【專訪】國安教育惹疑慮 港媽偕 5 歲女試行在家自學：家長其實有得揀
【撰文、採訪｜阿蘋】
今年 2 月，教育局正式推出國家安全教育框架，不少香港家長頓時為下一代的教育問題憂心起來，有些更因此立刻舉家移民，務求為子女提供更理想的學習環境，免被愛國教育洗腦。然而，洪曉嫻（Kitty）卻異常淡定，仍與女兒「年年」留港，嘗試尋找體制以外的生機。主流以外的家庭教育可以實行多久、教育成效如何，仍是未知之數。但 Kitty 留守，只望為後代留下土壤，栽種絕處的花。
* * *
與孩子同遊行
2017 年 5 月 1 日，年年仍是襁褓嬰兒時，便已是遊行隊伍的一分子。媽媽洪曉嫻（Kitty）從誕下她起，就視她如成年人，不論是政治、性別、環保，所有議題都會談論。至 2019 年反送中運動，年年 3 歲，已是遊行常客的她，自然也會參與遊行。她一手拖著媽媽的手，一手拿著泡泡槍，伴隨周遭隆隆的鼓聲，與其他小朋友一同在街上唱歌打氣。
年年未必知道遊行是甚麼一回事，但 Kitty 嘗試以日常例子解說。「如果依家媽媽話：『你以後都唔可以去朋友仔屋企玩，咁你會點？」年年噘起小嘴細聲說：「咁我會唔開心囉。」「依家政府就係咁啦，佢推出咗啲政策，人民唔滿意，提出意見，但政府唔聽人講，於是我哋就上街表達我嘅聲音。」年年聽畢，似懂非懂地點頭。
只是，隨著警民衝突愈演愈烈，Kitty 也不敢帶同女兒出外遊行了，年年問為何，她唯有解釋：「出面有催淚彈同有人開槍。」她也開始刻意在女兒面前迴避警暴問題，「我唔係好想佢咁細個就對世界失去信心。」但年年還是從周遭環境察覺到了異樣。有次她們一同坐巴士，年年指著一架警車，後以動物稱呼。Kitty 倏然呆住了，她記得自己從未在女兒面前說過這些話。她第一次感到：原來與女兒對話，是如此棘手。
對於不少父母而言，自 2019 年初夏起，面對香港種種荒謬和混亂，教育前所未有地成為一大難題。善惡、好壞、黑白等概念，都變得異常令人困惑，難以向小孩闡釋。像年年現在很喜歡卡通片《Paw patrol》裡任警察的德國牧羊犬角色 Chase，Kitty 心裡總有些疙瘩。但她認為作為父母，最重要是放下個人立場和判斷，「我唔想講話咩人一定係唔好。要相信我同佢嘅相處同教育方式，能令佢有自己嘅判斷，明白唔同意義嘅警察有唔同角色，所以哪怕佢好鍾意嗰隻『警察狗』（角色），我都唔會阻止佢。」
當國安教育殺到
但今年起，教育問題再次成為香港家長甚為緊張的議題。2 月，教育局推出國家安全教育，向學校發出多份指引及通告，說明學科學習元素如何建立「國家概念」和「國民身份認同」、認同維護國土安全的重要性等。如小學常識科的學習元素列明「認識在社會上不同崗位服務的人，欣賞他們為社會付出和保護香港所作出的貢獻，例如警察、解放軍」；中學地理科亦提到：「從南海的例子認識中國領土及領海的範圍，以及當中的海洋資源，從而了解保障國土安全的重要性，以及掌握保障國土安全的方法」。
4 月，教育局再公布涵蓋文、理、商共 8 個科目的國安課程框架，其中至少 4 個科目要求學校教導學生分辨「假資訊」、「假新聞」，以讓學生明白傳播假資訊的後果。
國安教育推出後，不少香港家長就教育問題更為誠惶誠恐，甚至萌生起舉家移民的念頭，務求為子女提供更理想的學習環境，以免他們被洗腦。然而，Kitty 卻異常淡定，絲毫不對國安教育畏懼，也未有打算帶年年移民海外。「點解我唔驚？係因為我讀咗 7 年左校！」20 年前讀初中的她，似乎是左校洗腦工程下的完美實驗品。每星期，學校都會升國旗、唱國歌，舉行「國旗下的講話」。學生在校內歌唱比賽中一定要唱「紅歌」，平時放學後有事沒事也會一同高唱《歌頌祖國》、《我愛北京天安門》。回首舊日，她笑指自己當時「咩都唔識」：「中二嗰陣幫民建聯做選舉民意調查，但學校同你講話係公益活動。嗰陣我仲話我支持 23 條，覺得你身冇屎就唔使驚啦！」
