【文:「言」燒爸】

全城力撐香港運動員出戰奧運，熱血沸騰投入之餘亦熱血鬧爆某某盲目批鬥，影響港隊羽毛球一哥伍家朗表現，「飲恨」今屆奧運。及後網上湧現大量發文支持家朗同事件分析，亦有某啲扮專家嘅話「件衫唔同又會影響到比賽表現咁迷信?」講到運動員「迷信」，筆者咁啱睇到體育界KOL伍家謙先生社交平台一篇有關運動心理學嘅發文，想同各位分享。

建立「習慣」(Routine)的運動心理學

文中提到佢自己曾經請教運動心理學專業人士，講到好多運動員為保持最佳表現或改善缺點，都會建立一套「習慣」(Routine) 。例如有 NBA 球員射罰球前會有既定動作，筆者偶像 Jason Kidd 就會每次射罰球前向籃框送上飛吻。研究者指出，當運動員執行 Routine 時，可以提高穩定性，聚焦於當下比賽，提高運動表現。Moran (1996) 提出Pre-Performance Routines「賽前例行性動作」，意思係「運動員在執行某特定運動技能前，所從事一連串系統化的想法與行動」。提到運動心理學，原來佢哋為提升表現，亦會經常進行意象訓練 (Visualization)，”a way of conditioning for your brain for successful outcomes”，同樣原理又可唔可以應用於商界呢?

正面心錨 Positive Anchoring

試想像你即將要去見一個大客，又或者準備入 board room 同管理層做一個重要 presentation，跟住你一路行，一路心跳加速，身體開始震，思緒開始亂。咁嘅情況其實除左深呼吸，有冇其他方法? NLP 身心語言程式學中，有一個好出名技巧就叫做正面心錨 (Positive Anchoring)，想像吓你身上有個「掣」，隨時一㩒狀態會連結到正面感知，例如自信、開心、放鬆等，正所謂狀態影響行為，表現亦會變得更理想。點解會咁神奇? 因為人腦就係咁神奇，思想、感受會受五感接受嘅信息影響，所以當你聽到某首歌的前奏一出，你腦海會呈現一幕幕畫面; 聞到一絮熟悉的香水味，你會回想起與某人的一些經歷; 路過母校，細個回憶會翻晒嚟!

如何建立正面心錨?

  1. 先問問自己想建立咩理想狀況 (resourceful state)，例如自信、放鬆、開心等
  2. 回想一段令你有以上強烈感覺的經歷，愈深刻愈詳細愈好
  3. 留意回想時睇到咩？聽到咩？聞到咩？感受到咩？目的係激活五感，令自己彷彿身歷奇景場面重溫
  4. 盡情享受個感覺，同時㩒一下身體一個地方
  5. 不斷重覆到你㩒個個身體地方會即時回想番呢段經歷甚至引起個感覺

建立正面心錨看似簡單但講求專注同不斷訓練自己五感，此外，筆者建議大家釀成「儲貨」習慣，儲咩貨？就係令自己有理想狀態嘅經歷，如果你係管理銷售團隊，亦要於例會中建立分享成功故事的環節，用問題技巧鼓勵同事詳細分享，因為每一次當同事毫不掩飾地分享，佢個腦其實再一次回憶成功經驗，有助加強正面感受！分享個人成功故事想更引人入勝，助人助己?可以參考之前的文章<從Mirror 狂熱看你不得不學的「英雄旅程」故事法>

祝大家生活中、工作中經歷及儲存多點 Yes Moment，保持心理健康，繼續追尋夢想，亦繼續支持我哋香港運動員！

作者簡介：熱愛培訓事業的 80 後，推崇棟篤笑式演講風格。喜歡透過言語感染其他人，專長於團隊合作、銷售技巧及個人突破培訓，於上市公司擔任高級經理，曾獲業界獎項。最初視別人為培訓對象，後來發現自己才是學員。現在人生目標是為兒子立下對生命熱誠的榜樣