懲教署影片截圖

【文：長沙灣 Benjamin Button】

作為寫信師，其實今年一月之前，我已經十幾二十年無寫過一封實體信，連字條都好少寫，一開始我都唔知點下筆，而且因為唔知道收信人性別、年齡同生活習慣，所以就更加唔知寫咩好。呢個時候，我通常都係先寫天氣，介紹吓自己，講吓自己的日常生活，等手足認識咗我先，希望佢地就算無見過我真人，都大約想像到我係一個點嘅人。

因為我唔知手足嘅嗜好，所以咩 topic 都會寫下：電影、書、足球、音樂、詩。為咗要貼近生活，我本身幾年都無追電視劇同綜藝節目，都要得閒睇吓電視追吓劇，貼近番生活，知道而家嘅人鍾意啲咩。

之前收到嘅回信，手足講番佢地嘅興趣，例如打機、語言學習，甚至講番佢地喺入面嘅情況，呢啲全部都係我唔知嘅領域。有時睇完佢地回信，我都要 Google 一輪，甚至問埋朋友，先明白佢地講啲咩。有時，手足話自己鍾意睇書，我又問吓佢地鍾意睇咩類型嘅書，咁又試吓搵嚟睇，睇吓本書係咪真係咁好睇，睇完又可以同佢討論吓。

有時如果真係無心機，成個星期俾新聞搞到個人都低氣壓，我又會寫吓自己嘅煩惱，寫吓工作遇到嘅西人西事，同手足 share 吓，對我嚟講係另一種抒發情緒嘅方法。

我知坊間好多平台，都有提醒寫手足信唔好寫咩 topic，唔好寫咩說話，但係我哋又有無倒番轉諗，手足想收到咩信？如果手足要喺牆內渡過幾年甚至十年，我地喺牆外想同佢地同行，係咪應該由介紹自己，真係同佢地交心做朋友開始？畢竟，打氣、多謝、懺悔說話都應該唔夠手足喺牆內過幾年。

其實寫信俾手足，好多人都以為係幫手足打氣，但其實我覺得自己收穫仲多。唔信，你地試吓寫信就知！

 

原刊於石牆花網站