（編按：身在獄中的劉頴匡仍然關心香港本土流行文化，他於 7 月 17 日寫了這封信，談及近日充滿話題的電視劇、音樂和電影三個範疇，以下為書信節錄。）

大叔的愛勁過社運

聽講外面嘅人越嚟越對港聞政情感到厭倦，所以寧願轉而留意多啲娛樂圈同流行文化，咁樣個人都會舒服啲。今日睇《明報》娛樂版講坊間對琴晚《大叔的愛》大結局嘅反應唔錯，藍奕邦同麥明詩都有出 post 大讚 ViuTV 敢於打破 TVB 設下對性小眾嘅框框，即係男同志就一定係乸型、跨性別人士就一定係變態連環殺手咁。從事文化產業嘅人真係擁有好大力量，透過流行文化將社會移風易俗，力量隨時大過政治人物。我哋搞幾年同志平權運動嘅效用都未必比得上一套電視劇。而家呢一刻喺香港做一個是否支持同性婚姻嘅民意調查，支持率大概會創歷史新高。不過電視台敢唔敢播呢個題材，本身都要考慮觀眾嘅接受程度。香港社會變成一個電視台認為觀眾可以接受到同性戀題材嘅狀態，亦有賴過去多年來嘅社會運動。或者可以咁形容啦！以 0 至 10 嘅接受程度計算，多年來嘅同志運動負責由 0 推到 3，一套電視劇就可以一次過再由 3 推到過咗 5。

周冠威導演令人肅然起敬

我相信政權得肯定會意識到流行文化嘅威力所在，所以一定會嘗試打壓，或者用其他地方嘅流行文化取代本土文化。當政治圈同社運圈被殲滅殆盡，文化界就會成為下一批要整頓嘅對象之一。香港人關注流行文化、支持文化業界就係減慢佢地被消滅嘅速度嘅方法。見到周冠威導演無懼紅線嘅風骨，簡直遠超好多政治人物，實在令我肅然起敬。書展亦一向有好多人堅持推出政權眼中嘅「敏感」書籍。到今年即使氣氛逐步轉淡，都仍然有好多呼應時代嘅書刊出版開售。本土文化，包括語言文字以及衍生出黎嘅各種作品，係香港仍然係香港嘅最後防線，亦照計係一條只要大家肯守，都幾難急速攻破嘅防線。畢竟唔似得消滅政治空間可以快刀斬亂麻一蹴而就，消滅文化唔會係一朝一夕，一定會係一場持久戰，需要長期拉鋸。

電台音樂流行榜獄中推薦

雖然我睇唔到《大叔的愛》，但就有機會聽到由教主同 Edan 合唱嘅《突如其來的心跳感覺》，歌詞都係講返一對同性伴侶點樣喺社會環境下戰戰兢兢咁相愛。聽完第一刻係覺得幾 sweet，甚至會諗起而家呢個狀態（同性戀唔再犯法、唔再係禁忌、但又未完全被整個社會認可同接受）先正正創造出歌詞入面呢種咁浪漫嘅關係。若果個社會完全接受晒，同性戀同異性戀完全冇分別，咁咪只係一段好普通嘅戀愛囉！諗到呢度就聯想起另一首新歌，MC 張天賦嘅《反對無效》，歌詞提到「外間很多反對我愛你的聲音」、但係「要放冷槍、要炮轟，我們就更愛」。愛情故事好多時就係因為有咗愛、有難關，先來得轟烈同精彩，感情亦更深，就好似我哋而家咁，因為遇上大波折反而感情更好。

今個星期如常聽晒三個電台嘅流行榜，用入耳式耳機聽得特別投入，亦聽得啲編曲清楚啲。903 嘅冠軍歌係陳凱詠嘅《I Wish》，港台係《聖馬力諾之心》，新城係泳兒嘅《孤毒》。呢三首歌我之前都有同你介紹過，證明我啲口味都幾符合大眾！不過今次想同你介紹嘅歌係一首位置比較低，但我覺得有啲 underrate 嘅歌，係 The Hertz（希望冇串錯）嘅《漂流號》，呢首歌嘅編曲好能夠營造出喺太空漂流嘅感覺，合埋眼都有種飄走緊嘅 feel。歌詞係講同情人分手之後有如漂流於太空中咁孤獨。雖然我同你嘅分開唔係因為分手，但對於歌中描述嘅孤獨感都好有共鳴。