有成功感，教師可乘勢鼓勵他們更主動學習。

不過，如果只以那些工具進行低階思維的教學，又或者只讓學生隨興發揮但沒有有效的指引及總結，學生可能玩得開心，覺得時間過得很快，但這樣做是否對所有學生都有益呢？這樣做有點像軟性的監控 — — 透過讓學生持續作出回饋（但不追求深度），只求他們不會掛機就算完成任務。

其實，是否監控力度愈強、愈細密，就愈能減少掛機情况、愈增加網課效能呢？就算學生沒有掛機，又是否代表他們學得好呢？他們掛機其實原因是甚麼呢？

我承認我很有野心 — 我想讓我的學生有被信任的感覺，所以傾向減低「監控」程度，例如很少要求學生開 CAM，也不會頻繁要求他們回答簡單問題。

不過這不代表我放任他們  — 我會執著於「嗌名後學生必須要有回應，就算唔識答都要重覆番我條問題，起碼你要知道我問你乜嘢」，否則「後果嚴重」：我會當住全班隔空問佢原因，對於屢犯者，我會在課後致電他甚至家長。我向他們解釋為甚麼要執著這個「規定」：真正的對話不正是上課最珍貴的元素嗎？這當然也是監控手段，但我會讓學生明白監控目的是甚麼，更希望他們理解並同意我的規定。

我當然有任教能力較普通的班別，當中有練精學懶的，也有因我校競爭激烈而失去自信的，尤其是初中學生，不容易自律（我其實明白他們年紀還小啦）。我也遇過慣性掛機的同學，他們總覺得自己不會那麼「倒霉」被我抽中答問題。

我如何應對這些情况呢？也許多些運用有趣工具會令他們更專心，但我始終覺得不一定要依賴它們。以下是一些我的網課點滴：

（我「叫醒」疑似掛機同學後）「我有時係度諗，如果有人發明到將晶片植入你個腦，我就知道晒你哋上堂諗緊乜，自然知道你哋有冇掛機啦！」

「阿 sir 你講緊 Cyberpunk2077？」（這是一款角色扮演電玩，內容雖然充斥暴力與色情，但當中有探討令人深思的哲學及道德議題。學生就算沒有玩過，他們可在 YouTube 看到遊戲內容及 walkthrough。）

「喂！就嚟考試啦，你唔係玩緊吖嘛？同埋呢個 game 唔啱你呢個年紀玩喎！」

「冇冇冇！我都係睇廣告啫！」

「不過咁樣植入晶片係咪真係好呢？我自己都唔想畀人咁樣監視住啦！雖然總係間中有人冇聽我講嘢畀我鬧，不過我都依然選擇信任你哋，唔使成日開cam去證明你冇掛機。呢度嘅信，係指信你哋最終都會做得到，領略到知識嘅奇妙，自然就唔會掛機啦！不過其實，你哋唔敢掛機會唔會都係因為驚畀我問中問題唔識而俾我鬧？」

「係呀！」

「……不過我其實想你哋係因為我嘅魅力，吖唔係，係科學嘅魅力而留心聽書！哈哈！好啦，跟住我想問嘅係……」

「你做乜唔交功課？」

「我病咗呀！」

「你唔早啲同我交代？我點解要信你？」

「咁我畀啲藥你睇囉！」

「你諗下我點解一開始唔信你？」

「……」

「如果你平時做得好、有交帶，咁我唔會用咁嘅語氣質疑你。聽你語氣好似有啲不爽喎，隔住個 mon 我都 feel 到呀！你係咪覺得病咗仲要咁畀我冤枉好慘呀？咁你要諗下平時要點做先會令人傾向相信你啦！……我咁樣懷疑你，你冇嬲我吖嘛？」

