【文：余翠怡】

張家朗奪金後，網上有討論話張家朗 Edgar Cheung Ka Long 係香港歷黎第二金，有人話蘇樺偉先係第二金，然後就「熱烈討論」奧運，殘奧點計，運動員待遇等等。

作為殘奧運動員，見到家朗奪金，係超•開•心！因為本身認識佢，見佢有好成績，即使我地唔係同一個項目（輪椅劍擊同劍擊係有唔同既）一定為佢而高興。

因為，我地都係 #香港運動員。

其實，我地都係一同喺體院訓練，大家成日會見面，我好鍾意睇奧運唔止係熱愛運動，係因為我好想支持我一班「 #香港隊隊友」。見到石偉雄 Stone Shek 初賽受傷，我會即時問佢隊友情況係點，見到謝影雪 Tse Ying Suet銅牌戰後訪問，我都會想喊；就正如我要去殘奧比賽，備戰其間有健全劍手喺佢地一些訓練時間，特別為我地坐喺輪椅上一齊練習一樣，我地互相都會支持大家。

有人會覺得殘奧比起奧運好似係second class, 容易啲，其實項目唔同，根本係無得比較，亦唔需要比較，因為去到奧運/殘奧決賽，就係最高水平既賽事。正如家朗金牌難攞啲，定何思蓓既銀牌難攞啲，係無必要，因為佢地已經係喺自身項目上最top了。

#兩個奧運同樣精彩

殘奧運動員同奧運運動員一樣，都係經歷左長年訓練，比賽，需要喺奧運/殘奧周期攞到一定積分，先可以出線，所以奧運同殘奧既香港代表都係好努力先可以去到東京。

奧運同殘奧係兩個運動會，自1988年國際奧委會同國際殘奧委會就達成協助，日後舉辦奧運既城市亦會同時舉辦殘奧，就正如新既奧運格言：「更快、更高、更強，團結」（Olympic Motto: Faster, Higher, Stronger, Together），希望大家支持奧運既香港運動員，同樣地都可以支持殘奧既香港運動員。

殘奧會將於8月24日至9月5日喺東京舉行，香港將派出24名運動員出賽，大家都要keep住熱情❤️‍🔥，#支持香港運動員。

 

原文刊於作者 facebook；標題為編輯所擬。