林鄭連日FB支持運動員 何安達：有少少做出嚟咁
港隊在東京奧運歷史性連奪兩面獎牌，政府高官如何回應亦引起注意。特首林鄭月娥連日來在Facebook發布照片，顯示她與一眾高官在辦公室觀看電視支持港隊。曾任特首辦新聞統籌專員的何安達認為，這予人「做出嚟」的感覺，未能讓外界感受到她的喜悅和對運動員的支持。另外，劍擊運動員張家朗星期一（26日）晚奪金後，財政司司長陳茂波搶先恭賀張家朗，何安達亦質疑政府內部缺乏統籌，結果容易引來外界許多不必要的猜測。
港隊在東京奧運創下佳績，特首林鄭月娥連日來在Facebook發布照片，顯示她與其他官員在辦公室內，觀看港隊賽事以示支持。惟前特首辦新聞統籌專員何安達認為，林鄭今次的民意工程並不理想，批評她的做法未能讓外界感受到其喜悅，甚至有「做出嚟」的感覺。「你睇到，同人哋喺酒樓食緊飯、擺低筷子一齊拍手掌（相比），佢就喺辦公室裏面一張長檯，即係完全唔係嗰個氣氛，有少少做出嚟咁。」
何安達指出，政府今屆大灑金錢購入奧運轉播權，又在各區康文署體育館直播賽事，質疑「點解特首唔可以走落是但一個場同人一齊睇？」他認為林鄭大可以落區與公眾一同觀賞賽事，予人更好的觀感。
何安達又認為，政府不應在運動員贏得獎牌時，才發文支持他們。他直言：「人哋攞咗金牌先恭喜人，遲唔遲啲啊？你應該成隊香港隊，邊個得邊個唔得，你都應該俾人感覺到你支持緊佢哋。」他認為，如果政府官員特意在運動員出發前訓練時現身支持，才能讓外界感覺到政府一直在支持香港運動員。
星期一（26日）晚劍擊運動員張家朗奪金，財政司司長陳茂波隨即在個人Facebook發文恭賀，特首林鄭月娥在6分鐘後才發出新聞稿祝賀，惹來二人「鬥快」的傳言。他坦言此舉令人感覺陳茂波比林鄭月娥更積極支持香港運動員。
何安達認為，傍晚時分已知道張家朗打入決賽，特首辦理應一早預備祝賀文稿。「老老實實，你明知佢打到決賽，贏好、唔贏又好，你講乜嘢一早應該準備好㗎啦。佢一有結果嗰下，就可以即刻㩒出去啦。甚至唔需要稿，你即刻攞架機出嚟，YouTube、Facebook即刻講兩句都得啦。即係我唔係好感覺到個喜悅。」
不過何安達表示，陳茂波作為財政司司長，理論上不應早過林鄭發文，否則容易引來外界猜測背後原因。「第一，根本唔應該快過特首；第二，根本唔需要兩個出。咁你兩個出完，點解其他人唔出？啲問題就嚟啦。跟住你出得快過特首，啲問題又嚟啦。」
何安達不願估計陳茂波搶先發文的原因。惟他強調，過去面對奧運等類似情況，特首辦都會預早協調，認為可能今次特首辦缺乏統籌，導致混亂。「可能真係漏咗招，唔記得話特首出先。以前呢啲嘢，我哋同啲新聞秘書、幾個司長辦公室，一定有夾，一定有個部署。」
觀看原文： 按此連結