在洗腦教育長大下的 Kitty，長大後卻信奉自由、民主、人權等普世價值。「我媽媽一直都有容許我接觸政治有關嘅議題，你會開始自己搵六四係咩，開始思考香港政治前途問題。當你 click 著咗思考個掣時，之前洗腦起嘅作用就好少。人嘅思想係自由，係你無論如何都冇辦法去壓制，當你嘅思想一打開時，所有謊言同美好幻象都係不堪一擊。」
然而，彼時是 20 年前的香港，如今在國安陰霾下，白色恐怖彌漫我城，有良知的人或被打壓，或因恐懼而噤聲，或因犬儒而醉生夢死。今日的洗腦工程，會否造成香港新一代盲目愛國的「小粉紅」？Kitty 思索片刻，仍然堅定：「老師只係小朋友生命嘅一部分，如果你只要佢讀好書考高分入大學，當佢生活得返學校時，咁佢當然會被洗腦。但如果佢對生命有熱情同追求，咁學校體制對佢嘅影響會少好多。」故此時此刻，家長的角色更為關鍵。「你問我會唔會無力，我覺得我有咗小朋友之後係令我更堅定。香港人講到底就係消費者，習慣將小朋友送去學校，等人幫你代辦晒。我覺得唔係咁，我哋依家要拎返教育嘅主導權，畀佢接觸學校以外一個更廣闊嘅世界。」
Homeschooling 冀取回教育主導權
今年 3 月，Kitty 選擇為 5 歲的年年退學，自行為她設計課程內容和時間表。本來，她也是抱實驗心態把女兒送到傳統幼稚園讀書，「覺得點都要試玩吓呢個體制內嘅遊戲。」但不出年半，無意義填鴨式的課程內容，令她萌生退意，最後決定與年年一同實踐家庭教育。現在，年年一星期上五天課，其中一天是課外活動課，年年現正學踩滾軸溜冰；另外兩天年年會與其他小朋友一同上與自然教育有關的幼兒遊戲班；還有兩天由 Kitty 親自教導年年。「如今個月主題係春天，我哋就會學習唔同植物，學堆肥同玩紮染。」試行數月，Kitty 仍難言學習成效，但以學習中文而言，年年記得的字詞比在幼稚園抄寫時多，「依家我都只係每星期用 15 分鐘同佢講吓個字點解，完全冇抄寫，難免令我諗到底返學嘅意義係咩。」
但 Kitty 也不擔心年年追不上「體制內」的教育進程。「喺小朋友 6 歲前，我覺得都要畀佢多啲體驗呢個世界，我覺得係好好嘅學習基礎。」更重要的是，家庭教育的實踐，讓 Kitty 明白到，香港家長其實「有得揀」，「喺 home schooling 之前，都有同爸爸傾過係咪要移民；但試過後成個人輕鬆咗好多，因為起碼我知我係有其他選擇，唔係冇得揀。我哋總會搵到啲空間，喺框架以外再作嘗試。」
但家庭教育長遠可以實行多久？這又會否限制子女長大後投身體制內的可能性？對於女兒的將來，Kitty 未有具體想法，但她認為身為父母，要反思自己到底想成為體制內的一份子，抑或做一個開拓者。「如果你唔參與主流個套時，你願唔願意喺我哋有限嘅時間、空間、資源，畀小朋友發展體制以外嘅可能性？而唔係一嚟就好驚佢俾人洗腦。一個小朋友其實都有好多時間喺屋企，如果佢喺學校俾老師洗完腦，佢返到屋企你係咪可以同佢討論呢？有嘅話就有鬆綁嘅可能性；但如果你一嚟咩都唔做就覺得玩完，咁佢就一定玩完。」
而更根本的，是家長在家庭中有否落實「民主化」，「呢個係 101（最基本的課堂）嚟，如果你喺屋企都係你有你講，有錯唔肯認，小朋友永遠 no say，咁你唔好話驚洗腦 — 依家政府咪就係家長式管治囉。咁你先喺屋企落實咗民主先。」
是否願意守護價值留給後代？
隨著愈來愈多香港家庭移民海外，目前堅持留港的 Kitty 雖仍努力開拓生存空間，但也不是沒有考慮過移民：「依家我係覺得體制外仲有空間可以遊走。但如果政府迫你一定要做某啲嘢，要小朋友一定要上幾多個鐘嘅國民教育，或普通人都有被捕風險，體制外嘅空間愈收愈窄，我冇得再玩落去時，咁我就會考慮離開。」
她頓一頓，「但目前我覺得都仲有空間。如果香港係你所珍視，你想保留佢，願意為佢付出一啲嘢嘅話，咁你去做啦。你嘅小朋友會睇到架：原來我爸媽有某種堅持。唔好話 100 萬人咁做，你有幾萬人願意堅持去守護留畀下一代嘅價值嘅話，佢就會變成佢地成長嘅土壤，而唔係到佢哋長大時先發現：原來我想要其他選擇時已經冇晒，啲人走晒。所以我哋要諗嘅係，我哋想耕耘一個點嘅社會畀我哋嘅小朋友，總有嘢可以做。」
