資料圖片，來源：懲教署影片截圖

【文：肥貓主人】

雖然放咗學已經幾個月，原本以為可以過番正常少少嘅生活，但原來有啲恐懼同後遺症係好可能會跟一世……

最近一直同牆內手足傾緊 PTSD（創傷後遺症）嘅問題，事緣係同幾個被捕手足都傾過，大家都有類似嘅症狀，對門外嘅聲音特別敏感，半夜聽到些微嘅聲音都會即刻「豎毛」，如果拍門甚至會成個身震同心跳加速。

問咗部分牆內手足，有同樣情況嘅大部份都係女手足，而男仔反而比較少呢個情況。我自己嘅狀態係每一次提起單 case 或者被捕情景之後就會持續呢個狀況一段時間，我自己嘗試緊去克服，希望用不斷重複提起令到自己對呢件事麻木。雖然暫時未見到顯著嘅成效，不過我都會繼續嘗試（過程其實都相當自虐）。

由牆內帶出嚟嘅除咗恐懼，仲有身體上嘅傷害。入面嘅工作係日復日重覆嘅動作，好多手足出嚟之後都會出現勞損嘅症狀，而呢啲傷害好可能係終身嘅。

所以坐監並唔係單單囚禁一年半載嗰段日子失去自由，而後面會帶住一堆嘅後遺症，例如情緒、身體或者最多人需要面對嘅就業問題。

由牆內走到牆外

最初放學嘅時候，會認為自己係重獲自由，可以重新呼吸自由嘅空氣，但係整個社會制度急劇惡化，所有嘅嘢都冇道理可言，猶如由小監獄走入一個大監獄一樣。

小監獄你會知道有咩規矩條界喺邊，而大監獄你永遠望唔到條紅線，龍門任佢擺，當你門口有張貼紙都係犯國安法嘅時候，仲有乜嘢係唔可以發生呢？小監獄入面你「篤灰」會有人招呼你，而大監獄你「篤灰」正苦會獎勵你。「登燈燈凳」！香港正式進入文革時期，父母仔女兄弟姊妹無一倖免，你準備好未？

 

石窗花 Facebook