反送中塗鴉變「清潔體」 延續抗爭訊息 MC仁：空間本來就屬於公眾！
城市裡的許多痕跡，無論是每天路經的隧道、天橋，還是坐車經過的路上，那塊在灰白牆身上「一撻撻」不協調的深灰格仔，或幾經洗刷但仍隱約可見的字痕，提醒著香港人兩年前經歷過的種種。
有「亞洲塗鴉第一人」之稱、本地Hip Hop樂隊LMF的主音MC仁，稱這些為「清潔體」，以新模樣呈現原有訊息。他眼中這些塗鴉不僅是延續抗爭，更是各種表達手法湧現的開始，「將自己個城市觸覺變成——我喺條街度唔只係行街買嘢，我係睇條街有咩message。」他接受眾新聞訪問時形容：「啲人而家先醒，先知道原來嗰啲空間本來就係屬於公共，公眾有嘢講，用嗰個空間其實係好合理。」
MC仁原名陳廣仁，1990年到法國修讀視覺藝術，接觸到Hip Hop文化並開始塗鴉。1997年回港，2年後與其他獨立樂隊成員組成本地元祖級Hip Hop樂隊LMF，是隊中主音之一。他曾被雜誌《TIME》稱為「亞洲塗鴉第一人」。轉眼廿年，LMF早前再度被提起，是因為廣播處長李百全抽走了港台一集節目——訪問了LMF的《香港故事：疫行者》，並批評樂隊唱粗口歌「唔decent」。
走進他的工作室，彩色布條覆蓋天花板，令人彷如置身帳幕之內，五色風馬旗則對角懸掛在布條下面。鵝黃燈光灑落，環境看來有點亂，但每個擺設都饒富玩味，像是尋寶。一臉花白絡腮鬍的MC仁推門進來，穿著白色短袖襯衫、頭頂黑色小禮帽、腳踢拖鞋。坐下來點一支煙，談香港也談文化。
「LMF officially 2002年已經正式解散，你點會有個人2020年（2021年）先嚟話ban呢隊band、先話佢哋啲嘢『唔decent，我要ban你。』咁佢好錯，officially 人哋解散咗廿年，你ban乜嘢啫？」MC仁說話無尾音，接續開火：「調返轉頭，用censorship去做嘢，係話畀人知你無創意，唔識鼓勵人諗啲新嘢回應舊問題。」
港台當然不是個別例子，無形的自我審查在城內浮現。自港區國安法去年6.30實施，「光復香港 時代革命」八個字被視為禁忌，MC仁覺得這是政權的「愚蠢」：「佢咪更加highlight咗某樣嘢，或者畀咗方向啲人去針對佢。」甚至乎，他覺得這成了一個契機，激發人們思考。民間因而衍生很多二次創作，例如將一些三角形、圓形拼湊起來，不知怎地可能讓人聯想到「光時」。
「表面上好似啲人散晒啫，其實唔係，啲符號仲喺度，啲符號仲喺度。」文字變成符號，這改變算是屈服於政權嗎？MC仁反問：「你將佢變成符號，係將件事簡約化，唔係表示淡化。」他認為，符號只是令到人更快、更方便書寫，「你既然咁容易寫，咁咪寫多啲囉。」
反送中運動留下的符號，仍然可見於街頭巷尾，簡單如幾個數字「721」、「831」，又或是「光復香港」等字眼，多數是油漆或貼紙。MC仁認為，這些當然都是塗鴉，傳統定義上只要是在公共地方的平面、沒有獲授權的展示，在法律上有機會構成刑事毀壞，就屬於塗鴉。他並指，將抗爭意念帶入塗鴉非常普遍，外國早在50、60年代已經有記載各種公共展示的行為。
MC仁指出，塗鴉在近十年的發展，已經演化到「將公共藝術匯入傳統美學」，譬如英國塗鴉藝術家Banksy，作品不只被炒賣，亦佔據新聞版面。2018年，Banksy的作品《Girl With Balloon》被帶到倫敦蘇富比拍賣行，以逾100萬英鎊的高價成交，畫框內置的碎紙機在拍賣行扑鎚後啟動，作品大半部分被碎成紙條，引起熱議。
在香港，MC仁回顧過去兩年，最有印象的公共藝術創作又是甚麼？「最有印象，就當然係10點鐘打開窗口大嗌啦！」他覺得先不管吶喊的內容是甚麼，這樣一個表達、紓壓的空間本身就非常有意義：「啲人識得用集體象徵性、集體符號嚟娛人或者自娛喎，我覺得好好啫，亦都好經濟，用呢啲小小嘅空間，已經幫到人大大咁抒發佢嘅表達意欲，我覺得應該係大力推動。」
至於香港的塗鴉藝術，MC仁認為2019年才是起步：「啲人而家先醒，先知道原來嗰啲空間本來就屬於公共，公眾有嘢講，用嗰個空間其實好合理。調返轉，公眾喺公共空間唔識表達，我先覺得有問題。在外國，人哋係常識嘅一部分，每個大城市都容納唔同嘅表達、唔同嘅聲音。」
MC仁直言，塗鴉只是好基本的表達手法，形容如果一個地方連公廁都無塗鴉，「證明嗰個地方、嗰班人係文盲，唔會用任何嘢去表達自己。」他並說，在外國、在自由世界，塗鴉被人清洗得越快，越加激發人們參與。
相比起2019年有如展覽般的大埔連儂隧道、葵涌巨型海報，今天塗鴉的規模小得多，更多是被清洗、被遮蓋、被撕毀，MC仁稱這些為「清潔體」，以新模樣呈現原有訊息。「佢都唔係真係清嘅，香港就係咁——扮做就當做咗，做咗就當做好，我哋都見到嗰個層次。」他續指，香港大部分的公共平面都是灰灰白白，但當政府想用一隻顏色蓋過原有塗鴉，往往會用上不同程度的灰色，「就更加無一個劃一嘅灰，結果越整越難搞，越highlight件事。」
這樣說來不是頗愚蠢嗎？「梗係啦！人類表達係天性嚟嘅。」MC仁說得直截了當︰
你去控制或者扭曲別人嘅表達呢，係反智行為，你應該更加開放多啲平台，等人講完咪算囉。啲人講嘢啱定唔啱，係由別人決定；個社會係咩shape，係由大眾決定，而唔係由權威決定。但係，權威對人哋寫幾句嘢都咁敏感，係個權威好脆弱先會咁。
MC仁相信，更多的表達手法會陸續湧現，正如十幾年前圍住立法會苦行，當時被視作驚為天人、極有創意的抗爭模式。他說，外國的發展已經不只是街上塗鴉幾個字，譬如有人想表達幾個數字，「比較搞笑嘅，係外國街上火車站啲鐘，啱啱7點幾多分，（例如）7點31分被人剪斷電線，咁所有鐘停頓喺7點31分，唔需要留痕跡，大家笑一笑。」
香港人用咗幾十年去淨係同自己講，我喺呢度得一個目嘅，就係搵食，無第二樣目的，但係到2019之後，香港嘅新一代可以有新嘅做法，就係我究竟對於呢個地方有咩感情、有咩感覺，而家唔係淨係搵食，而家就係培養嗰樣嘢。
「近呢兩年我哋開始感覺到香港未來會有文學，有文學先有其他嘢。班後生仔願意唔諗搵食，我諗『究竟意義何在』，已經係最大嘅意義！」
觀看原文： 按此連結