我愛司棋姐

司棋姐堅有玩IG的，分享一件真人真事。

大家都驚訝，司棋姐真係超Young，撐教主打卡，有莫名喜感。

回想起一件舊事，有關幾年前，我去司棋姐家中傾廣告合作。

她70年代已經爆紅，一線花旦，多年投資有道，早就上岸。有離地的資格，她卻處處體諒，句句窩心。

幾年前任職Content Director，與幾位同事到司棋姐家拜訪。溝通很重要，所以明明時間極趕，她還是預留成個鐘傾劇本。

當時她正參演舞台劇，幕後不少年輕人。她愈見愈心痛，慨歎樓價太高，社會怨氣很大。

「係喔。而家啲小朋友，好難捱。」

又說起服裝，她雀躍拿起一雙皮鞋，炫耀著超平價錢。好奇追問，才發現她購自IG網店。

是的，司棋姐堅係有玩IG。

View this post on Instagram

A post shared by Louise Lee 李司棋 (@leeszekee)

時興珍珠奶茶，她見處處人龍，想起近年的潮流。食物與球鞋，新貨到港，一定有人排隊排天光。

我應道，能買的快樂，都很便宜。這年頭快樂難求，排一個鐘買一杯嘢，至少買得到。

劇本的要求十分瘋狂，準備了十萬個方案應對，她卻先說服了自己。

「其實（個劇本）我有啲都睇唔明㗎。不過而家，係你哋年輕人世界，你哋覺得好就得。」

她很有錢，不需要這麼配合。這是鏡頭後，她也有權大牌一下。

但司棋姐親自為我們沖香片。

拍攝當日，適逢風球大雨。天花滴來污水，白恤衫有印，她隨意用紙巾印乾，便繼續練咬字。

我坐在旁邊做Briefing，見到同Crew女同事東奔西走，她笑說，現在的女生真厲害，什麼都做得到。

短休息，司棋姐問起幕後的待遇。

「時下女仔好犀利啊可？咩都識，又做得到呢……喺外國呢，分工好清楚。寫嘢就寫嘢，拍嘢就拍嘢，又有好多工會保障，香港呢就個個咩都要做。香港幾時先追得上呢？」

雖然我打死都話唔辛苦，但簡單一句，仍是很窩心。

補妝時，用過的棉花與紙巾，她包起掉到垃圾筒。自己能做的，絕不麻煩人，見我笑，她又跟著笑。

因為要拍室外場景，天晴時間不多，司棋姐預先跑出去，練定走位和聲量。我們一邊Set鏡位燈位，她和導演溝通，及早修正。

做過配音組，她的稿件寫滿筆記，風球無阻專業，大家準時收工。

臨行，她小心走過滿地池塘，高聲跟我們說：

「小朋友努力！再見。」

我們並不親密，見面不過兩次。這些說話，卻一直沒忘掉。

香港的年輕人很簡單。

年長的一輩，所謂世代矛盾，其實很容易化解。

同心同理，我們要的，就僅此而已。如司棋姐，著黑絲，玩IG，我哋就係愛呢啲。

P.S. 司棋姐好準時，份稿已Mark到勁多備註，高低重音都標明晒。勁Pro，超準時收工，我愛司棋Jer