石牆花停止服務 受助家屬感激提供喘氣空間 嘆失去重要支柱
支援社運在囚人士的組織「石牆花」周二（14日） 宣布解散。曾受助石牆花、男友正被還柙的Ling（化名）形容，每天探訪再加日常生活已經很大壓力，石牆花就似是喘氣的空間，讓家屬緊免於奔波的同時，員工和義工的幫助都令他們非常窩心。
曾因反修例案件入獄、現已刑滿出獄的Lumos（化名）表示，石牆花的支援範圍很廣，由物資到筆友計劃，即或是細微的事，對牆內牆外的人都很重要，「以前可能即刻諗到，搵邵家臻或者石牆花幫手，之後究竟佢去搵邊個呢？」
20多歲的Ling（化名）的男朋友現正被還柙，朋友介紹她認識石牆花，了解物資要求及探訪須知。試過一次，男朋友想要個番槻盒，Ling以為這樣普通的物件可以自行找到，結果在深水埗花了三個小時：「我由荔枝角開始一路搵，行去長沙灣，再行去深水埗，再行去石硤尾，搵晒啲藥房、日本城、兩蚊店、萬寧、屈臣氏。即係一啲我諗得到嘅地方我都去搵，但都搵唔到。」
她拿著番槻盒的圖片去問藥房老闆，個個都說沒見過，「你會質疑自己，其實呢個世界係咪有呢樣嘢。」最終，她還是在石牆花找到了想要的番槻盒。Ling覺得，身為家屬或朋友，每日去探訪之餘還要過活，有石牆花幫忙就可以免卻四處奔波，「本身每日嘅探訪再加日常生活，已經令到自己壓力好大嘅，石牆花就係好似一個喘氣嘅空間。」
物資之外，Ling也覺得石牆花的筆友計劃很重要。「每日除咗探訪之外，書信係佢哋最大嘅支持，第三就係物資。呢三樣野係令到佢哋覺得，佢哋同社會、同外界仲有接觸，即係我唔係完全被人遺棄。」Ling相信，筆友對在囚者而言是重要的精神支柱。
家屬：石牆花要執笠，比起612要解散反應更大
Ling又指，石牆花今早11時宣布結業的消息，剛好她之後就去探男朋友。「我探佢第一句就同佢講話，石牆花要執笠。佢嘅反應係好大，比起612要解散，係反應更加大。因為對於在囚人士來講，612係佢哋坐之前嘅一啲幫助，但係石牆花係在佢哋最困難、在囚嘅時候，幫助佢哋嘅一個組織。」她猜想，男朋友其後或許不願提要求說想食甚麼零食、需要甚麼日常品，因為怕親友要四處撲，增加負擔。
石牆花結束，Ling想感謝員工和義工一直以來的幫助和話語。她形容石牆花是好令人窩心的地方：「佢哋都起碼幫緊一百多位嘅在囚人士、家屬，佢哋好似每一個家屬、每一個在囚人士都記得咁樣。而呢樣係令到家屬好窩心，原來都仲有人記得佢哋，或者記得屋企人，有人企喺家屬嗰方面去諗。」
在囚過來人：以前諗到石牆花幫手，之後去搵邊個？
周二宣布結束的石牆花，目前支援過百名在囚人士，Lumos（化名）是其中一個過來人，他因反修例案件入獄，刑滿出冊後會定期探望其他在囚人士。他說石牆花的支援範圍很廣，由物資到筆友計劃，即或是細微的事，對牆內牆外的人都很重要。
Lumos解釋，石牆花的物資支援主要分為日用品和零食兩大類，除了紓緩在囚人士家屬的經濟壓力，亦為他們減省四處奔波的精神和時間。他舉例，要集齊一套符合懲教署規定的物資，往往需走訪多個地方，對部分忙於工作的家屬會有一定困難，有石牆花提供物資就簡單得多。
除了物質支援，石牆花以往亦會開放辦公室解答家屬疑問。Lumos認為這是家屬的心靈寄托，幫助他們了解在囚家人面對的困難、牆內的環境、法律程序等資訊，「好似睇醫生咁樣，有個時間可以搵上面（石牆花）啲人，講解下牆內問題」。沒有石牆花這個平台以後，Lumos擔心家屬不知能找甚麼部門「排難解憂」，「或者有時懲教署有啲新規矩，家屬唔知道，盲中中入到去先知唔畀探訪⋯⋯以前可能即刻諗到，搵邵家臻或者石牆花幫手，之後究竟佢去搵邊個呢？」
憂牆內牆外難有信件往來
支援家屬以外，石牆花亦有為在囚人士提供情緒支援、籌辦筆友計劃等。經歷過監獄生活的Lumos形容，收到牆外信件就似在「黑暗中搵到一點光」，讓牆內的人知道不只有家人關心他們。他表示，為保障在囚人士的私隱，石牆花或區議會作中轉站處理信件時，不會透露他們的在囚編號，來信者也未必會留下個人地址，因此當大批區議員辭職或被取消資格、石牆花停止服務後，部分牆內牆外的溝通或會「斷絕」。Lumos擔心，「甚至以後其他人，出面筆友或者寫信師，佢哋無任何途徑可以寄到信。」
Lumos又表示，監獄和收柙所物資匱乏，微小至少一枝牙膏或者毛巾，對在囚人士都可能有影響，「變咗係個好小問題，外人就不足為道，入面我哋經歷過嘅⋯⋯都係一個難處囉。」在未來沒有石牆花的日子，他估計，「有啲人可能習慣咗筆友或者支援，有啲物資補給，可能要重新適應比較艱難嘅在囚生活。」
觀看原文： 按此連結