【德廣語言觀察】林鄭話一定走數，我其實幾開心 — 兼論「走數」德文點講
呢幾年，喺林鄭口中吐出嘅語言，我覺得無一句唔係難聽過粗口。
未選特首之前，佢話要修訂《防止賄賂條例》，係喺政綱嘅第一條就咁寫。依家佢話行政長官喺行政立法司法之上，呢條條例係衝住佢憲政責任而嚟，過去好多法例削弱咗佢嘅地位，所以「一定走數」，講完之後個樣有少少奸笑嘅感覺。
相關報導：曾承諾防賄條例涵蓋特首 林鄭月娥：一定走數 — RTHK
憎佢還憎佢，同大家嘅感覺有少少相反，聽完林鄭咁講之後，我竟然覺得幾開心。
竟然？
佢依家就係直接咁講：我就係大撚哂，亦要保持大撚哂嘅地位，肯定唔會守諾言，吹咩。
老實講，有咩講法係直接得過講「我一定走數」？無。講走數的話，林鄭走得少咩？選之前就梗係話呢樣實得嗰樣會做。
講個笑話畀大家聽：林鄭講過「如果香港人嘅主流意見，令我無辦法擔任行政長官，我會辭職」。
講民意，一兩球上街唔算，你就話撐警有三百萬簽名。
講法治，出街帶幾條索帶嘅後生仔就係暴動，受賄式免費食鮑魚就經一事蔡一智唔會追究。
講一國兩制，講一國又話咩大灣區又叫人上去發展，香港製造變中國製做你又話指黑為白。
你講哂啦。
所以走數其實唔係重點，重點係認唔認。
我諗好多香港人都知依家你贏咗，威威，但係要聽埋你啲搬龍門又假又虛偽嘅講法，有時候仲辛苦。所以佢依家收回小部分虛偽，擺明車馬「走數」，唔屈啲咩藉口出嚟，聽落起碼夠串夠直接，副嘴臉配合返啲語言。
咁走數其實德文又點講呢？同好多廣東話嘅字一樣，「走數」無直接嘅翻譯，呢度有兩個勉強可以表達到嘅講法。
如果係偏向商業上嘅行為，德文有 abschreiben 呢個字，同英文嘅 write off 十分相似，報稅嘅時候都係一個技巧。佢嘅名詞 die Abschreibung，就係「折舊」咁解。所以「撇帳」，「走數」，德文可以翻譯成 die Schulden abschreiben。
但係呢個字都有一個引申俗語嘅意思：放棄。所以 Du kannst das abschreiben 唔係話你可以用嚟計折舊報稅，而係話你可以放棄了。
走數另一個意思係「龜縮」，明明話做又唔做，我覺得好多時候呢個意思都比較重，因爲走嘅，唔係真係錢財上嘅數，係道理上嘅虧欠。咁德文就有一個反身動詞可以講，叫 sich verdrücken，同樣係俗語講法。drücken 呢個字本身有「壓落嚟」嘅意思，亦有「靜靜地走」嘅意思，加咗 ver- 呢個詞頭之後，就有一個負面嘅感覺，就係「走咗去」，「逃避」嘅意思。例句：Er hat sich feige verdrückt. 佢懦弱地走咗數。
不負責任，推卸責任，違反諾言，德文可以講 verantwortungslos, die Verantwortung abschieben, das Versprechen brechen 等等，都可以用標準語言嘅方式嚟講。
延伸閱讀：
【德廣語言觀察】廣東話嘅「可分割動詞」？
【德文學習】到底講德文有口音，有無問題？
【德語趣聞】當瑞士德語遇上港式德文