石牆花辦公室放滿給在囚人士使用的物資。

【文：苦盡甘來】

無論手足家屬朋友，或者一般市民，好多時都會好踴躍咁捐物資或者入物資俾手足同埋支援機構。物資除咗係可以入到收押所 / 監獄嘅物品，亦有書本，另外仲夾雜一啲買錯咗，入唔到俾手足嘅物品。

喺呢度，物資師想提提大家，喺大家捐物資或者入物資前，最好先問吓你想捐嘅物資，機構係咪適用同需要。一來，香港地方細，如果獲捐贈嘅物資比較多，機構要諗辦法存放物資，都要花啲心機同時間。另外，機構本身可能每個月已經會入一定數量嘅物資，如果忽然收到大家捐出嚟嘅物資，可能就會囤積咗啲物資喺度，唔知點用。

相信大家都聽過還押人士同在囚人士，每個月可以入嘅物資，無論數量同種類都唔同。在囚人士可以入嘅數量係相對少好多，所以機構都唔想囤太多物資，一來正如頭先講，要花時間心機諗點儲存，二來都唔想其他在囚人士同收押人士搵唔到物資。

其實，物資在囚支援，最好係同機構 / 手足先建立關係，然後再根據佢地需要作出支援。如果你身邊有還押人士 / 在囚人士，不妨先理解佢地需要，然後再入物資 / 書俾佢地。我自己嘅一個真人小故事，就係還押朋友只有每月入六本書的限制，但佢有個朋友探訪時，無啦啦入咗幾本書俾佢，而當時佢其實喺牆內追緊一套小說，結果因為呢幾本書搞到佢嗰個月爆 quota，要等一個月先可以再追套小說，佢喺牆內要緝兇搵番邊個「好人」朋友入書俾佢。

所以，如果大家有欣賞嘅機構，想捐物資俾佢哋，最好睇清楚或者問清楚佢哋想要咩物資，同埋睇清楚啲物資係咪啱規格，咁樣捐俾佢哋，佢哋先用得著。

 

原刊於石牆花網站