前「區佬」無悔辭職 辦團購「香港人清酒」 冀延續地區服務
政府今日終於敲定區議員宣誓安排，將分批向211名沒辭職的現任區議員發出宣誓邀請函，未有如之前傳媒引述政府消息指，直接發信指區議員不符合宣誓資格。有已辭職的區議員表示，不後悔辭職決定，如今反而如釋重負。
深水埗區議會前主席楊彧說：「呢啲嘢（政府處理手法）無人知，你辭咗職可能避過咗更加辣的招數呢，可能留低的依家無事，你又唔知未來，把刀幾時斬落來」、「我真係諗未來條路點去行，唔需要再記掛，單新聞已經唔太關我事，你鐘意宣咪宣。」
另一名已辭職的油尖旺區議員蕭德健，亦同意楊彧的說法：「我諗緊如果唔辭，我已經精神崩潰」、「（7月初）個陣時會諗，要唔要離婚啊、要唔要轉移資產啊、同屋企脫離關係啊，依家係安心咗，亦都開心咗。」
辭職後，楊彧和蕭德健同樣要養妻活兒，但他們沒有離開社區，近期更決定與其他辭職區議員合作，開辦團購活動售賣「香港人清酒」，期望所得收益能支持辭職區議員再續地區工作，同時亦支援在囚人士進修，做到香港人能夠養活自己的「民選議員」。
楊彧說：「我唔知呢個方法會唔會Work，但我希望透過呢樣嘢發掘吓呢條路，係咪可以行落去，之後唔一定賣清酒，可能街坊想要的服務，而我哋又可以有經濟的收入」、「希望成為大家留低做地區工作力量的來源。」
蕭德健說早在今年年初因初選案大抓捕，已經開始構思團購計劃，當時他認為區議員將會面臨DQ危機，應該及早準備後路。再加上蕭在任區議員期間，亦有做開團購的經驗，「團購本身有社區連結的功能，大家好多時圍埋一齊討論商品、買嘢，係一個共同的集體經驗。」「其實（以往）團購好少我哋做，係有班街坊好主動去幫手，一齊揹起所有嘢，派貨之類。」
蕭德健記得，團購街坊來自五湖四海，連專業人士都會加入討論、買賣過程，「雖然佢唔係practice緊佢嘅專業能力，但佢嘅文化知識層面，拉高哂成個水平」、「例如我哋講文旦柚，我哋通常信街市，但專業人士就開始分析，文旦柚來自台灣的老樹，老樹要二十年先叫老樹......又例如清酒，清酒又分吟釀、大吟釀、純米吟釀......」
本身是政治素人的蕭德健認為，過往區議員較典型工作是服務街坊，接個案、協助填表等，假若區議員一旦失去議辦，很難再找到落腳點，但這屆的區議員反而多了與社區組織、店舖合作連結，變相會更容易聯絡到良心小店、組織，當要辦團購時，就能讓街坊自行組織，不再是單向式依賴區議員的關係，「點解我想留喺社區的原因，因為真係多咗好多連結，我哋識多好多人，唔係純粹你買我賣的關係，真係朋友。」
之後有商鋪向他提議，物色到來自福崗博多百年釀酒廠的清酒，以清酒的包裝，包含著香港人過去兩年的經歷，「嗰間酒廠本身支持香港人，好出奇地呢兩年好多日本人支持香港人」、「佢哋肯俾我哋換商標」，他所指的是，廠家願意讓出招牌商標位置，改為配上「香港人」三字，蕭德健之後更找來書法家余在思題字。另外，酒標的其他位置則印上「我真係好L鐘意香港」等多國語言版本，「其實我哋香港人裡面，會唔會較少提及少數族裔呢，都係我哋想帶出香港人內涵的message。」
嘆反應較預期差 楊彧：部分人意志消沉
由與酒廠洽商到成立公司，蕭德健等人最終在5、6月拍板計劃。就在拍板後的7月初，政府放風將大舉DQ議員，並有傳會追討被DQ議員上任至今的薪津，觸發民主派區議員大規模辭職潮。蕭德健就找來楊彧這個政壇前輩，向他提出合作計劃。
楊彧今年7月初宣佈辭職，結束了他八年的區議員生涯。辭職當日，街坊在海麗邨議辦依依不捨的畫面歷歷在目。兩個月過去，楊彧沒有離開這個社區，繼續在當區借用地方，不定時為街坊提供服務。
楊彧說，直到辭職後，他才開始思考前路，「唔止係我，其他辭職區議員點樣過，留喺社區，我先諗，呢個清酒（團購）係有得做，值得做」，於是他更積極參與這個「香港人清酒」團購計劃，由蕭德健負責行政工作，楊彧負責聯絡其他辭職區議員。