（某同學答完我問嘅問題之後）

「你哋同唔同意呢位同學嘅答案同解釋呢？同意就喺chatroom打+1，唔同意就打+2……搞到我好似開緊實况咁，哈哈……睇下結果先，咦？呢位同學打咗+3，你一定有特別見解，快啲開咪講下呀！」

「我記得你中一嗰時冇咁怕醜喎！快啲開咪啦！我想聽下你把聲，好耐冇聽過啦！」

「跟住講嘅嘢，我諗有同學已經明咗，不過我都想你哋全部都聽番，點解？因為都想你知道其他同學嘅學習困難，佢哋未必好似你咁自動諗通咗，你自己冇意識到原來這個思考過程係有難度。所以我係教埋你點樣教人啦！有冇人大個想做老師？冇？因為唔想好似我咁長氣？」

同工可能已經觀察到，我運用的來來去去都是同一個套路：網課內容是與學生有連繫的，他們會聽到我當時的思想感受，也會知道我意識到他們的存在。除非他們鐵下心腸完全不聽我說話，否則他們總會從中感到一點「溫暖」吧！

就算有掛機學生逼到我要致電給他甚至家長時，我總會補多幾句體諒說話，例如我會對學生說：我明白咁樣上堂未必好有氣氛，要自律唔係咁容易……對家長則會說：其實全港好多學生家長都好似你咁焦慮，其實佢又唔係衰到貼地，我哋都做過青少年啦……等等，這種人本交流工作，互相理解對方的難處，其實一樣重要。假如我們只著眼於監控手法或者滿足於罐頭式對答，其實會失去很多改善視况的契機。

教師需要視乎學生特質與師生關係，在監控與信任之間取得平衡點，讓學生感到尊重之餘，也讓他們明白得到老師或別人的信任並非必然。也許過程中學生會利用教師的信任欺騙教師，但當師生相處時間久了，互相了解後，這些欺騙信任的片段可以是成長的催化劑。

教師的時間、精力有限，我也會接受總有學生不領情的事實。我清楚知道坊間有很多好好用的工具，但我不會逼自己短期內深入認識它們然後出神入化地運用在課堂上。我從來不會抗拒使用他們，只是我會優先處理，有甚麼平日正常在課室上課的重要元素，因為變成網課而缺失了，在網課中如何作出補救呢？站穩陣腳後，再看看是否有必要用它們吧！

同場加映：

既然這個專欄的定位是數理科教學，我就寫少少教學點滴 — —

早前的中二綜合科學，教到效率（Efficiency）公式：

Efficiency = useful power output ÷ power input × 100%

其實學生在中一時已經學過這條公式，不過中一時是以「能量」去計算效率的：

Efficiency = useful energy output ÷ energy input × 100%

對於能力普通的同學，我會問：「這兩條公式有沒有矛盾呢？為甚麼？（順道鞏固功率 power 的意思。）」

問完某幾位學生、講解完之後，我會說：「你哋可能會覺得，背咗佢，到考試時代番啲數入去咪得囉！喂！我接受唔到囉！你要思考你新學嘅嘢同之前學嘅有冇衝突，咁樣先叫學嘢嘛！」

接著，我問另一位同學，效率有沒有可能大於100%。

「應該冇。」

「你肯定？」然後我在iPad上寫一段「似是而非」的數式，總之答案是200%。「咁得唔得呀？」

「咁應該得！」

「喂！唔好我寫到好似得就得喎！你要講點解喎！」

「er……」

「記唔記得中一學過乜嘢呀？關於能量呢……」

「er……」

「唔記得咗啦？係能量守恒定律呀！如果 output 可以大過 input，咁就好理想啦！不過現實唔得吖嘛！數學上寫到出嚟大過 100% 唔代表現實一定可以呀！喂！你學嘢要諗番啲嘢合唔合理先得吖嘛，啱啱先講完，唔係背完條式就叫學咗呀！如果係咁，人哋同你講乜你就信乜，咁樣叫學嘢咩？！唉，我又長氣咗啦……」

作者網誌