【告別教協】43年不離棄 教協資深員工話當年 憶同事擁抱哭訴
「教協起家全靠電子瓦罉和餅卡。」48年後，教協已經發展成全港最大教師工會，但終要劃上句號。末代會長馮偉華，在宣布解散的記者會上不忙提到200位教協員工勤勤懇懇、盡忠職守。
在教協度過了43個年頭的劉姑娘，在教協初創時期加入福利部，之後轉過部門，直到今年4月正式榮休。詎料幾個月後她回到教協，卻是幫忙應付超市結業前的購物人潮。「有啲同事見到都攬住我，話你知唔知我噚晚喊咗兩次呀」，劉姑娘表示，自己與許多同事其實也沒料到解散這一步，她記得抱著她哭的同事說：「我無諗過咁樣，我淨係諗住我一路會喺度做㗎。」
還有負責會所管理的黃小姐，1985年加入教協，憶起第一天的工作就是寄出選民登記的宣傳單張。那年，司徒華出選首屆立法局選舉教學界，代議政制在香港揭開序幕。今天，回首來路時她亦不禁哽咽：「教協終於要喺今日解散，我相信司徒生喺度嘅時候，佢都真係會好遺憾，但有時歷史要行到呢一步，都唔係我哋能夠阻止。」
自教協宣布解散已一個月，劉姑娘與黃小姐在教協的旺角會址接受訪問。櫃台裡仍有幾名穿著綠色背心的職員，電腦還在運作，旁邊有些疊得跟人一樣高的紙皮箱，上面貼著「司徒華獎牌盒」。走到樓上的超市，只見白色的貨架空無一物，筆筒裡留下的紅、藍、黑色原子筆印，是這個冷清場景裡少有的色彩。
1978年，劉姑娘加入教協福利部。她笑言當時不太認識教協，但哥哥是教師，留意到《教協報》上有招聘廣告，她遂應徵試試看，不經不覺就到花甲之年。
劉姑娘先後任職福利部、綜合部，近來更是「美食部部長」，為歡送會炮製美食。她憶起當年：「一開始福利部喺文景樓counter仔入面返工，當時得3幾個同事。」接着她翻出舊照，指著櫃台後面的貨架說當時未有開放式超市，會員要買甚麼就填張表，職員按單執貨，她印象中以前最好賣的是北京蜂王精。她又如數家珍地說起教協提供的各種服務，例如沖曬相片、錶相框、買汽車保險等等。
在旁的黃小姐補充說，劉姑娘還要寄《教協報》，並形容那時是好大陣仗的。黃解釋，報紙多數是寄去學校，「學校有學校代表，譬如間學校有30人，我哋將咁多份報紙一齊捲捲捲，變成一條長條圓形，整好晒黐郵票先攞去寄。」學校代表是由該校老師選出，並會參與教協的會員代表大會。《教協報》由初期印刷幾千份，發展到高峯期、以至現在，每期要印10萬份。
劉姑娘和黃小姐亦憶起，教協的課程與旅行團都很受歡迎，不時未開門就已經有人排隊。黃小姐記得，80年代，為會員子女而設的夏令班報名情況誇張：「以前喺文景樓地方比較細，唔方便咁多人來排隊。所以我哋要租一間學校，幾層樓，安排同事收老師嘅報名表，啲人係排晒隊。」
現年近六旬的黃小姐1985年加入教協秘書部，本來在書店工作的她，因70年代中文運動認識教協，後來見教協請人就去見工。做到九十年代中，因要照顧家庭而離職，2012年又回到教協，負責會所管理。
「我入到來嘅時候，啱啱第一年司徒生（參）選功能組別教學界，係第一屆嘅選舉。市民可以登記做唔同界別嘅選民，我嚟到嘅第一日就係好忙咁處理緊，應該寄出宣傳俾學校代表，請老師快啲去登記做選民……由返教協第一日就開始忙忙忙忙忙到唔做教協為止。」黃小姐和劉姑娘都愛稱司徒華做「司徒生」。她又指，司徒華參選不會動員教協員工，而是職員自己用工餘時間義務開街站。
黃小姐說，直接跟司徒華工作的時間不多，但會感受到司徒華思考周密的工作態度和無私精神。她特別提到拉起一幅橫額的例子，原來要掛得挺身頗有技巧。「中間要穿窿唔好擋風，用尼龍繩紮嘅時候，有時（繩在棍上）會褪位或者會鬆，佢（司徒華）就會諗到用『門摔』（門腳膠攝），你綁完之後攝落去（打結位），佢有少少彈力嘅，條橫額就會好挺，唔會褪位。所以佢係做唔同嘅嘢都會思考，點樣將件事做得更加好。」
黃小姐又想起，司徒華80年代在美國時曾寄過明信片給她和另一位同事。「佢會鼓勵我哋，（指）教協喺香港社會、對於教育界，都係好有價值或者值得大家貢獻嘅地方，希望你哋作為新一代職員，都會同理事一齊去守護教協，一齊去貢獻。佢會有呢啲心，唔淨係話俾工作你做。但司徒生亦都唔會好溫情咁同你食吓飯嗰種，佢有一種精神感召，佢會做好自己，然後你又會睇到佢無私嘅精神嘅時候，你都會想做好你自己。」
「同埋司徒生有樣嘢好特別嘅，就係教協會喺邊佢就住近邊。教協會喺文景樓嘅時候佢就住文景樓，當教協會搬咗嚟呢度（旺角），佢就搬嚟廣華街住，就係因為佢要好快返到嚟教協，唔使嘥佢交通時間，好快就可以處理好教協嘅嘢。呢個係佢對教協嘅心。」黃小姐續說。
在司徒華逝世10年後，教協走到了終章，劉姑娘和黃小姐都認為始料不及。儘管教協在7月起遭到官媒連連狙擊，黃小姐自言不是政治敏感的人，所以覺得解散決定來得突然。「因為喺教協咁多年，我都覺得教協係一個好溫和嘅團體……到真係要宣布解散嗰刻，自己係好難過、係接受唔到。」
黃小姐續指：「跟住落嚟嘅時間都唔係太多時間俾你思考，因為我哋做會所管理，解散嘅時候面對嘅工作非常之多，都係努力工作，希望為教協做好最後一件事。」
已於4月份退休的劉姑娘，則在8月得悉解散消息後立即回到教協，在超市幫手維持秩序。她憶述：「好多會員好踴躍上嚟購物，或者睇吓我哋嘅同事。有啲同事見到都攬住我，話你知唔知我噚晚喊咗兩次呀咁樣。（我話）都無辦法啦，佢話『我無諗過咁樣，我淨係諗住我一路會喺度做㗎。』」
講到最捨不得的，劉姑娘說是相處了幾十年的同事，並表示為在教協工作40多年感到驕傲。黃小姐則感概道：「教協對我哋職員來講係工作嘅地方，但我哋投放嘅仲有感情。而教協對公民社會、對教師、甚至對學生，我覺得佢都係有一個社會意義。所以我覺得教協嘅解散，我都係認為短期裡面唔會有一個團體可以代替到佢」。她相信，教協難以被取代，還因為教師會員的認受性。
教協這時解散，黃小姐還未具體打算未來，或許會提早退休。她又覺得，各個部門同心協力處理好解散這件事，相信也算是對司徒華的一個交代。她哽咽說：「雖然話，教協終於要喺今日解散，我相信司徒生喺度嘅時候，佢都真係會好遺憾，但有時歷史要行到呢一步，都唔係我哋能夠阻止。」
觀看原文： 按此連結