【旁聽手記】她眼中的唐英傑

「有次我去探阿傑，啲懲教問我係咪佢個妹，嬲死佢呀。」Jessica 說著咯咯地笑。四十有多的她，冬菇頭短髮配上一副圓眼鏡，看上去比實際年經。她說，是健碩的阿傑外表太老。

她眼中的唐英傑為人詼諧幽默，與普通24歲年輕人無異。「佢都有失誤有做錯，就係一個咁普通嘅人，點會去到係恐怖分子呢個領域呢？」

Jessica 是旺角茶飲店「Royaltea.HK 皇茶香港」東主。她記得，前年11月街頭抗爭如火如荼之際，唐英傑不時在店鋪休息，又會在店內為受傷市民急救、洗眼、洗傷口。最為人印象深刻的，是他總愛穿着保護裝備擔任義務救護員，「重甲」的綽號亦由此而來。

「阿傑嗰陣時好鍾意落嚟，唞一唞望吓個電視，望吓出面啲新聞。有需要咪行出去出面支援下囉。或者佢都欣賞我哋唔計較利益咁幫人，我相信佢都係一個咁嘅人。」

她特別記得，唐英傑曾協助店鋪運送茶水到太子警署，二人及後亦漸漸熟絡。「你睇吓佢個頭盔上面痴咗個貼紙上去。」記者問有何特別，「哈哈，個M字呀，係佢最鍾意飲嘅牌子。」原來是呈魔爪狀的能量飲料「Monster Energy」。

在她心目中，唐英傑就像細路一樣：「我大佢廿幾幾年做得佢姨姨㗎喇。」唐英傑父母離異，與父親及胞妹同住公屋，中學畢業就出來打工賺錢養家。Jessica猶記得：「佢有時為咗慳錢，會走去買十蚊三個麵包當一餐。年青人係需要捱下嘅，但佢會將屋企人擺喺第一位，呢個係佢值得欣賞嘅地方。」

她表示，深深感受到唐英傑「孭起頭家」的無奈與壓力。去年4月疫情期間，唐英傑被公司辭退後，她亦主動邀請唐到店鋪打工，及後介紹他到薪酬條件較好的日本食肆工作。原來，唐英傑其中一個理想，就是開拉麵店。

「佢讀書唔叻，做嘢唔叻。但當刻我會咁諗，咁熱心為香港嘅年青人，我覺得佢可以有好大嘅進步空間，所以介紹佢一份工作，俾個機會佢。因為佢唔係差嘛，唔差即係有機會啦」她透露，當時唐英傑轉換新工作後，僱主亦對他甚有好評。

唐英傑亦知恩圖報，放工後不時自發到茶店丟垃圾，清洗隔油池。「隔油池真係好臭嘅臭過屎㗎，佢以前學過，知我哋唔識所以就幫我手。」Jessica說，是唐英傑教她將冰倒進隔油池讓油凝固，就能方便清洗。「以前唔識就要個幾鐘，依家三個字就搞掂啦，所以佢真係幫到手。」

話鋒一轉，她說不想英雄化阿傑：「嗰陣時嘅環境，好多年青人好似阿傑一樣，好熱心為香港毫無計較咁付出。阿傑唔係最特別嘅一個，但必定會係其中一個。」

「佢只係嗰陣時嗰個社會氣氛覺得佢做到嘅嘢就盡力做。」Jessica坦言：「但係唔代表佢過去嘅工作都攞滿分㗎嘛。咁佢當然唔係100分啦，一個年青人又點會係完美呢？佢梗係有好多地方進步啦。」

回想去年七一案發當日，她與友人相約唐到銅鑼灣用餐。她形容，唐當日的行為是表達自己對香港的愛，但「唔知個後果咁大鑊」。她反問政府：「點解一條咁重要嘅《國安法》唔係透過教育市民去認識？而係要透過一個判刑令到市民認識，令大家都心存恐懼。」

由唐英傑被捕、還柙，Jessica都默默地在背後幫忙，更為他寫求情信，上庭作供成為辯方最後一名證人。她亦自行收緊店內的社交距離措施，確保自己作供期間不會被針對。今日唐英傑判刑，她擔心成為傳媒焦點，並無到場旁聽，只是默默地等候消息。

庭上的唐英傑身穿深藍色西裝，法官宣判刑期後，公眾有人大呼「撐住」，他回應道「你哋都撐住」。法庭外亦難得聚滿市民，坐滿延伸法庭百多個坐位，更有數十名市民無法入內而在庭外排隊等候。

得悉判刑，有人禁不住落淚，有人痛斥「冤獄一日都嫌多」。或者是因為首宗《國安法》判刑，這日警方連金鐘廊到太古廣場的行人天橋都多翻驅趕，市民無法送車。

對於將來，Jessica說，與其無限傷悲，積極向前看，例如捐贈書籍，以知識改變在囚手足的命運。而她則會努力賺錢，拯救告急邊緣的「皇茶」：「我好想做好皇茶，做好盤生意我先有空間請我想請嘅人，比空間佢哋去諗佢哋想諗嘅嘢。」

「大家如果9年後仲記得阿傑嘅話，知道佢可以成就一番事業嘅，將來咪畀份好工佢囉，到時佢都係30歲姐。」