【專訪】香港女子三級跳紀錄保持者 40歲謝孟芝不言老 望再破紀錄：「年紀唔係問題，心態先係關鍵」
三十而立，四十而不惑。40歲，也許已走過了人生的三分一旅程，伴隨而來的是歲月沉澱下來的歷練，正是決定人生下半場的黃金時刻，但對於運動員來說卻是一道分水嶺，體能漸走下坡，部分會選擇在這階段退役告別賽場。然而，這位80後的女子三級跳香港紀錄保持者謝孟芝卻不言老，仍然堅持在田徑場上追夢。她說：「年紀唔係問題，心態先係關鍵，我覺得自己仲有競爭力，想繼續玩落去，我仲想試吓破香港紀錄！」
今年40歲的謝孟芝，畢業於珠海書院新聞系，卻從未想過要當記者或主播，天生好動的她心中最著緊的始終是體育，年輕時甚至曾為打籃球而放棄到海外實習的機會。
「入珠海讀書嘅原因，最主要係想打波，因為珠海當時嘅籃球隊好勁，而珠海最出名就係新聞系，所以就揀咗新聞系。不過其實我對新聞無咩興趣，最記得Year 2那年，成班同學都去台灣實習兩個月，我就寧願去打比賽都無去台灣，嗰陣時我就知道自己係鍾意呢邊（體育）多啲。」
從熱愛籃球變迷上田徑
當年的謝孟芝非常熱愛籃球，而且發展不俗，曾晉身本地女子甲組籃球聯賽，至於令她聞名的的田徑，則由細到大都只當興趣看待，甚至對跳遠或三級跳也興趣不大，她細數由小學開始的運動歷程，「以前小學係有學界（比賽）玩，我就報名玩吓啦，因為我跑得唔夠快，所以（老師）就叫咗我去跳遠，第二年我就攞咗學界冠軍了」。
「之後再出去參加其他大少少嘅比賽，點知去到區賽都攞到冠軍，所以先一直keep住玩。」年復一年出戰田徑比賽，令謝孟芝漸漸發現自己原來在跳遠方面甚具天份。
田徑項目五花八門，擅長跳遠的謝孟芝卻唯獨對在港較為冷門的運動項目三級跳著迷，因她認為這項運動充滿挑戰性，起跳一刻有飛翔的感覺。然而，這項運動也着實冷門，在香港難以推廣。
冷門項目 在港難推廣
「呢個項目就算係中學學界，都係得男仔先有得玩，而且仲要係B grade先開始有，可能『學體會』（香港學界體育聯會）覺得玩三級跳所需嘅身體條件要高啲啩，亦因為咁，三級跳好難推廣到俾小朋友，同埋做到普及化。」 她提到鄰近地方，如台灣、日本等，中學階段已經有三級跳比賽讓學生參與，而且不論男女。
不過她亦坦言，三級跳技巧的確較難掌握，所以喜歡跑跑跳跳的年輕運動員亦會優先考慮跳遠，「三級跳唔同跳遠，跳遠我跑埋去，跳一下，就落（沙）池；三級跳係要跳三下，左左右或右右左，先至落（沙）池，而頭兩下一定要係單足跳，所以個步點好重要，需要嘅技術亦比跳遠複雜好多，掌握得唔好分分鐘連沙池都落唔到」，所以就算跳遠與三級跳同屬跳項，參與的普遍程度亦有天壤之別。
20年生涯 僅一年獲體院每月約二千元資助
謝孟芝在田徑場上逐漸找到理想，更不諱言自己屬較幸運的一群，大專畢業後，她曾在不同的體育總會從事文職工作，加上早已考取了籃球及田徑教練執照，可兼職擔任藍球教練，令工時較有彈性，以配合田徑練習。她臉帶嚮往的神情說：「我好鍾意教班，有得教就教，維持到我基本生活就可以，就算唔係賺太多錢，只要我想做就會去做。」
謝孟芝人生中的幸運，都是靠努力換來的。她回憶自己首次成為香港隊成員的時候是25歲，當時因為體院突然改變了制度。「最初要入香港隊，你一定要係香港排名頭兩位，成年組同青年組（19歲以下）各二，但嗰陣時亦都有個原則就係，如果青年組有人成績好過成年組的第二位，都唔可以入香港隊。到2009年，因為東亞運（舉行）嘅原因，入香港隊嘅門檻又改變咗。」
