《蘋果》停運生退休念頭 次文化堂社長彭志銘：做咗32年，未見過咁兇險
「我做咗32年，係未見過咁兇險。」次文化堂社長彭志銘嘆道。次文化堂曾以出版諷刺前特首董建華的《老懵董》，以及嘲諷保安局局長葉劉淑儀的《掃把頭》打響名堂，亦曾出版不少時政書籍，當中部分更已被康文署下架。彭志銘坦言為免招惹麻煩，今年不會將時政書籍帶到書展售賣，但會如常售賣講述粵語文化的書籍。
去年7月1日，港版國安法落實，緊接舉行的書展，成了社會關注的焦點－－甚麼內容會觸犯法例、執法準則為何，一眾書商當時仍一頭霧水。最後實體書展兩度延期至今年才舉行，彭志銘說直至《蘋果》資金被凍結前，他仍在猶豫要否把《六四三0》帶到展場售賣，但「蘋果出事係個清晰嘅轉折」。
大半生都為出版事業勞碌，彭志銘說，當初開出版社總有些願景想達到，如今回望，卻頓覺疲倦無力：「做呢行，唔好叫『使命』咁巴閉嘞，唔多唔少我哋都有啲嘢想做到。但你而家係做唔到㗎，無可能做得到，係包你無得做。」
在經濟疲弱、書展延期、國安法落實等衝擊下，稿源減少、社會環境沉重，都讓經營出版社更為艱難。65歲的彭志銘說，最近想過要退休，「以前都唔會咁諗，以前唔諗呢啲㗎」，但《蘋果》出版最後一份報紙當晚，他踏著將軍澳這片土地，面對眼前景況，卻頓生要唞唞的念頭：「整個社會氣氛，令到人唔想再面對呢啲問題。不如休息吓，唔係話執笠，可能休息下，再做第二樣嘢，好過你喺度都唔知做乜。」
兩度延期的書展，最終於今年7月14日至20日舉行。過往參展商出售的書籍百花齊放，但去年港版國安法生效後，書商籌備書展時，要考慮因素不再只是書籍受歡迎程度，而是會否觸犯法律。
次文化堂社長彭志銘從事出版業32年，自1990年首屆書展開幕起，每年從不缺席。他形容，書展收入對書商而言極為重要，去年書展取消，對出版業界打擊很大：「每年喺書展7日嘅收入，係頂住我哋成年嘅生意。舊年無咗一屆，你知唔知，即係我哋死捱死頂咗一年。」
今年總算能開檔，但隨即迎來更難解決的問題：「我哋一直研究緊咩書可以帶去。」國安法界線模糊，書商唯有從其他蛛絲馬跡猜度，摸石頭過河。康文署屢次以檢討書籍是否違反國安法為由，將書籍從公共圖書館下架，當中包括次文化堂所出版的《夢見習近平》、《香港保衛戰》等等。彭志銘認為是個訊號：「雖然唔係話一定係禁書，但圖書館都係偏向政府部門，你哋自己都會咁驚、你哋自己都唔知條紅線喺邊度，你哋自己都自己下架先。咁叫我哋唔係政府嘅有關嘅人，仲點睇到嗰條規例喺邊度呢？咁既然我地見唔到條紅線喺邊度，大部分參展商都決定，唔好帶嗰啲令佢覺得你有問題嘅書。」
去年書展原定7月15日舉行，港版國安法落實，只不過是兩星期以前的事。是否設追溯期、審查的標準，社會眾說紛紜，有書商當時已決定收起時政書籍。但彭志銘坦言，由於當時有傳不設追溯期，按他理解，於2019年出版的「六四三0」亦應不受規限，「我哋話應該無問題呀，佢話唔追溯架嘛...如果舊年搞得成，我哋可能已帶咗去」。
這年間，他仍在躊躇，直至《蘋果》停運，成為了彭志銘決定收起有關書籍的轉捩點。
蘋果出事之前，我哋仲研究緊，但而家我哋就肯定唔會帶去，呢個就係個好清晰嘅轉折。
把時政書籍收起，彭志銘坦言為了安全渡過展期，亦是無可奈何：「我話避免麻煩，就係唔好比佢嚟騷擾你，譬如有人報警又好，圍咗橙帶又好，你都好麻煩啦！你個檔口畀佢哋視為觀察對象，咁你都好煩啦！無必要去招惹呢啲問題。」
「做咗32年，係未見過咁兇險。」
三年前，彭志銘曾在訪問中表示，具中資背景的書局不會入諷刺時政的書籍，但起碼仍能在書展，或部分獨立書店發售，如今卻已成過去。
「我做咗32年，係未見過咁兇險。」彭志銘嘆道，明明自己只不過是一間正常的出版社，卻變成了高危行業。他續道，以往香港也有「禁書」，過份色情、暴力的就要入膠袋，違反規例也多以罰錢處理，規例、懲罰都很清晰。如今面對《國安法》，界線模糊、未審先還柙、他反問道：「我哋係唔想犯法，但個法例係咁嘅時候，你叫我哋小市民，點樣處理呢件事？」
以往，每年彭志銘都會找些稿源，將他們的評論或專欄結集成書，今年是首次不成事，沒有作者答應請求。「大家以為可能佢哋係擔心國安法，但我都話，佢哋啲文喺報紙度都出過喇，應該危險程度唔大。」他透露，有作者拒絕的原因是不想回顧一年前的言論。
「因為嗰啲預測、評論，都好似變成廢話。而家係一個陌生、無準則嘅年代。第一佢愈睇愈難過，第二係佢都唔想將呢堆『廢話』集結成書。」彭志銘嘆道，聽到後感傷心、也感悲哀。
經濟疲弱、書展延期、本對書商已是雙重打擊，但尚可憑信念堅持。捱過這一年，最後迎來《蘋果》結業，觸發彭志銘對事業的反思。
「會有諗過（退休），以前都唔會咁諗，以前唔諗呢啲㗎。係真嘅，係蘋果出事之後嗰晚，我真係有諗嘅，我有去到將軍澳門口，去到嗰度影相、做啲記錄，嗰晚見到嗰個景況，我係真係有諗。」
畢竟次文化堂曾出版多本諷刺政治的書籍，作為創辦人怎也有些願景想達成？彭志銘坦言願景是有，但近年出版業相對疲弱、書商生存艱難，加上如今處處受制，不免有點疲倦：
第一、你搵唔到好嘅稿源。第二、你啱啱都講喇，做呢行，唔好叫『使命』咁巴閉嘞，唔多唔少我哋都有啲嘢想做到，但你而家係做唔到㗎，無可能做得到，係包你無得做。第三、係整個社會氣氛，令到人唔想再面對呢啲問題，不如休息吓，唔係話執笠，我哋可能休息下，再做第二樣嘢，好過你喺度，都唔知做乜。
「係做到好疲乏、唔想再喺度纏繞自己。你做嘢幾攰都好，但如果有回報、或者大家一齊『齊上齊落』咁你先爽架嘛，但你自己一個人企喺度，單打獨鬥咁樣，係做咩啫？同埋你一過人頂得幾多？喂（公司）真係得返我一個喺度頂架咋。」彭志銘苦笑道。
觀看原文： 按此連結