楊彧透露，至今有約20已辭職區議員如羅健熙、林兆彬、趙柱幫等加入團購計劃，但他認為反應較預期差。他解釋有人因為家室問題，也有人因為移民，但部分是因為對政治前景心淡，「我哋主觀願望係，希望區議員仲留喺區入面，唔好話『不是區議員』，就放棄地區工作，但我發現唔少區議員意志消沉，覺得做政治或地區工作無前景㗎啦。」
那麼，兩人為何會選擇堅持，繼續另覓地區工作的出路？楊彧解釋道：「我好彩搵到地方落腳，我唔知呢個方法會唔會Work，但我希望透過呢樣嘢發掘吓呢條路，係咪可以行落去，之後唔一定賣清酒，可能街坊想要的服務，而我哋又可以有經濟的收入。」
「希望成為大家留低做地區工作力量的來源。」楊彧續說，他認為不少前區議員在任期間都做得有成績，成功連結了社區，但大規模區議員離開，意味公民社會的崩塌，所以他不希望社會氣氛一下子變差，「做得幾多得幾多囉，試吓囉。」除了再續地區工作之外，蕭德健說，在任區議員時已經知道不少在囚者例如監禁期較長，或年紀較小的人士，都有進修的需求，而相關開支亦不小，期望計劃的部分收可以提供幫助。兩人期望今次「香港人清酒」計劃賣到3000至5000支，摸著石頭過河，日後再探討更多可能性。
辭職至今近兩個月，他們兩人都明言，沒有區議員身位的話，地區工作面對很多困難，楊彧舉例指，不能及時跟進地區工程，「（部門）唔需要通知我哋、互委會啦，做緊開工啦，我打過去又留言，都無覆我。所以啲街坊完全無渠道去了解。」
民政事務局局長徐英偉曾接受傳媒時說，區議會效率很差，而政府有多個部門都確保運作、服務繼續，不會因為一個諮詢架構不運作受影響。
但楊彧就反駁指，近日消費券風波鬧得滿城風雨，他以選區的屋邨街坊為例，文化水平或相對較低，政府解說不清楚的時候，此時更需要區議員的支援，「當民主派消失咗，你唔好假設建制派會做嘢，建制派係更加唔需要郁，無選舉嘛。」他慶幸自己在辭職後，續租議辦至8月底，所以基本上已經處理好當區街坊有關申請消費券的問題，「如果佢消費券遲多兩個月先派呢，情況真係不敢想像」、「到時始創（中心）真係暴動都似。」蕭德健認為，民主派離場後，才出現消費券風波，已證明政府施政效率與民主派無關，「若果效率等於做得快，區議會係可能會令效率減慢，但我哋會令事件做得好，令大家滿意同做得Make sense。」
今敲定宣誓安排 兩人無悔辭職
政府今日終於敲定區議員宣誓安排，將分批向211名沒辭職的現任區議員宣誓發出宣誓邀請函，未有如之前傳媒引述政府消息指，直接發信指區議員不符合宣誓資格。楊彧和蕭德健都表明不後悔辭職，楊彧說：「呢啲嘢（政府處理手法）無人知，你辭咗職可能避過咗更加辣的招數呢，可能留低的依家無事，你又唔知未來，把刀幾時斬落來」、「我真係諗未來條路點去行，唔需要再記掛，單新聞已經唔太關我事，你鐘意宣咪宣。」
蕭德健剛表示，自年初的初選案而產生的恐懼，已引發不少身體和精神問題，「我諗緊如果唔辭，我已經精神崩潰」、「（7月初）個陣時會諗，要唔要離婚啊、要唔要轉移資產啊、同屋企脫離關係啊，依家係安心咗，亦都開心咗。」
如今雖然賣清酒，但兩人都說，暫時沒有打算「走」，楊彧說：「我都唔想離開呢個社區，等於我都唔想離開香港，我仍然留低，有空間可以發揮，除非把刀已經去到你條頸，去到咁危急先要走。」蕭德健則說，過去大半年，身邊有不少人好言相勸著他離開：「呢啲恐懼係社區不斷蔓延」、「身邊的人最興講，我為咗細路而走，咁走唔到班人點算？」「以前香港人一定為自己諗，楊潤雄自己送自己個仔走，然後搞禍香港添啦。」
蕭德健以指頭摸一摸「香港人清酒」的瓶蓋，然後說：「但呢兩年，你唔只係顧自己仔女，其他人的仔女都係香港人。」
他們希望，這支清酒，可以訴說那些留下來的香港人、那些留下來的故事。
預計到港日期：9 月中
參加辭職區議員團購，或憑優惠碼尊享早鳥團購價：
$649 一支 720mL
$1,249 兩支套裝 720mL
觀看原文： 按此連結