她解釋說：「當時體院set多咗兩個標準，我當時掂到其中一個標，所以攞過一段時間嘅資助，約2000元一個月，純粹幫補吓搭車、食飯。」
那一次，成為謝孟芝過去20年運動員生涯中唯一一年獲得體院資助，同時提醒了她，自知無法成為全職運動員，皆因太難達到女子田項的進入體院培訓的標準，「我最叻都係跳到12米幾，已經係香港紀錄，但個標係13米幾，我根本知道自己無機會」。
根據香港田徑總會網站資料，2019年至2022年香港田徑隊的成年運動員培訓標準，24歲或以上的女子三級跳標準，由2019年的13.08米，隨後逐年遞升，2020及2021年分別為13.20米及13.45米，至2022年為13.68米，但現時由謝孟芝所保持的香港紀錄只有12.63米，意味着仍未有女子三級跳運動員可進入體院受訓。
田項標準難達到 沒想過成全職運動員
謝孟芝亦透露，大部分全職田徑運動員都是來自徑項的短跑及接力隊，田項無人達標進入體院，因此更枉論成為港隊一員，「你入唔到體院，攞唔到資助，邊有人會做全職運動員呢？」
接近20年的運動員生涯，只有1年獲得體院資助，謝孟芝也不禁靦腆地說：「其實喺我心目中，我覺得自己好似永遠都做唔到運動員咁，我認為全職受薪嗰啲先算係運動員，嗰啲先算係職業；而我呢班唔係受薪嘅，其實好多時都唔係太敢同人哋講自己係運動員。」她又笑稱，自己並不孤單，因為達不到體院門檻而一直堅持做運動員的人，在香港大有人在。
長青樹常被問「幾時退役？」
不經不覺，來到40歲，謝孟芝仍沒想過要離開田徑場，反被常常問到「幾時退役？」，記者也不例外有此一問，她眉頭一皺道：「我2011年跳出12.61米，打破咗當時嘅香港紀錄，嗰年我差唔多30歲；到我34歲，跳到12.63米，再次打破香港紀錄。」她用自身的往績向記者證明，年齡不是問題，心態才是關鍵，只要肯堅持，永遠不會太遲。
她坦言還未定下退役時間表，「唔知呀，到時想退咪退囉，我又唔係明星，唔會特登同人講『我要退役喇』，哈哈！」。除了希望自己在三級跳中繼續進步，謝孟芝亦盼望香港的三級跳及田徑可持續發展下去。
無奈青黃不接 惟有以身作則堅持
若三級跳或田徑未來在香港要穩定發展，年輕運動員的加入必不可少，但謝孟芝多年來卻見證著自己一手教出來的徒弟及學生不斷流失，令她深感無奈。「教教吓好多人都唔再玩落去，選擇放棄田徑，特別係到了大專、大學畢業之後嗰一年，斷層斷得特別勁。明明有啲學生係仲有好大嘅進步空間，好有能力嘅⋯⋯但我唔能夠控制佢地，迫佢哋繼續玩，亦唔係個個都勸得掂唔放棄。」
別人要放棄，她無法控制，惟有自己繼續堅持，「所以我就一直堅持玩到而家囉！」她以身作則，證明年齡不是問題，心態才是關鍵，「我做呢啲嘢開心，就一直會繼續做，即使過程係好困難，我都唔會後悔」。
作為田徑界的長青樹，謝孟芝把自身的經驗寄語年輕運動員，「所有嘢都真係要盡力去做，唔好將自己而家嘅成績看得太重，唔好睇得太短線，應該長線咁睇，因為大部分田徑運動員都要3年至5年嘅專業訓練，才可以發揮到真正嘅實力，做到一個高水準嘅成績，所以唔好以為練1、2年就會有成績。最緊要都係唔好咁快放棄，要學識享受體育帶俾你嘅樂趣，鍾意做就做啦！」
觀看原文： 按此連結