圖片素材來源：AP Photo/Vincent Thian

香港空手道運動員劉慕裳 (Grace ) 昨日 (5 日)在女子個人形項目奪得一面銅牌，其兄長劉知名今早 (5 日) 在商台節目《在晴朗一天出發》上分享 Grace 的致勝之道。他指出，Grace  比對手年長，賽事後段呈現疲態，不過技術分搭救。為防功虧一簣，Grace  自美國訓練回港後，一直做足防疫措施，與家人打邊爐也要分開食。哥哥形容，Grace 的獎牌是香港空手道的光輝一頁。 

劉知名形容，妹妹昨晚得到的奧運獎牌，既是空手道在奧運史上的第一次，也很可能是慕裳運動生涯的最後一次，因此別具意義。而本身也是空手道運動員的他，當年親自帶領妹妹進入空手道運動，自己也感到欣慰。

他又大讚妹妹「好犀利」，指出她近年改寫了空手道歷史，包括 2017 年中斷日本選手 87 連勝的走勢，又在亞運會、世錦賽、世沙運上取得獎牌，加上今屆奧運的銅牌，「真係我香港空手道嘅光輝一頁。」

比對手年長　靠動作流暢取勝

談及劉慕裳的制勝關鍵，劉知名指出，銅牌戰土耳其對手寶珊 (Dilara Bozan) 是全組最年輕運動員，年僅 24 歲，而 Grace 則已 29 歲，「佢打嘅拳同慕裳一樣，都係糸東流.北谷屋良公相君，佢有氣有力，不過技術方面都係慕裳略勝一籌，睇到個動作嘅轉換，對手係冇咁 smooth 嘅，慕裳流暢好多。」不過他說，慕裳在最後一場略見疲態，「重心轉移冇咁爽，佢賽後都透露其實自己都攰，所以影響到自己嘅發揮。」

劉知名續說，Grace 取得的 26.94 分已屬很高分數，反映平均每位裁判差不多給予 9 分。他解釋，評分分開技術及運動表現兩項，技術評分包括馬步、重心轉換、技術、呼吸，及動作一致性，「呢方面慕裳係技勝一籌嘅。至於運動表現方面，包括力量、速度同平衡，裁判會覺得可能慕裳中後段有少少疲態出現咗，呢度扣咗少少分，同對手打成平手」。

為了今次比賽，劉慕裳作出了很周全的準備。劉知名透露，妹妹去年專程前往美國訓練，「一留就留咗 9 個月，因為疫情嘅緣故，都好少出去，佢本身係一個好怕悶嘅人，為咗呢個奧運，佢防疫做得好足，喺美國嘅時候生活好有規律」。

他笑說，Grace 後來「防疫上癮」，她今年 2 月回港後，仍保持高度警戒，「我哋屋企人一齊食飯，我哋打邊爐，係分開食架囉。然後我哋喺屋企都會戴口罩，因為唔想慕裳功虧一簣，返到來香港中咗就唔抵吖嘛，我哋都好配合慕裳囉」。

2019 年轉賽制　連輸數場陷低潮

另一得分竅門是化妝，劉知名說：「佢好貪靚，呢個項目係可以化妝，要化到個殺氣出來，個氣勢呢，個妝係有幫到手，我哋畫啲眉都要向上戚少少咁樣。」

他續指，雖然賽前預計 Grace 可以取得獎牌，因為她在世錦賽也曾獲獎，但奧運始終是個大舞台，「心理佔咗一個好大因素」。而 Grace 兩年前一度陷入低潮，「2019 年賽制轉變咗，由以前舉旗制、兩個選手對決，裁判即時決定邊個贏，變咗計分制，同一時間要對好多個對手，令慕裳 19 年輸咗幾個比賽。」不過 Grace「心態好好，唔會因為低潮就好唔開心、好消極，佢反而係好積極咁去搵一個方法，點樣去搵一個贏嘅秘訣。不斷嘗試，最後畀佢搵到。」

劉知名解釋，所謂贏的秘訣，就是成功捉摸到裁判的喜好，如何令裁判給予較高評分。他續說，慕裳在東奧列為 4 號種籽，與西班牙 1 號種籽同線，「以計分制嘅往績，佢 (Grace) 未贏過，不過慕裳係一個肯承受風險，肯跳出舒適圈嘅人，佢嘗試用一套新拳，希望畀到裁判一個新鮮感，搏入決賽。所以佢專程練一套新拳，結果都有一個唔錯嘅分數，不過西班牙選手技高一籌。」